Search form

Genesis 40

Joseph-aam Nalqigtai Itertak Qavangukek

1Tamatum kinguani kevgiurtiin Egypt-aam angayuqran kelipistiin-llu umyugaa navgaak. 2Egypt-aam angayuqran qenrutak kelipisten̄i kevgiurten̄i-llu angayuqrulriik. 3Iterrlukek-llu eniinun qaunqestet ciuqliata Joseph-aam itengqavianun. 4Ak'anun taukuk itengqauk, qaunqestet-llu ciuqliata Joseph-aamun kevgiurcetak.

5Unugmi ataucimi taukuk qavangurturtuk, qavangukek-llu ayuqenrilngurnek nalqiguterlutek. 6Joseph-aam ullallermini unuakumi elpekak camek umyuarniurlutek. 7Aplukek-llu, “Qaillun pilriatek kanangllugcetek unuamek?”

8Taukuk qanrutaak, “Qavangurtullruukuk, kitumek-llu pitaituq qavangumegnuk nalqigcestekaanek.”

Joseph-aam kiugak, “Agayun nalqigciyugngavkarilartuq qavangunek, qanrutegnga qavangurpetegnek.”

9Kevgiurtet ciuqliata qavanguni Joseph-aamun qanemcikaa qanerluni, “Qavangumni tangertua wine-arkam avayaanek, 10tauna-llu pingayunek avayarluni. Cuyangami egmian naunrai naugut atsaurrluteng wine-arkauluteng ak'a qecugnariluteng. 11Wiinga-llu angayuqam saskaanek tegumiarlua; tegullua atsanek mecuiriunga saskam iluanun, tunluku-llu elliinun.”

12Joseph-aaq qanertuq, “Qavangun waten ayuquq: pingayun avayat erenruut pingayun. 13Ernerni pingayuni angayuqam itengqanrirceciiqaaten ataam-llu calian caliaqsagutelluku, ciungani-llu pilaucirpetun angayuqaq merkaanek payugtelarciqan. 14Tau͡gaam umyuaqekia elluiluten uitakuvet, takumcuklua qanrutkekia angayuqamun, maaken anevkarniaraanga. 15Ilumun teguarullruunga Hebrew-t nuniitnek. Maani-llu camek piksauni itengqatkamnek.”

16Kelipistet ciuqliata niicamiu qavangum ayuqucia niitekegcinaqluku, qanertuq Joseph-aamun, “Wiinga-llu qavangurturtua issratet pingayun qamiquma qainganlluteng. 17Qullik'acagiit imarluni ayuqenrilngurnek kelipanek angayuqam neqkainek, tau͡gaam yaqulget nerait kelipat qamiqumni issratem iluani uitalriit.”

18Joseph-aam qanrutaa, “Qavangun waten ayuquq: taukut assigtat pingayun pingayuugut erenret. 19Ernerni pingayuni Egypt-aam angayuqran anevkarciqaaten, qamiqun-llu kepraarluku temen agarrluku napalriamun, tuani-llu yaqulget kemgen nerluku.”

20Erenret taukut pingayuatni Egypt-aarmiut angayuqrat anutiirtuq, nerevkariluni-llu kelegluki pisten̄i tamalkuita. Wine-anek kevgiurten̄i kelipistet-llu ciuqliat itercivigmek anevkarak atanerruami ciuqerratnun. 21Wine-anek kevgiurtem̄i caliara ataam elliinun caliaqsagucetaa, 22tau͡gaam agartaa kelipistet ciuqliat Joseph-aam qanellruciatun. 23Taum-llu wine-anek kevgiurtem Joseph-aaq umyuaqeqaqsaitaa, tua-i nalluyagulluku.

Yupik Bible

Yupik Bible © 2012 American Bible Society

More Info | Version Index