Search form

Genesis 30

1Tau͡gaam Rachel-aaq irniarituq Jacob-aami, taumek ciknanguq alqerminek. Qanertuq-llu Jacob-aamun, “Irniangevkarnga tuquyuartua!”

2Jacob-aam-llu qenqerrutaa Rachel-aaq, qanerluni-llu, “Agayutem caliara wiinga pisciigataqa. Elliin irniangesciigatevkaraaten?”

3Rachel-aaq qanertuq, “Waniwa pisteka Bilhah. Tutgu irniangniartuq wiinga pikamnek, aanaurrniartua elliikun.” 4Tunaa-llu Bilhah uiminun, Jacob-aam-llu tutegluku. 5Bilhah-llu qingartuq irniluni-llu Jacob-aam qetunraanek. 6Rachel-aaq qanertuq, “Agayutem piyulqa piciurcetaa. Niilluku piicalqa cikiraanga qetunrarkamnek.” Taumek aciraa Dan-amek.+ 7Bilhah cali qingartuq Jacob-aaq aipiriluni qetunrangevkarluku. 8Rachel-aaq qanertuq, “Cakviurlua callullruaqa alqaqa, anaggluku-llu”; taumek aciraa Naphtali-mek.+

9Leah-m elpekngamiu qinganqiggngailucini pisten̄i Zilpah Jacob-aamun nuliqsagucetaa. 10Zilpah-m-llu qetunrangevkaraa Jacob-aaq. 11Leah qanertuq, “Piluaqertua”; taumek aciraa Gad-amek.+ 12Zilpah cali allamek qetunranguq. 13Leah-llu qanertuq, “Angnipiartua! Arnat aterpagtelararkaurtaatnga angnimek.” Taumek aciraa Asher-aamek.+

14Quyurciyaram mukaarkanek nalliini Reuben-aaq ayallermini naucetaarvigmun nalaqutuq naunrarnek iinruktukaitnek mandrake-anek,+ ut'rulluki-llu aanaminun Leah-mun. Rachel-aaq-llu qanertuq Leah-mun, “Cikiqernga qetunrarpet naunrautain ilaitnek.”

15Leah kiuguq, “Carrartun-qaa elpeni pitauq uimnek allurkengellren? Teguciqaten-llu-qaa qetunrama naunrautai?”

Rachel-aaq qanertuq, “Cikiquvnga qetunrarpet naunrautainek Jacob-aaq qavarniartuq canivni unuku.”

16Jacob-aaq utercan atakumi naucetaarvigmek Leah-m pairrsaagaa qanrulluku, “Unuku canimni qavarciquten akilitellruamken qetunrama naunrautainek.” Tuani-llu unugmi caniani qavartuq.

17Agayutem niitaa Leah-m piicautii qingartuq-llu Jacob-aam qetunrain tallimakaatnek. 18Leah qanertuq, “Agayutem nunuliraanga pisteka tunellruamku uimnun.” Taumek qetunrani aciraa Issachar-amek.+ 19Leah-llu ataam cali allamek qingartuq arvinelgurrluki Jacob-aam qetunrai ellmini. 20Ellii qanertuq, “Agayutem cikiraanga cikiutmek assilriamek. Nutaan uima ciuniurarkaugaanga tua-i-wa qetunrangevkaamni arvinlegnek.” Taumek aciraa Zebulun-aamek.+ 21Kinguqvaarni paningellruuq acirluku-llu Dinah-mek.

22Agayutem-llu umyuaqaa Rachel-aaq; kiuluku-llu piicallra irniangyugngarivkallrua. 23Qingartuq qetunrangluni-llu. Qanertuq, “Agayutem au͡g'araa kiaresngialutka, qetunrarkamnek cikirlua. 24Atanrem cali allamek qetunrangevkaqilia.” Tua-i aciraa Joseph-aamek.+

Jacob-aam Laban-aamek Kaigatii

25Joseph-aam yuurtellran kinguakun Jacob-aaq qanertuq Laban-aamun, “Ayagcessnga uterrniartua kingunemnun. 26Nulianka irnianka-llu malikevkarluki piksagutellruamki calilua elpeni. Ayagceskia nallunritan qaillun pitalriamek elluarrlua kevgiulqa elpenun.”

