Search form

Genesis 31

Jacob-aam Qimagaa Laban-aaq

1Jacob-aaq niituq Laban-aam qetunrai qanerniluki, “Jacob-aam cat tamalkuita tegui atamta pikellri, tukuurrluni atamta piikun.” 2Laban-aam-llu cali ciunganitun ayuqutenrirluku. 3Atanrem Jacob-aaq qanrutaa, “Ataam uterten atavet nunautiinun ilavnun-llu, wiinga nayurciqamken.”

4Tua-i Jacob-aam taisqak Rachel-aaq Leah-llu maramun katngaat nuniitnun. 5Qanrutak, “Nallunaunani atavtek ciunganitun ayuqutenriraanga, tau͡gaam atama Agayutiin nayullruanga. 6Tamarpetek nallunritarpetegnga calillruunga atavtegnun pitacirramtun. 7Tau͡gaam elliin teglegillruanga akingutkanka-llu cimiraqluki qulerqunek. Tau͡gaam Agayutem elliinun akngircetenritaanga. 8Laban-aaq qanraqan, ‘Kukupayagalget qusngirngalnguut akingutkeciqaten,’ tamarmeng katngaat irnilartut keptalegnek. Waten-llu qanran, ‘Keptalget qusngirngalnguut akingutkeciqaten,’ tamarmeng katngaat irnilartut keptalegnek. 9Agayutem tegullrui katngaat atavtegnek cikiutekluki-llu wangnun.

10“Nulirtellrata nalliini qavangurtullruunga tangerrlua angucalunek qusngirngalngurnek nulirtellrianek keptarluteng, kukupagluteng, kukupayagarluteng-llu. 11An'gilaan Agayutem qanrutaanga qavangumni, ‘Jacob-aaq!’ Kiugaqa, ‘Aa-ang!’ 12‘Tangerki atam tamarmeng nulirtellriit angucalut qusngirngalnguut keptangqertut, kukupagluteng, kukupayagarluteng-llu. Tuaten pivkaranka, tangrramku Laban-aam qaillun picia elpenun. 13Wiinga Agayutnguunga alailleq Bethel-aami elpenun, tuani qigcignarivkallruan teggalquq umyuaqutngurrluku, uqumek-llu kuvluku akqut'liluten wangnun. Watua upluten uterten nunamun yuurrvillerpenun.’”

14Rachel-aankuk Leah-llu kiugaak, “Paitarkairutukuk atamegnek. 15Allanertun pitarrlunuk pilaraakuk. Elliin tunellruakuk akiliutngullret-llu wangkugnun tamalkuita atullrurtai. 16Makut tukuutet Agayutem tegullrui atamegnek wangkuk irniartuumamegnuk pikapuk. Agayutem qanrutellratun tuaten pikina.”

17-18Tua-i Jacob-aaq uptuq uterrnaluni ataminun, nunamun Canaan-aamelngurmun. Irniani nuliani-llu ungungssit qulugnelget qaingatnun ekevkarluki, ungungssiutni kasemluki cat-llu tamalkuita Mesopotamia-mi piksagutellni ang'aqluki. 19Laban-aaq ayaumaluni asmegcarturluki qusngiutni. Cataitellrani Rachel-aam teglegai enemeggni agayutet, atami pii. 20Jacob-aam usviilqia Laban-aaq nalluvkarluku ayakatallerminek. 21Cani tamalkuita teguluki cukangnaqluni ayagtuq. Kuik Euphrates-aaq qerarluku ayagtuq tungiinun qertulriim nunam Gilead-aam.

Laban-aam Malirqeraa Jacob-aaq

22Erenret pingayun kinguatgun Laban-aaq qanrutaat Jacob-aaq ayagartellruniluku. 23Angutnek malilirluni malirqeraat Jacob-aaq ernerni malrunlegni anguluku-llu qertulriami nunami Gilead-aami. 24Qavanguakun taumi unugmi Agayutem ullagaa Laban-aaq qanrulluku-llu, “Mulngakekina camek qaneryaqunak Jacob-aamun assingraan assiilengraan-llu.” 25Laban-aam angua Jacob-aaq. Jacob-aaq arulaillruluni qertulriamun nunamun, Laban-aaq-llu ilani-llu arulairluni cali qertulriamun Gilead-aami.

26Laban-aaq qanertuq Jacob-aamun, “Ciin aassaqluten ayaga'rcit paniigka-llu ayaullukek teguaqelriatun anguyagkun? 27Ciin qanrutenricia ayakatarniluten? Qanrutellrukuvnga ayagcecaramken angnirluta aturpagaluta maliggluki aturcetaat. 28Tua-ingunrituurcetevkenaki-llu paniigka tutgaraanka-llu. Umyugailngurtun tuaten piuten. 29Piningqertua akngircugngaluten, tau͡gaam atavet Agayutiin unuk aarcirturaanga, ‘Mulngakekina, camek akeqnerrlugcaqunaku Jacob-aaq.’ 30Tua-i-wa ayalriaten tangerrsuavki ilaten, tau͡gaam ciin teglegciki agayutenka?”

31Jacob-aaq qanertuq, “Alingama-wa umyuarteqlua paniigken tegunayuklukek wangnek. 32Ilamten̄i agayuteten nalaqekuvki, tauna unguvangaituq. Ukunun ilamegnun tangvagtelluten nallunairki elpet piten teguluki-llu.” Jacob-aam nallua Rachel-aamun agayutet tegullruciit.

