Search form

Genesis 32

Jacob-aam Upyutaa Pairtellerkaa Esau-m

1Jacob-aaq ayiimi pairkenguq an'gilainek Atanrem; 2Jacob-aam tangrramiki qanertuq, “Ukut Agayutem anguyagteklinii!” Taumek tauna aciraa, Mahanaim-aamek.+ 3Jacob-aaq-llu kevganek ciunermikun ayagceciuq Esau-mun anngarminun Edom-aami. 4Alerqurai-llu waten qanresqelluki: “Wiinga Jacob-aaq, kinguqliin niisngasten, uitaurallruunga Laban-aami una tekilluku. 5Ungungssiutengqertua qunguturanek ayuqenrilngurnek, pisterlua arnanek angutnek-llu; qanrucarturcetamken elluarrlua ciuniuresqellua.”

6Kevgat-llu utercameng Jacob-aamun qanertut, “Tangrrarput anngaan Esau, taiguq pairrsaagluten maligluni yuinarnek yuinarnek (400) angutnek.” 7Jacob-aaq-llu alingenga'artuq umyuassuugarluni; avgai-llu yuut ungungssiaraat-llu malruingurrluki. 8Umyuarteqluni, “Esau-m avgit tekiskaki piunrirluki-llu avgit qimagniartut.”

9Jacob-aaq-llu qanertuq, “Agayutiini atama Abraham-aam, Isaac-aam-llu, Ataneq, elpet qanrutellruarpenga utercesqellua nunamnun tungayamnun-llu, assirlua-llu piciqnilua. 10Wangni tunriukutnarquq kenkillren wangnek. Ayarumnek kiingan tegumiarlua qerallrukeka Jordan-aaq, waniwa-llu uterrlua avegluki malruingurrluki aulukaanka. 11Anirturnga amaqlimnek Esau-mek. Alingua elliinun curukaryukluta tuqutnaluta tamamta, arnartuumamta, mikelngurtuumamtaa-llu. 12Akqellruarpenga-ggem ca tamalkuan assirluku piciqniluku wangnun, cikirciqnilua-llu kinguverkamnek kia naaqesciigalkainek, imarpiim cen̄iin qau͡gyaitun amllertalrianek.”

13-15Tua-i qavartaraluni anngarmi Esau-m cikiutekainek quyurciuq, yuinarnek qulnek (200) qusngirngalngurnek arnacalunek, yuinaat-wa angucalut. Yuinarnek qulnek (200) qusnginek arnacalunek, qulen-wa angucalut. Yuinaq qulnek cipluku (30) ungungssinek qulugnelegnek piyagartuumaita, yuinaak malruk (40) kuluviit, qulen-wa angucaluit. Yuinaat arnacalut ciulviit qulen-wa angucaluit. 16Taukut avgai malruingurrluki qaunqescirluki pistem̄i ilagketnek, katngat allakaumavkarluki, qanrulluki-llu pisten̄i, “Ciunemteggun ayakici, katngat ciuqliit kinguqliitnek yaaqsigtu'rtelluki.” 17Ciuqliugarkat alerquagai, “Esau paireskuvciu, elliin-llu apeskaci, ‘Kia pistekaci? Natmun ayagceci? Kia pikaki makut ungungssit?’ 18Waten qanqici, ‘Kinguqlirpet Jacob-aam pikai; cikiutekai elpenun; kingumten̄i tayima yaaqsinrituq.’” 19Tuaten alerquagai kinguqliit katngat aulukestait, “Elpeci-llu alerquutma ayuqiinek Esau qanruskiciu paireskuvciu. 20Waten cali qanqici, ‘Jacob-aaq kingumteggun agiirtuq.’” Umyuarteqluni, “Cikiutenka tangerrluki umyuani cimiryuaraa, tangerqumni-llu assirlua ciuniuryuaraanga.” 21Tua-i cikiutekai ciunrakun ayagtut; ellii tau͡gaam tuani uitaluni qavartarvillermeggni.

Jacob-aam Callullra Peniel-aami

22Tuani unugmi makluni, nuliagni, nulirruagni, irniani-llu qerautai kuigkun Jabbok-aakun. 23Qerarcetraarluki akluni cali tamalkuita qeraucetai. 24Tau͡gaam Jacob-aaq kiimi uitaqerluni.

Tuani-llu angutem ullagluku callugaa kiituani erqaartuq. 25Angutem taum Jacob-aaq cirlakqatanritliniamiu tenglugaa iruan kangiakun aviqitelluku. 26Angutem taum qanrutaa, “Pegesnga erteqatalria-tang.”

Tau͡gaam Jacob-aam qanrutaa, “Atawaqerceskuvnga tau͡gaam pegciiqamken.”

27Taum qanrutaa, “Cauga atren?”

Kiugaa, “Jacob-aaruuq.”

28Tauna qanertuq, “Atren Jacob-aarungairutuq. Callullruuten Agayutmek yugnek-llu, anagkengluten-llu; taumek atqeciqan Israel-aaq.”

29Tua-llu Jacob-aaq qanertuq, “Qanrutqernga aterpenek.”

Tauna kiuguq, “Ciin at'ma caucianek apcia?” Tuani-llu atawaqercetaa.

30Tua-llu Jacob-aaq qanertuq, “Agayun tungaunaku tangellruaqa, tau͡gken cali unguvalua”; taumek tauna aciqii Peniel-aamek.+ 31Akerta pit'uq ayakanrakun Peniel-aamek, tussitelluku iruan kangian. 32Taumek maa-i cali Israel-aam yui neryuitelartut irum kangian kemganek, tuaggun Jacob-aam tengluumallra pitekluku.

Yupik Bible

Yupik Bible © 2012 American Bible Society

More Info | Version Index