Search form

Leviticus 1

Elliitet Tuqutarkat Tamalkuucirmegcetun Ekuagarkat

1Atanrem qayagauraa Moses-aaq qalarulluku-llu Pelatekaanek Atanrem tuanlucian qanerluni, 2“Qalaruski Israel-aam yui qanrulluki: Ilasi taicikuni elliitekaminek Atanermun taiciarkauguq kuluvagmek, qusngimek wall'u qusngirngalngurmek tamaaken ungungssiutminek. 3Elliitii elliitngukan ekuagarkauluku katngagnek, elliigarkauguq angucalumek natlugnerilngurmek; cikiutekarkaugaa-llu amiigani Pelatekaan Atanrem tuanlucian, Atanermun ciuniuresqelluni. 4Taicillrem unatni elliarkaugai qamiqurranun ekuagarkauluni elliitngullrem, tauna-llu ciuniurumaarkauguq taum assiilnguinun au͡g'aritekauluni. 5Taicillrem tuqutarkaugaa angucaluq kuluvak ciuqerrani Atanrem. Aaron-aam-llu tua-i qetunrain agayulirten͞gulriit iluvautarkaugaat auga Atanermun, ciqertaulluku-llu avatainun ekuaviim, canianelnguum amiigan Pelatekam. 6Amiirraarluku ukliciqaa, 7qetunrain-llu Aaron-aam muragnek ellilarirraarluteng ekuavigmun kumarciiqait. 8Aaron-aam-llu qetunrain agayulirtet elliarkaugait uklimalriit ungungssim kemgi, tapeqluki qamiqurra uqui-llu. 9Elliitekestellrata erurarkaugai qilui irui-llu mermek, nutaan-llu agayulirtem ekuagarkauluki tamalkuita, elliitnguluni narniqluni ilukegcinaqluni-llu Atanermun.

10“Elliikuni ekuagarkamek katngagnek qusngimek wall'u qusngirngalngurmek, elliigarkauguq angucalumek natlugnerilngurmek. 11Atanrem-llu ciuqerrani tuqutarkaugaa negeqvalirnerani ekuaviim, Aaron-aam-llu qetunrain agayulirten͞gulriit ciqertautarkauluku auga avatiinun ekuaviim. 12Taum elliitekestellran ukliciqaa ilakarkaulukek-llu qamiqurra uqua-llu, agayulirtem-llu tungliqu'urluki elliarkauluki qaingatnun muriit ekualriit ekuaviim qaingani. 13Tau͡gaam qilui irui-llu erurarkaugai mermun. Agayulirtem-llu tamalkuan cikiutekarkaugaa ekualuku ekuavigmi; ekuagarkauluni elliitnguuq ilukegcinaqluni narniqluni-llu Atanermun.

14“Kia-llu imum elliitekaa Atanermun yaqulgukan ekuagarkauluku, tua-i taitarkauguq yaquleyagaagnek, turtledove-agnek wall'u pigeon-aagnek. 15Agayulirtem̄un-llu agutarkaugaa yaqulek ekuavigmun qamiqurra-llu qecuggaarluku ekualuku. Auga-llu maqevkarluku qacarneranun ekuaviim. 16Yaqulgem-llu kallakutaa au͡g'arciqaa ilakluki melqurri, canianun-llu ekuaviim elliluki calaralirneranun, uitaviatnun qamlleret. 17Tua-i-llu yaquakun teguluku allegciqaa tau͡gaam avegpek'naku. Agayulirtem-llu ekuaciqaa qaingani ekuaviim. Elliitnguuq ekuagarkauluni narniqluni ilukegcinaqluni-llu Atanermun.

Yupik Bible

Yupik Bible © 2012 American Bible Society

More Info | Version Index