Search form

Genesis 46

Jacob-aaq Ilani-llu Egypt-aamun Ayagtut

1Jacob-aaq ayagtuq pini tamalkuita ayaulluki, Beershebah-mun-llu tekicami ekuagiuq Agayutiinun atami Isaac-aam. 2Unugmi tangrruartelluku Agayutem qanrutaa Jacob-aaq qanerluni, “Jacob! Jacob!” Ellii kiuguq, “Waniwa wantua.”

3Agayun qanertuq, “Agayutnguunga atavet Agayutii. Alingyaqunak ayallerkarpenek Egypt-aamun; cakneq yugyangevkarciqamken. 4Maligciiqamken Egypt-aamun, cali-llu kinguveten ataam maavet nunamun ut'rutarkauluki. Joseph-aam nayurciqaaten tuqukuvet.”

5Jacob-aaq-llu ayagtuq Beersheba-mek. Qetunrain-llu ayautaat ataseng, nuliateng-llu irniartuumaita qamuruatgun akalrialegteggun Egypt-aarmiut angayuqrata ayaucetellrikun ekumavikesqelluki. 6Kuluvauteteng malikait akluteng-llu tamalkuita unakelteng Canaan-aami, ayagluteng-llu Egypt-aamun. Jacob-aam malikellrui kinguveni tamalkuita: 7qetunrani, tutgarani tan'gaurluut, panini tutgarani-llu nasaurluut.

8Waniwaugut ukut kinguvri Jacob-aam Egypt-aamun ayallermini malikellri: Reuben-aaq Jacob-aam ciuqlikacaaq qetunraa, 9Reuben-aam-llu qetunrai: Hanoch, Pallu, Hezron, Carmi-llu. 10Simeon-aam qetunrai: Jemuel, Jamin, Ohad, Jachin, Zohar, Shaul-aaq-llu Canaan-aarmium arnam qetunraa. 11Levi-am qetunrai: Gershon, Kohath, Merari-llu. 12Judah-m qetunrai: Shelah, Perez, Zerah-llu. (Jacob-aam allak qetunraak Er-ankuk Onan-aaq-llu tuqullrulutek Canaan-aami.) Qetunraak-llu Perez-am Hezron-aaq Hamul-aaq-llu. 13Issachar-am qetunrai: Tola, Puah, Jashub, Shimron-aaq-llu. 14Zebulon-aam qetunrai: Sered, Elon, Jahleel-aq-wa. 15Ukut waniwa Leah-m qetunrai Jacob-aakun Mesopotamia-mi, pania-wa cali Dinah. Tamarmeng kinguvri Leah-kun amllertaut yuinaq qula pingayunek cipluku (33).

16Gad-am qetunrai: Zephon, Haggi, Shuni, Ezbon, Eri, Arod, Areli-llu. 17Asher-aam qetunrai: Imnah, Ishvah, Ishvi, Beriah, Serah-wa nayagaat. Beriah-m-wa qetunraak Heber-aankuk Malchiel-aaq-llu. 18Ukut akimiaq ataucimek cipluku kinguveqai Jacob-aam Zilpah-kun. Una pista cikiutekellrua Laban-aam paniminun Leah-mun.

19Rachel-aam-wa, Jacob-aam nulirran, qetunraak Joseph-aankuk Benjamin-aaq-llu. 20Joseph-aaq-llu irniangellruuq Egypt-aami Manasseh-mek Ephraim-aamek-llu. Aanalutek Asenath-aamek Potipher-aam agayulirtem Heliopolis-aami panianek. 21Benjamin-aam qetunrai: Bela, Becher, Ashbel, Gera, Naaman, Ehi, Rosh, Muppim, Huppim, Ard-aq-wa. 22Ukut Rachel-aam qetunraqai Jacob-aakun, akimiarunritarauluteng.

23Qetunraa Dan-am: Hushim. 24Naphtali-m qetunrai: Jahzeel, Guni, Jezer, Shillem-aaq-llu. 25Ukut malrunlegen qetunraqai Bilhah-m, Laban-aam cikiutekellran Rachel-aamun paniminun.

26Jacob-aam nakmiin kinguvri Egypt-aamun ayallret, ilakevkenaki Jacob-aam qetunrain nulirrit, amllertaut yuinaat pingayun arvinlegnek cipluku (66). 27Joseph-aam-llu qetunraak Egypt-aami malruulutek. Yuinaat pingayun qulnek cipluku (70) amllertaluteng Jacob-aam ilai Egypt-aamun ayallret.

Jacob-aaq Ilani-llu Egypt-aami

28Jacob-aam Judah ciumegteggun ayagcetaa qanrutesqelluku Joseph-aaq pairrsaagesqelluteng Goshen-aami. Tuavet tekicata, 29Joseph-aam ayagassuutni upluki pairrsaagaa atani Goshen-aami. Tangrrucamek Joseph-aam uyaqurrikun atani akuqerluku ak'anun aluviliurtuq. 30Jacob-aam qanrutaa Joseph-aaq, “Nutaan kitaki tuqukilii tangrrumarillemni unguvaluten.”

31Joseph-aaq qanertuq anelgutminun ilaitnun-llu, “Egypt-aam anga­yu­qra Pharaoh qanrucartuqata'rqa anelgutenka atama-llu ilai Canaan-aami uitallret tainiluki wangnun. 32Qanruciiqaqa qusngiliurten͞guniluci ungungssinek aulukilriaruniluci ungungssiuceci-llu taitniluki, akluci-llu tamalkuita. 33Pharaoh-m taisqekaci apluci-llu camek caliangqerrucirpecen̄ek, 34pinritevkenaku qanrutniarci piyugngarirraanerpecen̄ek aulukilriaruniluci ungungssiarnek ciuliarpecetun. Tamana nallunriquniu uitavkarciqaaci Goshen-aam nuniini.” Joseph-aam waten qanrutai Egypt-aarmiunun qusngiliurtet pellernarqelriatun ayuqngata.

Yupik Bible

Yupik Bible © 2012 American Bible Society

More Info | Version Index