Search form

Genesis 27

Isaac-aam Atawaqercetaa Jacob-aaq

1Isaac-aaq tamatum nalliini ak'allaurtuq cikmillrurrluni-llu. Taisqaa anngaqliq qetunrani Esau qanrulluku-llu, “Qetunramaa!”

Esau-m kiugaa, “Aa-ang waniwa.”

2Isaac-aaq qanertuq, “Tangrrucirpetun ak'allaurtua, tuqullerkaqa-llu ukaqsigillilria. 3Caskuten piluki, pitegcauciviin urluvren-llu, yuilqumun ayagluten pissuusnga. 4Kenirraarluku picalqukekemtun taiskiu nerniartua; nererraarlua atawaqaasqen̄iamken tuquvailegma.”

5Tuani Isaac-aam Esau qalarutellrani Rebecca-m niicugnia. Tua-i-llu Esau ayiin pissurluni 6Jacob-aamun qanertuq, “Niitaqa atavet qalarutellrani Esau, 7‘Taiskina pitarpenek kenirraarluku picalqukekemtun, nerumarikuma atawaqercetniamken ciuqerrani Atanrem tuquvailegma.’ 8Kitaki, qetunramaa, niicugninga alerqurnaamken. 9Ayagluten katngagnun assilriignek qusngirngalnguyagaagnek taiskina wangnun, kenirniagka picalqurrurrlukek atavet assikekiitun. 10Elpet agutniaran atavnun neresqelluku atawaqaasqen̄iaraaten tuquvailegmi.”

11Tau͡gaam Jacob-aam aanani qanrutaa, “Nallunritan Esau melqiuq, wiinga tau͡gken melqurrinani qaika. 12Atama caavtaaqunia picingssauteksukciquq, wiinga-llu aniqlaamaciqua atawaqercecimavkenii.”

13Aaniin kiugaa, “Aniqlaamakuvet wangnun tuskilit; niilluten aqvatesqellemnek aqvaten.” 14Tua-i aqvatuq tunlukek-llu aanaminun, elliin-llu kenirlukek atiin assikekiitun. 15Esau-m-llu aturain assinritnek piluni qemangqakminek enemi, at'elluki-llu Jacob-aamun. 16Ungungssim-llu amianek unatainun uyaqurrinun-llu melqurrilngurnun elliiluni. 17Tunaa-llu tauna kenirani kelipaq-llu uptellni Jacob-aamun.

18Jacob-aaq-llu ataminun ag'uq qanerluni-llu, “Aataa!”

Kiuguq, “Waniwa. Kituusit qetunramaa?”

19Jacob-aaq kiuguq, “Esau-ruunga ciuqliq qetunraan. Qanrucirpetun pillruunga. Makluten pitamnek neri, atawaqercetniarpenga.”

20Isaac-aaq qanertuq, “Qetunramaa, qaillun piluten piqanqegpakarcit?”

Jacob-aam kiugaa, “Atanrem-wa Agayutvet ikayuanga pitarkamnek tangerrsara'artellua.”

21Isaac-aam qanrutaa, “Canimnun taiqaa caavtaarniamken, nallunrirniarqa ilumun Esau-rucin.” 22Jacob-aaq malkaniutuq ataminun. Caavtaarraarluku-llu qanertuq elliinun, “Erinan Jacob-aam eriniitun ayuquq, talligken tau͡gken Esau-m talligketun ayuqlutek.” 23Elitaqenritaa Jacob-aaq tallik melqiagnek Esau-tun. Atawaqaasqeqatarluku 24aptenqigtaa, “Ilumun-qaa Esau-ruuten?”

Kiugaa, “Taunguunga.”

25Isaac-aaq qanertuq, “Taisgu nernaurtua qetunrama pitaanek, nutaan atawaqercetniamken.” Tua-i taitaa, ellii-llu nerluni, wine-amek-llu cali cikiani merluni. 26Tua-llu atiin qanrutaa, “Taikanirluten melugarnga qetunramaa.” 27Malkanirliku melugaqatallrani atiin aturai narai, atawaqercetaa-llu qanerluni, “Qetunrama narnirqellra ayuquq yuilqum tepiitun, atawaqercetellran Atanrem. 28Agayutem cikirliten qiliim yukutaanek naucetaarviten naungigivkarluki. Cikiqiliten-llu amllernek mukaarkanek wine-anek-llu. 29Atanruviit yuit pisteksaguskiki, yuut-llu ciktelaqilit ciuqerpenun. Atanirturilriarukina tungelqurpenek, aanavet-llu kinguvri ciktelaqilit ciuqerpenun. Aniqlaasteten aniqlaamakilit, atawaqercecilriit-llu elpenek atawaqercecimakilit.”

