Search form

Genesis 47

1Joseph-aam maligluni tallimanek anelgutminek anga­yu­qaq ullagaa qanrulluku-llu, “Ataka anelgutenka-llu katngauteteng ang'aqluki akluteng-llu taigut Canaan-aamek, waniwa-llu uitaluteng Goshen-aam nuniini.” 2Talliman-llu taukut anelgutni ullautai anga­yu­qamun. 3Pharaoh-m Joseph-aam anelgutai aptai, “Camek caliangqerceci?”

Taukut kiugaat, “Wangkuta ciuliamcetun qusngiliurten͞guukut. 4Maani nunami uitayarturtukut, Canaan-aam nuniini piitnaq anagucan katngauteput neqkaitelartut. Uitavkaasqumayaaqukut Goshen-aam nuniini.” 5Tua-llu Pharaoh-m Joseph-aaq qanrutaa, “Atavet anelgutvet-llu ullagaatgen. 6Egypt-aami assinkacagiini nunam piyullermeggni nunaliyugngaut. Uitavkarki Goshen-aam nuniini; ilangqerqata-llu piyugngalrianek kuluvautemnek aulukivkarniaten.”

7Joseph-aam-llu atani taitaa itrulluku-llu Pharaoh-m ciuqerranun. Jacob-aam-llu atawaqaasqaa Egypt-aarmiut anga­yu­qrat. 8Pharaoh-m aptaa Jacob-aaq, “Qaillun pitalriamek yuullrurcit?”

9Jacob-aam kiugaa, “Allrakuni yuinarni arvinlegni qulnek cipluku (170) yuullrurtua. Ikgetut nangteqnaqluteng-llu allrakut atullrenka, ayuqsugnaunateng unguvamallracetun ciuliama tarratellermeggni.” 10Jacob-aam cali atawaqercetraarluku an'uq anga­yu­qam eniinek. 11Tua-i Joseph-aam atani anelgutni-llu nunalgartai cikirluki nunam assinqurranek Egypt-aami, nunarpiim Rameses-aam yaaqsinrilkiini, atanrem alerquuciatun. 12Joseph-aam-llu neqkaitnek cikirai atani ilai-llu aulukaarit cuqekluki.

Piitnaq

13Neqkartaitellruuq nuna tamarmi piitnaq anagucan, yuut-llu Egypt-aami Canaan-aami-llu kaillrata piniarulluki. 14Neqkanek kipuqurallratni Joseph-aam quyurrluki akit tamalkuita anga­yu­qam eniinun qemagtai. 15Egypt-aarmiut Canaan-aarmiut-llu akikateng nangengata Egypt-aarmiut Joseph-aaq ullagaat qanrulluku-llu, “Neqkamten̄ek cikirkut! Tuquvkaryaqunata, akikairutukut!” 16Joseph-aam kiugai, “Ungungssiarauceci taiciki neqkanun navrutnianka akiutairuskuvci.” 17Ungungssiarauteteng tua-i taitait Joseph-aamun, elliin-llu naverrluki neqkanun horse-aat, qusngit, qusngirngalnguut, kuluviit ciulviit-llu. Tuani allrakumi neqkangqercetai navrulluki tamalkuitnun ungungssiarautaitnun.

18Allrakuq tauna pelluan, alla-llu ayagnirluni, yuut ullagaat Joseph-aaq qanrulluku-llu, “Aassaqusngaitamteggen akiutairuyucimten̄ek, ungungssiarauteput-llu tamalkuita piksagutaten. Camek allamek akikairutukut wangkutnek tau͡gaam nunautemten̄ek-llu. 19Tuquvkaryaqunakut, nunauteput yuirtelluki! Kipuskut nunauteput-llu, neqkanek akilirluta. Pharaoh-m wangkuta pistekniaraakut, nunauteput-llu piksagulluki. Cikirkut mukaarkanek unguvaniartukut, naucetaarkanek-llu nauceciiniartukut naucetaarvimteggun.”

20Tua-i Pharaoh Joseph-aam kipuyutaa Egypt-aam nuniinek tamalkuan. Egypt-aarmiut-llu tamarmeng nunauteteng tunait qunukeng'e'rmegteki arenqialan anagulluni piitnaq; nuna-llu tamalkuan atanrem piksagulluku. 21Joseph-aam-llu pisten͞gurtai Egypt-aam yui tamalkuita. 22Nunautait agayulirtet kiingita kiputenritai, camek tun'inarqenrilata anga­yu­qam yuutekaitnek cikilaateng. 23Joseph-aam yuut qanrutai, “Atam waniwa kiputellrurtamci nunautetuumarpeci anga­yu­qamun piksagutelluci. Waniwa-llu naucetaarkat nauceciigarkaci naucetaarvigpecen̄un. 24Quyurciyaram nalliini anga­yu­qaq cikilararkaugarci quyurtellerpeci avenrita tallimaingitnek. Ilakuat elpeci irniartuumarpeci pikarkauluki neqkaqluki naucetaarkaqluki tuaten.”

25Yuut qanertut, “Elpet tuquvkanritarpekut; assirluta-llu piuraavkut pisten͞gurciiqukut anga­yu­qamun.” 26Joseph-aam alerquutngurtaa nuniini Egypt-aam yuum quyurtaarin naucetaat avenrita tallimaingit anga­yu­qam pikarkauluki. Tamana-llu alerquun maa-i cakaniqsaunani. Agayulirtet tau͡gaam nunautait kiingita piksagutenritai atanrem.

Jacob-aam Nangneq Piyuutii

27Israelite-at uitaut Egypt-aami Goshen-aam nuniini; tuani tukuurtut, irnialingameng-llu yugyangluteng. 28Jacob-aaq-llu uitallruuq Egypt-aami akimiaq malrugnek cipluku allrakuni; tapeqluki allrakungluni yuinarnek malrunlegnek malrugnek cipluku (147). 29Tuqullerkani Jacob-aam canimellian, taisqaa qetunrani Joseph-aaq qanrulluku-llu, “Unateten elliluki qugtuqagma akuliignun, navgarkaqenrilkevnek-llu akqi tungmaggngaitnilua Egypt-aami. 30Tungmacimayugtua ciuliama nuniitnun; ayauskia Egypt-aamek tungmagglua-llu tungmagcimallrata nuniitnun.”

Joseph-aam kiugaa, “Pisqellerpetun piciqua.”

31Jacob-aam pia, “Kitaki ukvernarcari wangnun.” Tua-i ukvernarcariuq Joseph-aaq, Jacob-aaq-llu quyaluni piicagtuq tuani inglemini.

Yupik Bible

Yupik Bible © 2012 American Bible Society

More Info | Version Index