Search form

Leviticus 11

Ungungssiaraat Neryunarqelriit

1Atanrem qanrutak Moses-aankuk Aaron-aaq-llu, 2“Qanruskitki Israel-aam yui: Makut maa-i unguvalriit nerlararkaci nunam ungungssiinek. 3Cetumqulget avcimalrianek igglermeggnek-llu anciluteng tamuanqigcitulit ilakait neryugngakevci. 4Tau͡gaam ilait igglermeggnek anciluteng tamuanqigtetungraata cetumquit-llu avcimangraata nerlarngaitaci; qulugnelget ungungssit igglermeggnek anciluteng tamuanqigtetunge'rmeng cetumquit avcimanrilata menuulriaruut elpecen̄un. 5Qiurmiutaat uiret menuulriaruut elpecen̄un, igelteng anlluki tamuanqigtetunge'rmeng cetumquit avcimanrilata. 6Qayuqeggliq-llu igellni anlluku tamuanqigtetungraan cetumqui avvinganrilata, menuulriaruuq elpecen̄un. 7Sitiinkaat cetumquit avcimayaaqut tau͡gaam igelteng antenqiggluki tamuanqigcuunaki, menuulriaruut cali elpecen̄un. 8Kemgit makut nerngaitaci, tuqumalriit-llu temait agturngaunaki; elpecen̄un menuurutnguarkaungata.

9“Makut-llu maa-i cali neryugngaaci mermiutaat: Mermi papsalqulget qeltelget-llu imarpigmiutaungraata wall'u kuigmiutaungraata. 10Tau͡gaam imarpigmelnguut wall'u kuigni papsalquilnguut qeltaunateng-llu ner'arkaunritaci. 11Umyuartequskiciki tamakut menuulriaruluki. Neryaqunaciki agtuqsaunaki-llu nalanret. 12Tamarmeng mermelnguut papsalqurrilnguut qeltailnguut-llu menuulriaruciqut elpecen̄un.

13-19“Makut-llu maa-i yaqulget ner'arkaqenrilkeci: Yaqulegpiit meterviit, iggiayulit, eskaviat, qakurtat, tulukaruut, naruyat, unuirat-llu. (Makut-llu maani tangssuilkeput: buzzards, vultures, ostriches, storks, herons, pelicans, hoopoes, bats.)

20“Tamarmeng-llu ciissit yaqungqellriit menuulriaruut. 21Qecngaatulit tau͡gaam. 22Makuni pet'ngertayulit, crickets, grasshopper-aat-llu tau͡gaam neryugngaaci. 23Tamarmeng allat ciissit yaqungqellriit cetamanek ipilget menuulriaruut.

24-28“Kia imum agtuquniki makut ungungssit tuqumalriit menuugarkauguq atakurvianun: Tamalkuita cetumqulget, cetumqurrit tau͡gaam avgumakata igglerteng-llu anlluku tamuanqigtetulit; tamarmeng-llu cetamanek ipilget it'garluteng. Yuum tegulallrukuniu tamakut iliita tuqumaluku temii, erurarkaugai aturani, ellii tau͡gaam menuugarkauluni atakuq tekilluku.

29-30“Makut cali quyungqatuluteng pitulit ilait menuulriaruut elpecen̄un: Narullgit, avelngaat, ciissirpagngalnguut ayuqait-llu, gecko, crocodile, lizard, chameleon-aat-llu. 31Yuum agtuquniki tamakut wall'u tuqumalriit temait menuugarkauguq atakullranun. 32Tuqulriit-llu iqullermeggni agtullrat menuurtarkauguq: muraunger'mi, 'lumarraunge'rmi, amiunger'mi, caqukaunger'mi, canun piciatun atulria; mermun akurcimaarkauguq, menuulriaruarkauluni atakullranun. Taum tau͡gaam kinguani menuirutarkauluni. 33Tuqullermeggni-llu ek'areskuneng qikum assigtam iluanun, imai tamarmeng menuurtarkaugut. Navguqiciu tauna assigtaq. 34Neqkat-llu nerumaarkauyaaqellret mermek tuaken menuurtellermek assigtamek kuvumallrukuneng menuurciiqut, ca-llu mernarqelria tamakucim imaa menuulriaruuq. 35Cat-llu tamarmeng tuqumalriim iquvikellri menuurciiqut, qiku kaminiaq wall'u uucissuun. Itumcimaarkaugut elpecen̄un menuulriaruata. 36Tau͡gken meq nunamek ulvelria wall'u meq cayailkuciumalria qungasngaluni nani menuiciiquk, tau͡gaam cali allat agtuqunegteggu tuqumalria tema menuurtarkauluteng. 37Iliita-llu iquvikengraani naucetaarkaq nauceciirumaqatalria menuurrngaituq. 38Tau͡gken naucetaarkaq mermelkan iliita-llu tuqumalriit tauna kenicirvia iquvikluku, menuulriarurciiquq elpecen̄un.

39“Ungungssiq-llu neqkauyugngalria tuqukan, kia imum agtuquniu tuqumalriim temii menuulriarurciiquq unugvianun. 40Kina-llu nerkuni iliinek ervigciqai aturani tau͡gaam ellii menuugarkauluni unugvianun. Tuatnaciqluni-llu cali kina imna ayaucilria tuqumalriim temiinek, menuulriarurciiqluni unugvianun.

41“Tamarmeng aurretulit nunam qaingani pellernarqelriaruciqut; nerumaarkauvkenateng. 42Aqsamegteggun pektetungraata cetamanek-llu ipingqengraata wall'u ipililriarungraata, 43menuurcecaqunaci elpecen̄ek tamakunek nerluci. 44Wiinga Atanruama Agayuteklua elpeci; taumek menuircaarluci tanqilriaruuci wiinga tanqilriaruama. 45Wiinga Atanruunga anucestellerci Egypt-aamek Agayutkesqellua elpecen̄un; taumek tanqilriarukici wiinga tanqilriaruama.

46“Una waniwa alerquutnguuq pitekluki ungungssit, yaqulget, tamarmeng-llu unguvalriit pektetulit merteggun, wall'u nunam qainga pekvikluku pilrianun. 47Elpeci murilkarkauguci piciryaraqluku-llu nallunritlerkarci cam menuullra wall'u menuitellra, cali nalluvkenaki ungungssit neryugngakci neryugnganrilkeci-llu.”

Yupik Bible

Yupik Bible © 2012 American Bible Society

More Info | Version Index