Esau Naklegca'rtuq Isaac-aamun Atawaqercecesqelluni

30Isaac-aam atawaqercecillerminek taqeqanrakun Jacob-aamek, Jacob-aaq-llu anqanrakun Esau tekituq pissullerminek. 31Kenirmiluni-llu picalqumek neqkamek taitaa ataminun qanerluni, “Atamaa makluten neri qetunrarpet pitaanek, atawaqercetniarpenga.”

32Isaac-aam-llu aptaa, “Kituusit?”

Esau-m pia, “Amaqliugua qetunraan Esau.”

33Isaac-aaq qiivenga'arrluni qainga tamarmi pekluni, apluni-llu, “Kituuga-mi au͡gna pissulleq, taicaku-llu wiinga nerluku tamalkuan tekipailegpet, atawaqertelluku-llu? Tua-i ellii atawaqercecimaarkaurtuq.” 34Esau-m niicamiu man'a qiaguq qastuluni iluteqeqapiggluni, atani-llu qanrulluku, “Atamaa atawaqercessnga-llu wiinga.”

35Isaac-aam qanrutaa, “Kinguqliin umyuarrliqluni taillruuq atawaqautekarpenek allurrluten.”

36Esau qanertuq, “Elluatun atengqertuq Jacob-aamek.+ Aipiriluni waniwa usvituyarrluni pikairaanga. Paitarkaqa yung'eqarraarutngulua piksaguqaarluki, waniwa-llu cali tegua atawaqautekaqa. Ilakuiqanrituten-qaa wiinga atawaqautekamnek?”

37Isaac-aam kiugaa Esau, “Ak'a atanrurtellruaqa elpenun, tamalkuita-llu tungelqurri elliinun pisteksagutelluki. Nuuqitarkaunrirtelluku-llu mukaarkanek wine-amek-llu. Tua-i camek elpet pisciigatamken.”

38Esau-m tua-i atani aguaguquraraa, “Atauciungraan-qaa atawaqautmek piituten? Atawaqercessnga-llu wiinga.” Aluviliurluni-llu.

39Isaac-aam qanrutaa,

“Yukutartangqerrngaituq qilagmek naucetaarvigpeni.

Naucetaarvignek-llu naugilrianek pitangqerrngaunani pikarpenek.

40Yuuciquten nuussirpegun,

tau͡gken pisten͞guluten kinguqlirpenun.

Tau͡gaam pegleqruskuvet

elliinun ataniumanrirceciiquten.”

41Esau-m tua-i cakneq eq'ukaa Jacob-aaq atami yung'eqarraarutem atawaqautii elliinun piaku. Waten-llu umyuarteqluni, “Tuquilriit piyaraatnek atama tuaten pimallerkaa canimellirtuq; tuani tuquciiqaqa Jacob-aaq.”

42Tau͡gaam Rebecca-m niicamiu Esau-m picirkiuraa, Jacob-aaq taisqaa qanrulluku-llu, “Amaqliin qarutelartuq ellminek picirkiurluni tuqutnaluten. 43Taumek niillua qimakina Laban-aamun amaqlimnun, Haran-aami. 44Uitauraqervikluku-llu anelgutvet qenertellra pellugnatkaanun, 45nalluyagutnatkaanun man'a elliinun pillren, wiinga aqvavkarciqamken tuaken. Yuarnaksuumiitamtek tamarpetek ernermi ataucimi.”

Isaac-aam ayagcetaa Jacob-aaq Laban-aamun

46Rebecca-m Isaac-aaq qanrutaa, “Unguvayuumiirutua makut Hittite-at arnat Esau-m nulirri tangerrluki. Jacob-aaq iliitnek nulirtuqan, unguvalqa caunrilngurtun ellirarkaungan.”

Yupik Bible

Yupik Bible © 2012 American Bible Society

More Info | Version Index