Search form

Genesis 35

Agayutem Atawaqercetaa Jacob-aaq Bethel-aami

1Agayutem qanrutaa Jacob-aaq, “Upluten egmian ayii Bethel-aamun uitaluten-llu tuani. Ekuavililuten-llu wangnun Agayutmun alairvikestellerpenun tuani qimallerpeni amaqlirpenek Esau-mek.”

2Jacob-aam ilani ellmini-llu uitalriit qanrutai, “Au͡g'arciki agayutnguat avalici; menuircarci ac'inqiggluci-llu. 3Upluta ayagnaurtukut Bethel-aamun, tuani ekuaviliniartua Agayutmun kiustellemnun nanikuallemni nayurlua-llu natmun tamiin ayallemnun.” 4Jacob-aamun-llu tunait tamalkuita agayutnguat avaliteng, aqliteteng-llu atuqeteng; Jacob-aam-llu elautai iirluki napam acianun Shechem-aam canianelngurmun.

5Tamaani pektaullratni Agayutem alingevkarai cakneq avaqliit yuut nunani, kingunrirturtaunateng-llu Jacob-aam yui. 6Jacob-aaq-llu tekituq malini-llu tamarmeng Luz-amun, maa-i nallunrilkiitnun Bethel-aaruluku Canaan-aami. 7Tuani-llu ekuavililuni nuna-llu acirluku Elbethel-aamek, tuani Agayutem alairvikellruani qimallermini anngarminek. 8Rebecca-m kevgiurtii Deborah tuquuq, tungmagtaat-llu napam acianun ungalalirnerani Bethel-aam. Taumek aterpagtellrukiit “Napaa Qiatem.”

9Agayutem alairvikenqigtaa Jacob-aaq atawaqertelluku-llu uterrnginanrani Mesopotamia-mek. 10Agayutem qanrutaa, “Atren Jacob-aaruuq, tau͡gaam aterpagtenrirciqaatgen Jacob-aamek Israel-aamek tau͡gaam.” Tua-i aterpagtelangaat Israel-aamek. 11Agayutem-llu qanrutaa, “Wiinga Agayutnguunga Artuqailnguq: Irnialingkina. Atanruviit kinguvarciqut elpenek, ciuliaqeciqaatgen-llu angayuqat. 12Nuna cikiutekelqa Abraham-aamun Isaac-aamun-llu elpenun cikiutekciqaqa kinguverpenun-llu.” 13Nutaan-llu Agayutem unitaa. 14Tuani-llu Agayutem qalarusvillrani Jacob-aaq naparciuq teggalqumek umyuaqutkauluku, kencignarcaraa-llu qainganun kuvevikluku wine-amek olive-aat-llu uquatnek. 15Jacob-aam aciraa tauna Agayutem qalarvillra ellminun Bethel-aamek.

Rachel-aam Tuqullra

16Ayagtut Bethel-aamek, yaaqsigluku-llu cali Ephrath-aaq Rachel-aaq teggiurciuq cakneq au͡gtarnaqluni. 17Teggiurcian cakneq irnivkartekaan qanrutaa, “Alingevkenak, allamek cali qetunrangqatartuten.” 18Yuucimi-llu unisnginanrani (tua-i tuani tuquami) aciraa Benoni-mek,+ tau͡gaam atiin aciraa Benjamin-aamek.+

19Rachel-aaq tuquuq tungmagcimaluni-llu Ephrath-amun (tauna Bethlehem-aaruuq) tumyaram canianun. 20Jacob-aaq-llu teggalqumek naparciuq umyuaqutmek, tauna-llu cali uitauq man'a engelkarrluku. 21Jacob-aaq cali ayagtuq arulairluni-llu yaatiinun qertulriartaan Eder-aam.

Jacob-aam Qetunrai

22Jacob-aaq uitallrani tamaani nunami Reuben-aam akusrarutekaa Bilhah atami nulirruara; Jacob-aam-llu tuaten pillra niilluku cakneq qenertuq.

Jacob-aaq qetunrangqertuq qula malrugnek cipluku. 23Leah-m qetunrai: Reuben (Jacob-aam yung'eqarraarutii), Simeon, Levi, Judah, Issachar, Zebulun-aaq-llu. 24Qetunrai Rachel-aam: Joseph-aaq Benjamin-aaq-llu. 25Bilhah-m qetunrai Rachel-aam pistiin: Dan-aq Naphtali-llu. 26Zilpah-m qetunrai Leah-m pistiin: Gad-aq Asher-aaq-llu. Ukut waniwa Jacob-aam irniari yuurtellret Mesopotamia-mi.

Isaac-aam Tuqullra

27Jacob-aaq tekituq ataminun Isaac-aamun Mamre-mi wall'u Kiriatharba-mi (Hebron-aami-wa), Abraham-aankuk Isaac-aaq-llu uitavikellragnun. 28Isaac-aaq unguvallruuq allrakuni yuinarni pingayunlegni (160) 29tuquluni-llu ak'allaq'apiaraurrluni; qetunraagken-llu Esau-nkuk Jacob-aaq-llu tungmaggluku.

Yupik Bible

Yupik Bible © 2012 American Bible Society

More Info | Version Index