Search form

Genesis 50

1Joseph-aaq-llu aluviliurtuq melugarluku tuaten atani. 2Alerqurai-llu pisten̄i yungcaristet temii Jacob-aam uptesqelluku tungmagcimallerkaanun. Tua-i yungcaristet tuaten piat. 3Ernerni yuinaagni malrugni (40) upciyaraulartuq tungmagtarkanek. Egypt-aarmiut-llu qiatekaat Jacob-aaq ernerrluteng yuinaat pingayun qulnek cipluku (70).

4Tuqullermek qiatekiyararteng pelluan Joseph-aam qanrutai angayuqam atanerruari, “Angayuqaq qanrucarturciu waten: 5‘Ataka tuquniararluni akqevkallruuq tungmagcesqelluni qungumun uptellerminun Canaan-aami. Ayagcessnga tungmagcarturluku ataka, tungmagcimarikumku uterrniartua.’”

6Anga­yu­qaq kiuguq, “Tungmagcarturru aatan akqellrucirpetun.”

7Tua-i Joseph-aaq ayagtuq tungmagcarturluku atani. Tamarmeng anga­yu­qam atanerruarin, ciulirneret-llu atanruviani Egypt-aam tamalkuan nuniini, maligtaat Joseph-aaq. 8Ilain anelgutain-llu tamarmeng maligtaat. Mikelnguut tau͡gaam ungungssiaraat-llu Goshen-aami uitaqerluteng. 9Yuut ekumassuutetgun horse-aatgun cali maligtait; yugugaullruut ayallermegni.

10Atad-aami calaralirnerani Jordan-aam mukaarkanek caranglluirivigmun tekicameng aluviliurtut ak'anun, Joseph-aam-llu tungmagciqatarqameng cayarateng ernerni malrunlegni aturai. 11Canaan-aarmiut tangrramegteki yuut taukut angniilnguut Atad-aami qanertut, “Man'a ukut angniilutiit angelriaruyugnarquq Egypt-aarmiunun!” Taumek tauna angniilvillrat acillruat Abel Mizraim-amek.+

12Jacob-aam qetunrai alerquumacimegcetun elliinek pillruut; 13ayaulluku temii Canaan-aamun tungmaggluku-llu qerranqumun Machpelah-mi Mamre-m calaralirnerani naucetaarvigmi kiputellrani Abraham-aam Ephron-aamek Hittite-amek qungurvigkauluku. 14Joseph-aam atani tungmagcimariamiu utertuq Egypt-aamun anelgutni-llu, maligcestellni-llu tamalkuita tungmagciyartullermini.

Joseph-aam Caceturqaurai Anelgutni

15Joseph-aam anelgutai ataseng tuquan qanertut, “Aipaagni Joseph-aam cali eq'ukaakut piyukuni-llu akinaurciqaakut.” 16Taumek kevgamek ayagceciut Joseph-aamun qanresqelluku, “Aatan alerquillruuq tuquvailegmi 17aptesqelluten, ‘Kaigavikamken au͡g'aritesqumaluki anelguteten, assiitellriamek tungevnun pillruata.’ Taumek wangkuta, pistaini atavet Agayutiin, au͡g'aritesqelluta kaigaukut assiitellriamek elpenun pillemten̄ek.” Joseph-aaq ilutequq tuaten qanrutellratni.

18Anelgutain-llu tungaunateng ulliimegteggu ciuqerranun cikluteng piut, “Wangkuta-llu pistekikut.”

19Tau͡gaam Joseph-aam qanrutai, “Alingenrici; Agayucetun-qaa wiinga pitaunga? 20Elpeci assiilngurmek pillerkiullruuci wangnun, tau͡gaam Agayutem mumigtaa assiilnguq pillerci assilriarurrluku, yuut amlleret unguvasqelluki watua. 21Taumek alingenrici. Wiinga aulukciqamci irniaci-llu.” Tuaten caceturqaurai qarulluki.

Joseph-aam Tuqullra

22Joseph-aaq uitauq Egypt-aami atami ilainek ilaluni. Joseph-aaq-llu unguvauq allrakungluni yuinaat talliman qulnek cipluku (110). 23Unguvallruuq tangllerminun Ephraim-aam irniari tutgarai-llu. Irniari-llu Machir-am, Manasseh-m qetunraan, cali yuurtellruluteng unguvainanrani. 24Anelgutni qanrutai, “Tuqullerkaqa tekitaqa, tau͡gaam Agayutem pinritevkenani aulukciqaaci maaken-llu nunamek anulluci ayaulluci-llu nunamun akqutkellerminun Abraham-aamun, Isaac-aamun, Jacob-aamun-llu.” 25Joseph-aam-llu yun'i akqut'lisqai qanerluni, “Akqicia Agayutem ayauskaci tuavet nunamun temka malikeciqniluku.” 26Joseph-aaq tuquuq Egypt-aami allrakungluni yuinaat talliman qulnek cipluku (110). Uptaat-llu tungmagcimallerkaanun temii, caqugkenun-llu ekluku.

Yupik Bible

Yupik Bible © 2012 American Bible Society

More Info | Version Index