27Laban-aaq qanertuq elliinun, “Canrilkekuvgu qanernaurtua: Nallunrillruaqa ciunerkarcuryarakun Atanermun atawaqercecuciqa elpet pitekluten. 28Ap'ri akiliutekarpenek akilirniamken.”

29Jacob-aaq kiuguq, “Elpet nallunritan qaillun kevgiullruciqa elpenun, qaillun-llu kuluvautvet ayuquciat auluk'ngerraanemnek. 30Carraullruyaaqut taivailegma, maa-i-llu amlleriluteng; Atanrem-wa atawaqercecamiten wiinga piteklua. Tau͡gaam wangnek yuungnaqnarianga.”

31Laban-aam aptaa, “Camek akiliisqessit?”

Jacob-aam kiugaa, “Akingyunritua, waten tau͡gaam pivkaquvnga katngauteten auluku'urciqanka: 32Unuamek pulaarcessnga katngautvet akuliitni, allakarluki tamalkuita tungulriit qusngiyagaat qusngirngalnguyagaat-llu kukupalget kukupayagalget-llu. Kiingita tamakunek akingyugtua. 33Kinguqvaarni nallunaitniartuq piciuciqa paqeskuvki akingutkellrenka. Kukupayagailngurnek kukupailngurnek-llu wall'u tungunrilngurnek ilangqerquneng piyagarnek tamakut teglegauciqut.”

34Laban-aaq qanertuq, “Qanellren assirtuq, tuaten piciqukuk.” 35Tau͡gaam tuani ernermi Laban-aam allakarai qusngirngalnguut angucalut keptalget, kukupalget, qatellrialget-llu qaimegteggun. Cali-llu allakarluki tungulriit qusngit, qetunraminek-llu qaunqescirluki. 36Ayagluni-llu Jacob-aamek katngautni ayaulluki erenret pingayun aturluki, tuaten pitalriamek yaaqsigtaluni Jacob-aamek. Jacob-aam-llu aulukai tuanelnguut Laban-aam katngautai.

37Jacob-aaq-llu quyurtuq cungagcetellrianek avayaitnek napat ayuqenrilnguut, qeltairluki-llu akulperrluki qatellria alaicetaqluku qeltaita akuliitgun. 38Tamakut avayat ellii katngaat merviata manuitnun, ungungssiaraat nulirtelaata meqsarturaqameng. 39Katngaat nulirtaqameng tamakut avayat akuliitni irnilartut keptalegnek, kukupayagalegnek, kukupalegnek-llu.

40Jacob-aam allakarai qusngit qusngirngalngurnek, cauvkarluki-llu keptalget tungulriit-llu Laban-aam katngautai. Elliin-llu pikani allakaumai, ilaucetevkenaki Laban-aam piinun.

41Segganqellriit ungungssit nulirtaqata, Jacob-aaq avayanek elliilartuq merviitnun, irnisqelluki avayat nuniitni. 42Tau͡gaam avayanek elliiksaitelartuq ungungssit pinialnguut ciuqerritnun. Ak'anun pivkenani Laban-aaq pinialngurrlainarnek ungungssiutenguq, Jacob-aaq tau͡gken pinilriarrlainarnek. 43Waten piluni Jacob-aaq cakneq tukuurtuq, katngautai amlleriluteng, pisterluni arnanek, angutnek, ungungssiuterluni-llu cali qulugnelegnek ciulvagnek-llu.

Yupik Bible

Yupik Bible © 2012 American Bible Society

More Info | Version Index