Search form

Genesis 17

Nuugiriyaraq Akqutem Nallunailkutaa

1Abram-aaq yuinarnek tallimaunrita'arnek (99) allrakungeqerluku Atanrem alairvikaa qanrulluku-llu, “Wiinga Agayutnguunga Artuqailnguq, niisngakia canganarqutaunak-llu yuukina. 2Akqun una piurtaqa aipaqluten, kinguveten amllerivkarciqanka cakneq-llu yugyangevkarluten.” 3Abram-aam-llu ciktaarvikngani Agayutem qanrutaa, 4“Akqun una piurciiqaqa elpet aipaqluten: akqamken ciuliaqerkaurtelluten amllernun atanruvignun. 5Atren-llu Abram-aarungairutuq, tau͡gaam Abraham-aarurrluni,+ tua-i-wa atanruvignun amllernun ciuliaqsagucecamken. 6Irnialingevkarciqamken; Atanruviit angayuqat-llu elpenek nauvkarciqanka. Amllerciqngameng kinguliaten atanruviurciiqut.

7“Akqutka piuvkarciqaqa elpenun kinguverpenun-llu tekitarkanun, nangyuilnguuluku. Agayutkevkarlua elpenun kinguverpenun-llu. 8Cikirciqamken elpet kinguveten-llu nunanek uitavikeqalallerpenek. Canaan-aaq tamalkuan cikiutekaqa elpecen̄un, nangyuilngurmek pikesqelluku, wiinga-llu Agayutkeciqerpecia.”

9Agayun-llu qanertuq Abraham-aamun, “Elpet tau͡gaam akqutka aturarkaugan, elpet, elpenek-llu kinguvalriit tamarmeng. 10Waniwa akqun aturarkan, taqumalria wangkugnun kinguverpenun-llu: Tamarmeng angutet elpecen̄i nuugiumaarkaugut. 11Nuugiumaciquci amiq nuugani kepluku, nallunailkutnguvkarluku akqutmun taqumalriamun wangnun elpenun-llu. 12Pingayunlegnek ernengelria tan'gaurluq nuugiumaarkauguq; angutet tamarmeng yuullgutkelriani, ayuqluku yuurtelleq nevcen̄i, wall'u kiputellerci allanermek ilakenrilkevcen̄ek. 13Tamarmeng nuugiumaarkaugut nallunairluku akqutma piugarkaucia akwarpak. 14Angun nuugiumanrilkuni ancimaciquq yum'inek; akqun atunrilamiu.”

15Agayun qanertuq Abraham-aamun, “Sarai-a-llu nulian Sarai-amek aterpagtenrirluku; wak'nirnek atra Sarah-uciquq.+ 16Atawaqerceciiqaqa, cali-llu qetunrangevkarluten elliikun; aanakciqaat amlleret atanruviit; yuut atanerkait elliikun yuurciiqut.”

17Abraham-aaq-llu put'uq nunamun, tau͡gaam temciyugtuq umyuamikun qanerluni, “Angun-qaa irniangyugngauq yuinarnek tallimanek (100) allrakungelria? Sarah-llu-qaa irniyugngaciquq allrakungluni yuinaat cetaman qulnek cipluku (90)?” 18Abraham-aaq-llu qanertuq Agayutmun, “Assinruyartuq Ishmael-aakun akqutkellren piciurceskuvgu.”

19Tau͡gaam Agayutem qanrutaa, “Qang'a, Sarah irniciquq qetunrarkarpenek, acirarkaugan-llu Isaac-aamek.+ Akqutkelqa elliikun piciurceciiqaqa nangyuilnguuluku elliinun kinguvrinun-llu. 20Niitaqa kaigaten Ishmael-aamun. Ellii-llu atawaqerceciiqaqa irnialingevkarluku, cakneq yugyangevkarciqaqa; atakeciqaat qula malruk atanerruat, atanruvigpaurceciiqaqa-llu. 21Tau͡gaam akqutka piurceciiqaqa Isaac-aakun, Sarah-m irniarkaakun waten pitarikan allamiku.” 22Agayutem qalarutenriamiu Abraham-aaq unitaa.

23Taumi ernermi Abraham-aam Ishmael-aaq, tamalkuita-llu angutet ellmini uitalriit, pisten͞gungraata kiputellni nuugirai. 24Abraham-aaq allrakungluni yuinarnek cetamanek qulnek cipluku (90) nuugiumallruuq. 25Qetunraa-llu Ishmael-aaq allrakungluni qula pingayunek cipluku nuugiumallruluni. 26Ernermi ataucimi nuugiumalutek, 27ilalutek Abraham-aam pistainek.

Yupik Bible

Yupik Bible © 2012 American Bible Society

More Info | Version Index