Search form

Genesis 29

Jacob-aaq Tekituq Laban-aam Eniinun

1Jacob-aaq ayagtu'rtuq tungiinun nunam calarami. 2Kiarcami tangertuq elakamek marami pingasuinek katngagnek qusngirtarluni nunii; katngaat tuaken mercet'larait elakamek teggalqurpall'e'rmek patulegmek. 3Tamarmeng katngaat quyurcimariaqata tuavet, qusngiliurtet teggalquq akaggluku qusngit mercet'larait, ataam-llu teggalquq akaggluku elakaq patuluku.

4Jacob-aam aptai qusngiliurtet, “Ukuut camiunguceci?”

Kiugaat, “Haran-aarmiunguukut.”

5Aptai, “Nallunritarci-qaa Laban-aaq qetunraa Nahor-am?”

Kiugaat, “Aa-ang nallunritarput.”

6Aptai, “Canrituq-qaa?”

Qanertut, “Aa-ang canrituq, pania uka-i Rachel-aaq agiirtuq qusngiinek maligluni.”

7Jacob-aaq qanertuq, “Erenruuq cali ut'rutnariksaunaki katngaat. Mercecuavciki-llu ut'rulluki-llu nerrlerkaatnun.”

8Kiugaat, “Tuaten pisciigatukut katngaat tamalkuita quyurpailgata maavet. Teggalquq akagcimarikan merceciiqaput.”

9Jacob-aam qalarusnginanrani Rachel-aaq tekituq qusngiinek atami maligluni, tua-i elliin auluk'laamiki. 10Jacob-aam Rachel-aaq tangrramiu angami katngautainek maligluni, elakamun ag'uq teggalquq-llu akaggluku mercelluki Laban-aam aanami anelgutiin qusngiutai. 11Jacob-aam-llu melugaraa Rachel-aaq, angnim-llu ugaani qialuni. 12Jacob-aam qanrutaa Rachel-aaq tungayakniluni, Rebecca-mun irniaqniluni. Rachel-aam-llu atani aqvaqurluni qanrucarturluku. 13Laban-aaq niicami Jacob-aamek nayagarmi qetunraanek aqvaqurluni pairrsaagaa akuqerluku-llu melugarluku, itrulluku-llu eneminun. Jacob-aam Laban-aaq qanemcitaa canek tamalkuitnek pillernek. 14Laban-aaq-llu qanertuq, “Aa-ang ilumun wiinga ilakamken!” Jacob-aaq-llu iraluq qaqilluku tuantuq.

Jacob-aaq Caliuq Laban-aamun Rachel-aankuk Leah-llu Piteklukek

15Laban-aaq Jacob-aamun qanertuq, “Caliyunaitaaten akingeksaunak tungelququcin pitekluku. Qaillun pitalriamek akingyugcit?” 16Laban-aaq paningqertuq malrugnek, alqaa Leah-mek aterluni nayagaa-llu Rachel-aamek. 17Leah iigmikun kenegnartuq, Rachel-aaq tau͡gken temtuumarmi tangssunaqluni.

18Jacob-aam Rachel-aaq kenkaa, taumek qanertuq, “Calistekevkarciqua elpenun malrunlegni allrakuni Rachel-aaq nulirqevkararkaukuvgu.”

19Laban-aaq-llu kiuguq, “Assinruciqellilria-wa elpenun tunkumni allamun pivkenaku, maantauraa.” 20Jacob-aaq tua-i caliuq malrunlegni allrakuni Rachel-aaq nuliqsagutnaluku. Calillermini-llu allrakut malrunelgen ernertun qavcirrartun elliini ayuqut, tua-i-wa Rachel-aaq kenekngamiu.

21Tua-llu Jacob-aaq Laban-aamun qanertuq, “Caliyuglua elpenun akqutkelqa qaqituq, nuliqsagucesgu paniin.” 22Laban-aaq-llu nerevkariuq yuut tamalkuita kelegluki. 23Tau͡gaam tuani atakumi Rachel-aaq pivkenaku Leah taitaa Jacob-aamun, elliin-llu nuliqsagulluku. 24Laban-aam pisten̄i Zilpah pikiutekaa paniminun pistekesqelluku. 25Unuaquan tau͡gaam Jacob-aam taringaa arnam nuliqsagutellermi Leah-ucia. Laban-aaq-llu ullagaa qanrulluku-llu, “Ciin waten pisia? Calillruunga Rachel-aaq nuliqsagutnaluku. Ciin iqluurcia?”

26Laban-aam kiugaa, “Maani nunamten̄i piciryaraqenritarput uingevkarluku kinguqliim alqaa ciullegluku. 27Utaqalgia nitiliq aturluku, kassuutem nerevkaritii pellugnatkaanun. Rachel-aaq elpenun tuneniarqa caliarkaukuvet cali allani malrunlegni allrakuni.”

28Jacob-aaq tua-i tuaten piciqniuq. Nitiliq-llu iquklican, kassuutem nerevkaritii iquklican, Laban-aam Rachel-aaq tunaa nulirqesqelluku. 29Laban-aam pisten̄i arnaq Bilhah tunaa paniminun pistekesqelluku. 30Jacob-aam-llu tutgaa Rachel-aaq. Kenkenruluku-llu Leah-mi, caliluni-llu Laban-aamun allani allrakuni malrunlegni.

Jacob-aam Irniari

31Atanrem tangrramiu Leah-m kenkumanritellra qingatuvkaraa, Rachel-aaq tau͡gken qingayuunani. 32Leah qingartuq irniluni-llu qetunrangluni. Qanertuq-llu, “Atanrem arenqiallugtelqa tangrraa, nutaan uima kenegyaguciiqaanga”; acirluku-llu Reuben-aamek.+ 33Cali qingartuq, irniami-llu qetunrangluni qanertuq, “Atanrem niicamiu kenkumanriluciqa uumek cali qetunrangevkaraanga.” Aciraa-llu Simeon-aamek.+ 34Cali allamek qingartuq irniluni-llu qetunrangluni. Qanertuq, “Nutaan uima malkanirciqaanga qeturangama pingayunek elliikun.” Taumek aciraa Levi-amek.+ 35Allamek cali qingartuq, irniluni-llu cali qetunrangluni. Qanertuq, “Watua wiinga nanrarciqaqa Ataneq”; aciraa-llu Judah-mek.+ Tuakenirnek qinganqigtenrituq.

Yupik Bible

Yupik Bible © 2012 American Bible Society

More Info | Version Index