Search form

Leviticus 13

Alerquutet Yuum Amian Apquciinun

1Atanrem qanrutak Moses-aankuk Aaron-aaq-llu, 2“Yuk amimikun pupikan wall'u aninguaqan wall'u puvkan natii qaingani, aarnaqluni mamyuilnguurrnayukluni, tauna aguskiciu Aaron-aamun wall'u allamun agayulirtem̄un. 3Agayulirtem-llu yuvrirciqaa pupik amiani. Melqut-llu pupiani qat'rikata pupia-llu ilutunruluni avatmini, tua-i mamyuilnguulliniuq. Agayulirtem yuvrirtiin qanrutkeciqaa menuulriarurrniluku. 4Tau͡gaam pupik qatqan ilutunruvkenani-llu avatmini, melqut-llu pupiani qat'riksaunateng, agayulirtem allakaumavkarciqaa pupilek malrunlegni ernerni. 5Agayulirtem-llu yuvrinqigciiqaa malrunelgatni erenret. Tangllermini cakaninrilkan ayuvkenani-llu, agayulirtem ataam cali allakaumavkarciqaa malrunlegni ernerni. 6Kinguatni-llu malrunelgen erenret cali yuvrinqigciiqaa. Tauna-llu pupik mitrialikan ayuvkenani-llu amiani qanrutkeciqaa menuirutniluku; qaaryakainaulliniluni tauna. Ervikuniki aturani menuirutarkauluni. 7Tau͡gken kinguani yuvrillran agayulirtem, qanrutellruluku-llu assiriniluku, pupik tauna ayukan, ataam ag'arkauguq agayulirtem̄un. 8Agayulirtem-llu yuvrinqigciiqaa, apqucia-llu amiani ayullinikan qanrutkeciqaa menuulriarurrluku, apqucia mamyuilnguulliniuq.

9“Kina imna apqucingelria mamyuilngurmek taicimaarkauguq agayulirtem̄un. 10Agayulirtem yuvrirciqaa puvelriartangqerqan-llu qaterrluni melqut-llu tuani qat'rikata callarrluni-llu taum nunii, 11ak'a ayagnillruluni mamyuilnguq, agayulirtem qanrutkeciqaa menuulriaruniluku; tau͡gaam allakarngaunaku nallunaunani menuulriaruan. 12Mamyuilnguq sageskan temiinun tamalkuan it'gartuumaan qamiqurtuumaan-llu 13agayulirtem yuvrirciqaa, mamyuilnguq-llu sagtellrukan temiinun tamalkuan qanrutkeciqaa menuitniluku. Amia tamarmi qat'rillruan, tua-i tauna menuituq. 14Tau͡gken amia callalriamek pupigtangqerquni tuaken ayagluni menuulriaruciquq. 15Agayulirtem-llu yuvrirciqaa, callalriamek-llu pupigmek tangerquni menuulriaruniciqaa. Callalria pupik mamyuilnguugarkauguq, yuk-llu tauna menuulriaruarkauluni. 16Tau͡gaam callalria tauna mamkan qat'riluni-llu, taum ullanqigtarkaugaa agayulirta. 17Agayulirtem yuvrirciqaa, tauna-llu callalria qat'rillrukan qanrutkeciqaa menuitniluku; tua-i menuituq.

18“Kina-llu imna aninguallrukuni, tauna-llu mamellruluni, 19aninguallra-llu puvkan qaterrluni-llu wall'u kavirceterrlugluni qatellriamek pitangqerqan, 20agayulirtem yuvrirciqaa, apqucia-llu ilutunrukan amiani, melqut-llu tuani qat'rillrukata, tua-i agayulirtem qanrutkeciqaa menuulriaruniluku: Mamyuilnguq aninguallrakun naulliniuq. 21Tau͡gken agayulirtem yuvrillrani melqut naumalriit tuani qat'rillrunrilkata, melugtevkenani wall'u tunguvkenani, tua-i agayulirtem allakaumavkarciqaa malrunlegni ernerni. 22Ayukan-llu kemgani agayulirtem qanrutkeciqaa menuulriaruniluku. Apquciurtelliniluni tauna. 23Tau͡gken tauna cakaninrilkan ayuvkenani aninguallran qelengllakaa. Agayulirtem-llu qanrutkeciqaa menuirutniluku.

24“Wall'u yuum qaingani uunertangqerqan, callangqalria-llu kavirrlugcen̄ani qatqan wall'u tamarmi qaterrluni, 25agayulirtem yuvrirciqaa. Melqut-llu uunrani qat'rillrukata ilutunruluni-llu amiani, mamyuilnguuguq naulria uunrakun agayulirtem-llu menuulriaruniciqaa. 26Tau͡gken agayulirtem yuvrillrani nuyat qat'riksailkuneng ilutunruvkenani-llu amiani, tangellra-llu mitrianani, allakaumavkarciqaa malrunlegni ernerni. 27Malrunelgatni-llu erenret yuvrinqigciiqaa. Ayukan-llu amiani qanrutkeciqaa menuulriaruniluku; apqucia mamyuilnguuguq. 28Tau͡gaam cakaniqsailkan amiani-llu sagtevkenani mamnengluni-llu, uunran puvevkaqainalqaa, qanrutkeciqaa agayulirtem menuirutniluku, uunran tauna qelengllakluku.

