Search form

Genesis 21

Isaac-aam Yuurtellra

1Atanrem atawaqercetaa Sarah akqellrucimitun. 2Qingartuq qetunrangluni-llu Abraham-aakun. Tamaani Abraham-aaq ak'allaurrluni. Tan'gaurluq-llu yuurtuq tuani Atanrem apertullrani yuurciiqniluku. 3Abraham-aam aciraa Isaac-aamek. 4Pingayunlegnek ernengan Isaac-aaq Abraham-aam nuugiraa, Agayutem alerqullruciatun. 5Abraham-aaq allrakungellruuq yuinarnek tallimanek (100) Isaac-aaq yuurtellrani. 6Sarah-llu qanerluni, “Agayutem taitaanga angnimek engelallerkamnek-llu.+ Tamarmeng niitestain engelallgucirciqaatnga.” 7Kingunertaa-llu, “Kia-kiq qanrutellruyartau Abraham-aaq Sarah mikelngurmek aamarciciqniluku? Tau͡gken wiinga irnilua qetunrarkaanek ak'allaurtenrakun.”

8Mikelnguq-llu angliuq, neryugngarian-llu Abraham-aaq angelriamek nerevkariuq.

Hagar-ankuk Ishmael-aaq-llu Ayagcecimauk

9Erenret iliitni Sarah-m tangrraa Ishmael-aaq, Hagar-am Egypt-aarmium qetunraa Abraham-aakun, aquillrani aipaqluku qetunrani Isaac-aaq. 10Sarah-m tangrramikek Abraham-aaq qanrutaa, “Ayagcessgu una pista nasaurluq qetunraa-llu. Qetunraa uum arnam avgucunaituq tukuutvet ilaitnek Isaac-aam paitarkainek.” 11Abraham-aam umyugaa nall'artenrituq, tua-i-wa Ishmael-aaq-llu elliin qetunraqngamiu. 12Tau͡gaam Agayutem qanrutaa, “Umyuarniurutkenrilgu tan'gaurluq pisten-llu Hagar-aaq. Sarah-m qanruciatun pii, Isaac-aakun kinguverkangciqngavet akqellrucimtun. 13Irnialingevkarciqaqa qetunraa pistevvet atanruvigpaurtesqelluki, ellii-llu cali elpet qetunraqngavgu.”

14Unuaquan-llu unuakuarmi Abraham-aam Hagar-aq neqnek caqutmek-llu mermek imalegmek atmirluku, tan'gaurluq malikluku ayagcetaa. Arnaq-llu ayagtuq calligtaarluni-llu Beersheba-m yuilqurtaani. 15Meriucamek-llu mikelnguq unitaa napam acianun, 16aqumluni-llu yuinarnek tallimanek (100) yaaltanek yaaqsigtalriamun. Umyuamikun qanertuq, “Irniaqa tuqullrani tangvagciigataqa.” Tuani-llu aqumgainanermini arnaq qiaguq.

17Agayutem-llu niitaa mikelnguq qiallrani. Qilagmek-llu Atanrem an'gilaa qanertuq Hagar-amun, “Hagar-aaq cam umyuassuugarcetaten? Alingenrilu Agayutem niitaa mikelnguq qiallrani. 18Nangerrluten teguyarturru nepairturluku-llu. Angelria atanruvik nauvkarciqaqa kinguvrikun.” 19Agayutem-llu iigni uicecakek tangrraa elakaq ullagluku-llu caqutni imiraa mermek tan'gaurluq-llu mertelluku. 20Agayutem-llu nayuraa tan'gaurluq anglillrani, uitallruuq-llu yuilquani Paran-aam, pissulangami-llu piculiuluni. 21Aaniin-llu Egypt-aarmiumek nulirturtelluku.

Abraham-aankuk Abimelech-aaq-llu Picirkamek Taqutellrak

22Taum nalliini Abimelech-aam Phicol-aq maligtellrua anguyagtem̄i atanrat, qanerluni-llu Abraham-aamun, “Agayutem nayuraaten callerpeni tamalkuan. 23Taumek akqikina wani ciuqerrani Agayutem piciugarkauluten wangnun irniamnun-llu wall'u kinguvemnun. Wiinga elpenun piciullruunga taumek akqi elpet-llu wangnun piciugarkauluten mat'umun-llu nunamun uitavigpenun.”

24Abraham-aaq qanertuq, “Pisqucirpetun akqiunga.”

25Abraham-aaq qanemyuugallrani Abimelech-aamun elakaq pitekluku Abimelech-aam pistain tegullrat, 26Abimelech-aaq qanertuq, “Nalluaqa kitumun piciitaqa, qanrutellrunritarpenga. Wiinga nutaan niitua tamatumek.” 27Abraham-aam-llu qusngit kuluviit-llu ilait cikiutekai Abimelech-aamun, elkek-llu akqullutek ellmegnun. 28Abraham-aaq-llu allakariuq malrunlegnek qusngiyagarnek katngautminek. 29Abimelech-aam-llu aptaa, “Ciin waten pisit?”

30Abraham-aam kiugaa, “Ciuniurki ukut qusngiyagaat. Waten piluten elpenek nallunairniartuten nallunrilucirpenek wangnun elakiaqucianek uum elakam.” 31Taumek tauna atengqertuq Beersheba,+ tua-i-wa tuani taukuk atunem akqut'lillruagnek. 32Tuaten pirraartellukek Beersheba-mi, Abimelech-aankuk Phicol-aq-llu utertuk Philistia-mun. 33Abraham-aaq-llu nauceciiguq napamek tamarisk-aamek Beersheba-mi, ciktaarvikluku-llu Nangyuilnguq Agayun. 34Abraham-aaq-llu uitallruuq Philistia-mi ak'anun.

Yupik Bible

Yupik Bible © 2012 American Bible Society

More Info | Version Index