Search form

Leviticus 10

Assiilngillrak Nahab-am Abihu-m-llu

1Nahab-ankuk Abihu-llu, qetunraak Aaron-aam, teguluki kenliurcuutetek imirakek kumalrianek kangiplugnek, aruvagkamek-llu tepkegcilriamek kangiplugnun elliilutek cikiutekaak Atanermun. Tau͡gaam keneq tanqilriarunrituq, tua-i-wa Atanrem alerqullrunrilatek tuaten pisqellukek. 2Alqunaq-llu Atanrem ekuallagcetak, tuqulutek-llu tuani ciuqerrani Atanrem. 3Moses-aam tua-i Aaron-aaq qanrutaa, “Waniwa una Atanrem qanrutkellra waten qanllermini, ‘Kevgiulriit wangnun qigcikarkaugaat tanqilriaruciqa; wiinga-llu nasvagciqaqa ucurnarquciqa yumnun.’” Aaron-aaq-llu camek qanerpek'nani.

4Moses-aam-llu qayagaurak Mishael-aaq Elzaphan-aaq-llu, qetunraak Uzziel-aam, angiin Aaron-aam, qanrullukek-llu, “Taitek anullukek-llu temkek anelgutevtek Pelatekamek Agayuvigmek, ayaullukek-llu elatiitnun nunat.” 5Tua-i tailutek akluken'gun tegulukek tuqumalriik ayautagkek elatiitnun nunat Moses-aam pisqellracetun.

6Moses-aam tua-i qanrutaa Aaron-aaq qetunraak-llu Eleazar-aaq Ithamar-aq-llu, “Nuyavliluci piyaqunaci aturaci-llu allgurpek'naki tuquilriacetun, tuquyuartuci; Atanrem eq'uqrucuarai yuut tamalkuita. Tau͡gaam ilavci Israel-aam yuin qiateksugngaagket Atanrem kenerkun piunrillrek. 7Pelatekam amiiga unicaqunaciu, tuaten pikuvci tuquciqngavci, tua-i-wa allakaumiivci Atanrem caliaranun uqumek minguumallerpeciuggun.” Moses-aam-llu pisquciatun piut.

Agayulirten̄un Picirkiutet

8Atanrem-llu qalarutaa Aaron-aaq qanerluni, 9“Elpet wall'u qetunraten Pelatekamun Agayuvigmun itrarkaunrituci mer'arraarluci wine-amek wall'u allamek kemninarqellriamek, tuaten pikuvci tuquyuartuci. Kinguverpeci tamarmeng aturarkaugaat una alerquun akwarpak. 10Elpeci-llu nallunritarkaugaci allakaumallrat cat tanqilriaruluteng allanek canek yuut atulaq'ngaitnek, wall'u cam menuircaumallra wall'u cam menuulriarullra. 11Elicungcalararkaugaci-llu Israel-aam yui tamalkuitnek alerquutnek Atanrem qanrutkellrinek ellaitnun Moses-aakun.”

12Moses-aam-llu qanrutaa Aaron-aaq qetunraak-llu kingunrulriik, Eleazar-aaq Ithamar-aq-llu, “Ilakuara mukaarkam elliitngullrem ekualuku, teguluku nerkiciu quuleciraunaku ekuaviim caniani kenciknarqeqapigtellriaruan. 13Kencignarqellriami ner'arkaugarci, elpet qetunrarpet-llu pikngavciu ekualuteng elliitnek Atanermun, tuaten alerquumallruama. 14Tau͡gaam qat'gat iruit-llu elliitekumallernek Atanermun elpet, qetunrarpet, nakmiin-llu ilavci, nerlarciqaci menuilnguum nuniini, tamakut pikngavciki ilakuyucimun elliitaitnek Israel-aam yuin. 15Kingulirneq kanagaq qat'gat-llu taitelarciqait tapeqluki uqunun neqkanun-llu elliitmeggnun Atanermun. Ukuk ungungssim temiin ilak pik'lararkaugaci, elpet irniarpet-llu nangyuilngurmek, Atanrem alerqullruciatun.”

16Wani Moses-aam cumiggluni apqaurutkaa qusngirngalnguq elliitnguarkaulleq assiilnguum au͡gautekaanun. Nallunriami-llu ak'a ekuamallranek qenqerrutak Eleazar-aankuk Ithamar-aq-llu, qanerluni, 17“Ciin nerellrunricet'gu assiilnguum au͡gautekaanun elliitngulleq kencignarqellriim nuniini? Kencignarqeqapigtellriaruuq cikiutekumallruluni-llu elpetegnun Atanermek ukut yuut assiilnguit au͡gaumasqelluki. 18Auga itrucimallrunrilan Pelatekamun Agayuvigmun qigcignarqellriamun pinritevkenatek ner'arkaullruyaaqertek kencignarqelriim nuniini, wiinga alerqullrucimtun.”

19Aaron-aam-llu tua-i qanrutaa Moses-aaq, “Unuamek-wa elliitekellrukiit assiilnguum au͡gautekaanun elliin ekuagarkaq-llu, tau͡gken tuaten pingraata assiitellriit makut wangnun tull'uteng. Unuamek-qaa nerellrukumku assiilnguum au͡gautekaanun elliitngulleq akurtuyunaqsartuq-qaa Atanermun?” 20Moses-aam-llu man'a niicamiu cangalliunrirtuq.

Yupik Bible

Yupik Bible © 2012 American Bible Society

More Info | Version Index