29“Angun wall'u arnaq cam naukaku qamiqurrakun wall'u tamluakun, 30agayulirtem yuvrirarkaugaa. Amiani ilutunrungalkan melqut-llu tuani esirlirrlugcen̄ateng akultuluteng-llu, mamyuilnguuguq, agayulirtem-llu menuulriaruniciqaa. 31Tau͡gken agayulirtem yuvrillrani apqucia ilutunrungatenrilkan amiani, tau͡gken cali assilrianek melqurtaunani, allakaumavkarciqaa yugnek malrunlegni ernerni. 32Yuvrinqigciiqaa-llu erenret malrunelgatni, pupia-llu ayullrunrilkan esirlinek-llu melqurtaunani, ilutunruvkenani-llu amiani, 33nuyani ungani-llu qiurciqai, pupiim tau͡gaam nuniinelnguut pivkenaki. 34Malrunelgatni erenret yuvrinqigciiqaa, pupia-llu ayunrilkan ilutunruvkenani-llu amiani Agayulirtem menuirutniciqaa. Taum-llu aturani ervigciqai menuirutarkauluni-llu. 35Tau͡gken kinguani menuircallmi apqucia ayukan 36agayulirtem yuvrirciqaa. Pupia-llu ayukan esirlinek melqunek yuarnarqenritaa, nallunaunani menuulriarurcan. 37Tau͡gken tangllermini pupia ayunrilkan, melqungluni-llu cangatenrilngurnek, pupia mam'uq, menuirulluni; agayulirtem-llu menuirutniciqaa.

38“Angutem wall'u arnam qaingani qatellriamek kukupagtangkan 39agayulirtem yuvrirciqaa. Kukupiit-llu qaterrlulriarukata, caunritut naugartellret qaingani. Tauna yuk menuituq.

40-41“Angutem-llu qamiqurra meqluni nuyairuskuni patkallngeqainartuq, menuulriarungaunani. 42Tau͡gken kavirceterrlulria qatellria pupik naukan patkallrani; tauna mamyuilnguuguq. 43Agayulirtem-llu yuvrirciqaa. Tauna-llu naulria qatellriarukan kavirceterrlugluni patkallrani wall'u qauraani, mamyuilngurtun ayuqluni tememi, 44mamyuilngurmek apqucingelliniuq, menuurrluni; Agayulirtem-llu menuulriaruniciqaa; tuani apqucia qamiqurrani uitaluni.

45“Apqucilek mamyuilngurmek aturarkauguq allguumalrianek aturanek nuyani-llu aqevlavkarluki, kegginami-llu atlirnera patuluku qayagpagaarkauluni, ‘Menuulria, menuulria!’ 46Menuulriaruarkauguq apqucingqellermi taktaciatun; uitaarkauluni-llu kiirra'rmi elatiitni nunat.

Aturani Uquggluk

47“Uqugglugtangqerqan+ aturami qusngit melqurritnek taqumalriami wall'u allami 'lumarrarmi, 48ilarraqengraaku qusngit melqurritnek piliaqumalriami wall'u allami 'lumarrarmi wall'u qecigmi cali-llu cami qecigmek piliaqumalriami, 49kavirceterrlukuni cungagceterrlugluni-llu uquggluuguq ayungiinalria nasvagnaqluni agayulirtem̄un. 50Agayulirtem-llu yuvrirraarluku tauna allakaumavkarciqaa malrunlegni ernerni. 51Malrunelgatni-llu erenret yuvrirciqaa. Tauna-llu uquggluk ayukan tuani 'lumarrarmi wall'u qecigmi, menuulriaruuq. Erenret malrunelgatni cali yuvrirciqaa tuani-llu uquggluk ayukan, tauna menuulriaruluni. 52Agayulirtem-llu ekuagarkaugaa aturaq uqugglugtangqellinian sagtellriamek.

53“Tau͡gken agayulirtem yuvrillrani uquggluk ayunrilkan tuani, 54alerqurciqaa aturaq erviisqelluku allakaumavkarluku-llu malrunlegni ernerni. 55Erviumallran kinguani yuvrinqigciiqaa tauna aturaq. Ayunrilnge'rmi tangellra cimiqsailkuni cali menuulriaruuq. Tauna aturaq ekuanarqaa uqugglua manuanlengraan wall'u tunulirnerani. 56Tau͡gken agayulirtem yuvrillrani uquggluk mitrialillinikan ervillran kinguani, allegluku au͡g'arciqaa tuaken nalliinek. 57Tau͡gken cali alainqigeskuni aturami, ataam ayulriaruuq; tua-i pikestiin ekuagarkaugaa tauna. 58Ervillrani aturaq uquggluk catairuskan aturami aipiriluku ervigciqaa nutaan-llu menuirutarkauluni.”

59Una waniwa picirkiutnguuq uqugglugtangqerqan aturami qusngit melqurritnek taqumalriami wall'u allani 'lumarrarni wall'u cani qecigmek piliaqumalriani, tuaten-llu nallunrirarkauluku menuilnguq menuulria-llu.

Yupik Bible

Yupik Bible © 2012 American Bible Society

More Info | Version Index