Search form

Leviticus 14

Menuircaryaraq Mamyuilngurmek Apqucingqellernun

1Atanrem qanrutaa Moses-aaq, 2“Una alerquutnguciquq apqucilegnun mamyuilngurmek ernermi tuani menuircaumallerkamini. Tau͡gaam ciumek agayulirtem̄un agucimaarkauluni; 3agayulirtem-llu anulluku nunat elatiitnun yuvrirciqaa. Apqucia-llu mamyuilnguq mamllinikan, 4agayulirta alerquiciquq taitesqelluki taum menuircautekaanek malrugnek unguvalriignek menuilnguugnek yaqulgegnek, murakegtaarmek, kavirlimek-llu pelacinagmek culugtarmek-llu. 5Tuqutesqeciqaa-llu aipaa yaqulgem quliini qikum assigtam mermek imalgem. 6Aipaa-llu unguvalria yaqulek, taukut-llu muriit, kavircetellria-llu pelacinak, culugtaq-llu, akurciiqai auganun yaqulgem tuqucimallrem. 7Cali-llu agayulirtem auk ciqertauciiqaa taumun menuircaumalriamun apqucianek mamyuilngurmek; nutaan-llu qanrutkeciqaa menuirutniluku. Unguvalria-llu yaqulek tengevkarluku. 8Menuircaumallrem-llu ervigciqai aturani qiurluki-llu nuyani tamalkuita ervuqerluni-llu, tua-i-llu nutaan menuirulluni. Taum kinguani iluvarciqai nunat, cali tau͡gaam tuani pelatekami elatiini uitaarkauluni ernerni malrunlegni. 9Malrunelgatni erenret qiunqigciiqai nuyani, ungani, qavluni, tamaita-llu qaimini melqut. Ervigluki-llu aturani ervuqerluni-llu. Tua-i nutaan menuirutarkauguq.

10“Pingayunelgatni erenret teguciiquq malrugnek angucalugnek qusngiyagaagnek natlugnerilnguugnek, ataucimek-llu arnacalumek qusngiyagarmek allrakungelriamek ataucimek cali natlugnerilngurmek, tallimanek-llu uspernek mukaamek olive-aat uquatnek avumalriamek, saskak-llu malruk imaagnek uqumek olive-aat cali uquatnek. 11Agayulirtem-llu menuircartekaan aguciiqaa makut-llu elliitekat iteryaraanun Pelatekam Agayuuviim. 12Agayulirtem-llu teguciqaa aipaa angucaluq qusngiyagaq elliitekluku-llu pinarqut'legmun elliitngutulitun, ilakluku uquq, elliiteklukek Atanermun agayulirten̄un pikarkauvkarluki. 13Tuquciiqaa-llu qusngiyagaq assiilnguum au͡gautekaanun elliitet ekuagarkat-llu tuqucimalallratni kencignarqelriami; tua-i-wa pinarqutellgem elliitii assiilnguum au͡gautekaanun elliitngullertun agayulirtem pikarkaungaku kencignarqeqapigtellriaruluni. 14Agayulirtem-llu tauna menuircararkaq qusngiyagaam augan iliinek tegulluni mingugciqaa tallirpilirneq ciutiin nuuga, tallirpilirneq-llu ayautii, tallirpilirneq-llu putukua. 15Agayulirtem-llu teguluku uquq kuvciqaa iqsulirnermun tumaminun, 16tallirpilirneq-llu yuarani akurrluku tuavet uqumun ciqertauciiqaa malrunlerqunek ciuqerrani Atanrem. 17Ilakuaminek-llu uqumek tumamini mingugluku taum menuircaq'ngami tallirpilirneq ciutiin nuuga, tallirpilirneq-llu ayautii, tallirpilirneq-llu putukua, qalliliulluku augmun ak'a minguucimallermun. 18Uquq-llu ilakuani tumamini uitalria minguuciiqaa taum angutem qamiqurranun. Tuaten piluni agayulirtem menuircarciqaa.