33Laban-aam yuaraa Jacob-aam pelatekaa, Leah-m-llu, arnak-llu pistek, tau͡gaam agayutni nalaqenritai. Rachel-aam tua-i pelatekaanun itertuq. 34Rachel-aam tegullruluki enemi agayutet qemaggluki-llu ungungssim qulugnelgem aqumvian qemaggvianun aqumvikluku-llu. Laban-aam pelatekaq qaqilluku yuaryaaqaa tau͡gaam camek nalaqutevkenani. 35Rachel-aaq ataminun qanertuq, “Qenrucaqunii nangertenrilnge'rma ciuqerpeni, nangercesciigatua agelrumiima.” Laban-aaq yuaryaaquq tau͡gaam agayutni nalaqenritai.

36Tua-i Jacob-aam qenqercami Laban-aaq apcecurlagaa, “Camek pinarqelriamek pillrusia? Camek inerquutmek navgilrianga ciin malirqercia? 37Yuaryaaqaten aklunka tamalkuita, tua-llu-qaa camek pivnek nalaqucit? Elliki wavet ilamegnuk tangerrnauraat nalimegnuk piciuluni picia. 38Allrakuni yuinarni nayullruamken, qusngiten qusngirngalnguuteten-llu irninriteksaitut, nerellruksaunii-llu angucalumek katngautevnek. 39Qusngiq tuqucimaaqan wangnun tuc'et'larqa elpenun-llu taiteksaunaku qaneryarturlua wiinga pillrunritniluku. Cimiisqelaran-llu wangnun iliit tegelgumaaqan erenrungraan unuungraan-llu. 40Amllermi nangteqaqlua kiirmek erenrani nengelmek-llu unugmi, qavarciigataqlua tuaten. 41Ukuni allrakuni yuinarni enevni uitallemni tuaten ayuqellruunga. Allrakut-llu akimiarunritaraat aturluki calillrulrianga paniigken nuliqsagutnalukek, cali-llu allrakuni arvinlegni kevgiullruluten katngautengllerkaqa piluku. Tuaten-llu pillrung'e'rma elpet akingutkanka cimillruluki qulerqunek. 42Agayutiita atama, Agayutiin Abraham-aam Isaac-aam-llu, nayullrunrilkanga ak'a ayagcecallruarpenga talligka aqevlakenka. Taumek Agayutem tangrraa arenqialluguteka calilqa-llu, taumek unuk alairvikluten aarcirtuqiiten.”

Jacob-aankuk Laban-aaq-llu Picirkamek Taqutellrak

43Laban-aam kiugaa Jacob-aaq, “Ukuk arnak wiinga panikagka, irniakek-llu cali wiinga pikanka, katngaat-llu wii pikluki, tangelten wiinga tamalkuita pikanka. Tau͡gaam qaillun pisciigalama avaliqsungramki paniigka irniakek-llu, 44akqut'linaurtukuk pillguteklunuk. Quyurcinaurtukuk qalliqelrianek teggalqunek nallunailkutauvkarluku wangkuk akqillmegnun.”

45Tua-i Jacob-aaq teggalqumek tegulluni umyuaqutngurrluku elgartaa. 46Angutet-llu ilani qanrulluki teggalqunek avuusqelluki. Avuameng quyurrluki qalliqluki elliit. Nutaan-llu nerluteng taukut teggalqut caniatni. 47Laban-aam tauna aterpagtaa Jegar Sahadutha,+ Jacob-aam tau͡gken acirluku Galeed-amek.+ 48Laban-aam Jacob-aaq qanrutaa, “Teggalqut ukut umyuaqutnguciqut wangkugnun.” Taumek tauna aterpagcimalria Galeed-amek. 49Laban-aaq cali qanertuq, “Ataki Atanrem murilkekilikuk avvingatlemegni.” Taumek tauna cali atengqellria Mizpah-mek.+ 50Laban-aaq cali qanertuq, “Elluarrlukek aulukenrilkuvkek paniigka wall'u allanek arnanek nulirtuquvet, wiinga nallungramku, umyuaqekiu Agayutem tangvagaakuk. 51Waniwa tang teggalqut quyurtellrenka akunlemeggnun, waniwa-llu umyuaqutngulria teggalquq. 52Tamarmek, ukut teggalqut qalliqelriit una-llu umyuaqun teggalquq, neqaarturitnguuk. Watqapik curukarluten kiturngaitanka ukut qalliqellriit, elpet-llu watqapik kiturngaitaten una-llu umyuaqun teggalquq kiturngaunaku curukarlua. 53Agayutiin Abraham-aam Nahor-aam-llu+ cuqciiqaakuk.” Nutaan-llu cali Agayutem atrakun atami Isaac-aam qigcikekiikun Jacob-aam akqutni aturciqnia. 54Ungungssiarmek tuquciami elliitekaa ekuagarkauluku ingrimi, kelegluki-llu angutet malini neresqelluki. Nerumariameng tuani ingrim qaingani unugiut. 55Unuaquan Laban-aam melugarai tutgarani panini-llu, atawaqaasqelluki-llu; uterrluni-llu kingunerminun.

Yupik Bible

Yupik Bible © 2012 American Bible Society

More Info | Version Index