Search form

Genesis 22

Agayutem Abraham-aamun Elliitekesqaa Isaac-aaq

1Kinguqvaarni Agayutem naspaanaluku Abraham-aaq qayagauraa, “Abraham!” Abraham-aam-llu kiugaa, “Aa-ang waniwa!”

2Agayun qanertuq, “Ayausgu qetunraan kiingan Isaac-aaq, kenkeken cakneq, nunamun Moriah-mun tuavet ingrim qainganun aperturarkamnun, tuani elliitekniaran wangnun.”

3Unuaquan unuakuarmi Abraham-aaq eqiurtuq ekuagissuutekaminek, atmiulluki-llu ciulvagmun. Isaac-aaq-llu piluku pistegnek-llu malrugnek malilirlutek ayagtut Agayutem qanrutkellranun. 4Erenret-llu pingayuatni Abraham-aam tangrraa tauna yaaqvaarnek. 5Pistek-llu qanrutak, “Wantaurtek ciulvak nayurluku. Qetunraqa-llu wangkuk yaavet ayaglunuk agayuyartuqatartukuk. Agayurraarlunuk ataam taiciqukuk.” 6Abraham-aam muriit ekuagissuutekat tegumiaqevkarai Isaac-aamun, elliin-llu nuussiq kangipluut-llu kumarcissuutekatek tegumiaqluki ayagtuk. 7Isaac-aam atani pia, “Aataa!”

Atiin-llu kiugaa, “Aa-ang niitamken!”

Isaac-aaq qanertuq, “Muragkangqertuten kenermek-llu kumarcissuutekaatnek, nau-wa-mi qusngiyagaq ekuagarkaq?”

8Abraham-aam kiugaa, “Agayutem pikangqerceciiqaakuk.” Tua-i ayagtur'tuk.

9Tekicamek Agayutem qanrutkellranun Abraham-aaq ekuaviliuq muriit-llu elliluki qaingatnun. Qillerqelluku-llu qetunrani Isaac-aaq, elliluku-llu ekuavigmun muriit qaingatnun. 10Abraham-aam-llu nuussiq tegua tuqutnaluku qetunrani. 11Tau͡gaam Atanrem an'gilaan qayagauraa qilagmek, “Abraham, Abraham!”

Ellii kiuguq, “Aa-ang waniwa!”

12An'gilam qanrutaa, “Akngircaqunaku qetunraan. Waniwa nallunriraqa niisngalriarucin qigcikluku-llu Agayun, qunukutenrilavnga kiingan qetunrarpenek.”

13Abraham-aaq-llu kiarcami tangertuq qusngimek nagingaluni naparrluggni cirunregminun. Ullagluku-llu tegua ekuagiluni-llu taumek qetunrani pivkenaku. 14Abraham-aam aciraa tauna, “Ataneq Pikangqercecilria.” Mat'um cali nalliini yuut qanraqluteng, “Atanrem ingriani pikangqercecilartuq.”

15Atanrem an'gilaan qayagaura Abraham-aaq qilagmek aipiriluni, 16qanerluni, “Akqiunga wiinga atemkun Ataneq wani qalartuq— cakneq atawaqerceciiqamken, waten piavet kiingan qetunraan qunukevkenaku wangnek. 17Akqamken kinguverkarpenek qiliim agyaitun amllertalrianek, imarpiim-llu cen̄iini qau͡gyatun amllertalrianek. Kinguverpet cirlak'larciqait ingluteng. 18Nutaan-llu tamarmeng atanruviit yuita kaigavikeciqaatnga atawaqercecesqelluteng kinguveten atawaqercetellrucimtun. Makut tamarmeng tuaten ellirciqut alerquuteka niitellruavgu.” 19Abraham-aaq-llu utertuq pistem̄inun, malikluteng-llu utertut Beersheba-mun. Tuavet-llu Abraham-aaq elgartuq.

Nahor-am Kinguvri

20Makut kinguatni iliita qanrutellrua Abraham-aaq, “Milkah anelgutvet Nahor-am nulirra irniangellruuq: 21Uz-aq ciuqliq, Buz-aq anelgutii, Kemuel-aaq Aram atii, 22Chesed-aaq, Hazo, Pildash, Jidlaph, Bethuel-aaq-llu.” 23Bethuel-aaq Rebecca-m atakaa. Ukut pingayunlegen Milkah-m irniaqai Nachor-amek uiluni Abraham-aam anelgutiinek. 24Cali-llu arnautii Nahor-am irniangellruluni Tebah-mek, Gaham-aamek, Tahash-aamek, Maacah-mek-llu.

Yupik Bible

Yupik Bible © 2012 American Bible Society

More Info | Version Index