Search form

Genesis 34

Callugluku Akusrarutekumallra Dinah-m

1Caqerluni Dinah Leah-m pania, Jacob-aamun irniangutellra, elalirtelliniuq arnanun Canaan-aarmiunun tamaani nunami. 2Shechem-aam-llu, Hamor-am Hivite-am qetunraan, nunami tamaani atanerruam, tangrramiu callugluku akusrarutekaa. 3Tau͡gaam nalluyagucesciigataa umyuamikun kenekluku cakneq, elliin-llu qarutaa kenegyagucetengnaqluni. 4Atani-llu qanrutaa, “Nulirrniarusnga taumek nasaurlurmek nuliqsagutniarqa.”

5Tua-i Jacob-aam nallunriraa panimi kasngunarqellriamek pimallra, tau͡gaam qetunrani maramelata nayurluki kuluviit, qaillun pinrituq uterrnatkaatnun. 6Shechem-aam-llu atiin, Hamor-aam, ullagaa Jacob-aaq qalarucarturluku, 7Jacob-aam qetunrai uterteqanratgun maramek. Niicamegteggu tatamut qenqerrluteng-llu, ciin waten Shechem-aaq picianek Israel-aam yui kasngunarqelriamek piluki, callugluku akusrarutekluku Jacob-aam pania. 8Hamor-aq qanertuq Jacob-aamun, “Qetunrama Shechem-aam kenkaa paniin. Nulirturcessgu taumek. 9Akqutmek taqutnaurtukuk yup'uk atunem nuliqsagutelararkaurtelluki. 10Nunamten̄i maani nani uitayullerpecen̄i uitaniartuci, tuneniarluci, kipulluci, nunautengluci-llu.”

11Tua-llu Shechem-aaq qanertuq Dinah-m atiinun anelgutainun-llu, “Piyulqa unakevkaquvciu camek piyullerpecen̄ek cikirciqamci. 12Qanrucia camek cikiisqumakuvci camek-llu nulirruciisqumacirpecen̄ek; wiinga cikirciqamci pisqumallerpecen̄ek nasaurluq tauna nulirqevkarciu wangnun.”

13Jacob-aam qetunrain kiugaat Shechem-aaq atii-llu usvituyarullukek, alqermeng Dinah-m kasngunarqelriamek pimallra pitekluku. 14Waten qanrutagket, “Wangkuta waten pisciigatukut, alqerput tunluku nuugiumanrilngurmun, kasngunarqelriaruan tamana wangkutni. 15Waten tau͡gaam pikuvci pivkarciqamceci; wangkucicetun angutet tamalkuita nuugiquvciki. 16Nutaan panimten̄ek nulirturcet'larciqamceci, wangkuta-llu panigpecen̄ek nulirturaqluta, nunalguteksagulluta ataucimurrluta yuuniartukut. 17Tau͡gaam niitenrilkuvcikut nuugirpek'naci panigput teguluku ayagciqukut.”

18Qanellrata ilukegcivkarakek Hamor-aankuk qetunraa-llu Shechem-aaq. 19Tan'gaurluq-llu tauna qarivkenani tuaten piyugtuq, Jacob-aam pania nuliqsuamiu. Ellii-llu takaqumanrulriaruuq ilamini.

20Hamor-aq qetunrani-llu aglutek nunarpamegnun iteryaramun qalarutakek angutet qanerlutek, 21“Ukut yuut yugnikaitkut, uitavkarnauput maani nunami tuneniartelluki, nuna man'a pivigtuuq. Nulirtularniartukut paniitnek, wangkuta-llu nulirturtelluki panimten̄ek. 22Atauciq tau͡gaam piyullerteng pikumteggu uitallguciryugaitkut ilaksagulluta; anguteput tamalkuita nuugircecesqelluki ellmegcecicetun. 23Akluit ungungssiarautait-llu piksaguciiqaput. Pisqellrat aturnaurput uitallgucirniaraitkut.” 24Taukut nunarpiit yuit maligarutut taukugnun Hamor-ankugnun Shechem-aaq-llu, angutet-llu tamarmeng nuugirtelluteng.

25Erenret pingayuatni taukut angutet nuugiumallret engellugtullratni, Jacob-aam malruk qetunraak Simeon-aankuk Levi-aq-llu, Dinah-m anngaagken, nuussirpatek pirraarluki nalluvkarlutek nunarpagnun iterlutek tuqurqakek tamalkuita angutet. 26Tuqutakek-llu Hamor-aankuk Shechem-aaq-llu, Dinah-llu Shechem-aam eniinek anulluku ayagluteng. 27Jacob-aam-llu qetunrain nunarpiit taukut uayaarait nayagarmeng menuurcimallra pitekluku. 28Teguit-llu ungungssiutait, kuluviit, ciulviit, cat-llu allat tamalkuita nunarpagni marani-llu uitalriit. 29Cait qununarqelriit teguit, tamalkuita-llu mikelnguit, nulirrit, enet-llu imait tamalkuita teguluki.

30Jacob-aam-llu qanrutak Simeon-aankuk Levi-aq-llu, “Picurlak wangnun tuc'etartek; waniwa Canaanite-at Perrizzite-at-llu yuut-llu tamarmeng tamatum nunam yuin eq'ukarkaurtaatnga. Ikgetukut wangkuta; quyurrluteng curukaqunegtekut piunrirciqaitkut tamamta.” 31Tau͡gaam elkek qanertuk, “Canrituq-qaa nayagarpuk akissutun pitarrluku pingraatgu?”

Yupik Bible

Yupik Bible © 2012 American Bible Society

More Info | Version Index