19“Agayulirtem-llu tua-i elliitekciqaa assiilnguum au͡gautekaanun elliin menuircaun-llu cali aturluku. Kinguani-llu tuqulluku tauna ekuagarkauluni elliitekumalria. 20Ekuavigmi-llu elliitekciqak ekuagarkaq elliin mukaarkaq-llu. Tua-i waten piluni agayulirtem menuircaryaraq aturciqaa, tauna-llu menuirutarkauluni.

21“Tau͡gken tauna angun arrsaukan allanek-llu elliitekaunani, menuircautekaminek taiciiquq ataucimek angucalumek qusngiyagarmek pinarqutminun elliitekaminek, elliitekarkauluku Atanermun agayulirten̄un pikevkararkauluku. Cali-llu taitarkauluni usperegnek malrugnek mukaamek uqumek avulegmek, saskak-llu malruk imaagnek uqumek, 22malrugnek-llu yaquliyagaagnek turtledove-agnek wall'u malrugnek yaquleyagaagnek pigeon-aagnek taicugngakminek; atauciq elliitekauluni assiilnguum au͡gautekaanun aipaa-llu ekuagarkauluni. 23Pingayunelgatni-llu erenret taitarkaugai agayulirtem̄un menuircautekarkauluki, amiiganun Pelatekam Agayuuviim. 24Agayulirtem-llu teguciqak qusngiyagaq uquq-llu elliiteklukek-llu Atanermun agayulirten̄un pikarkauvkarluki. 25Tuquciiqaak-llu qusngiyagaq, agayulirtem-llu ilii augem teguciqaa minguulluku-llu menuircaq'ngami tallirpilirneranun ciutiin nuuganun, tallirpilirnermun-llu ayautiinun, tallirpilirnermun-llu putukuanun. 26Agayulirta-llu tumaminun iqsulirnermun kuv'iluni iliinek uqum; 27tallirpilirneq yuarani akurrluku uqumun ciqertauciiqaa malrunlerqunek ciuqerrani Atanrem. 28Iliinek-llu uqum unatmini uitalriamek mingugciqai menuircaq'ngami tallirpilirneq ciutiin nuuga, tallirpilirneq ayautii, tallirpilirneq-llu putukua, qallilirluki minguutellni pinarqutellgem elliitiinek. 29Ilakuani-llu uquq unatmini minguuciiqaa qamiqurranun menuircaqmi, tuaten-llu piluni menuircariyaraq aturciqaa. 30Cali-llu elliiciquq taukuk yaquliyagaak aipaagnek, 31atauciq assiilnguum au͡gautekaanun aipaa-llu ekuagarkauluku tapeqluku mukaarkamun. Tuaten piluni aturciqaa menuircaryaraq. 32Una waniwa alerquutnguuq tamakunun mamyuilngurmek apqucilegnun menuircautnguluni elliitekailngurnun tamakunun elliitektukaitnek.”

Uquggluk Eneni

33Atanrem qanrutak Moses-aankuk Aaron-aaq-llu, 34“Tekiskuvci nuniinun Canaan-aam, cikiuteklemnun elpecen̄un piksagutesqelluku, uquggluk nauvkaqumku enet iliitni, 35taum enem pikestii agciquq agayulirtem̄un qanrulluku-llu, ‘Enema iluani apqucirtangyugnarquq.’ 36Tua-i agayulirtem alerqurciqai enem yui cat tamalkuita enemelnguut antesqelluki yuvriryarturpailegmiu, tamarmeng enemelnguut menuulriarunritniartut; nutaan-llu agayulirta agciquq ena paqluku. 37Elliin-llu yuvrirciqaa tauna uquggluk. Uquggluk-llu qacarnermi uitakan cungagceterrlugluni wall'u kavirceterrlugluni kukupauluni ilutunruluni-llu avatmini, 38agayulirtem anluni tuaken enemek kelucarciqaa ernerni malrunlegni. 39Malrunelgatni-llu erenret yuvrinqigcarturciqaa. Uquggluk-llu tamaani saggluni ayukan, 40agayulirtem alerqurciqai teggalqut tamalkuita uqugglukai au͡g'arluki ayautesqelluki nunat elatiitnun menuulriim-llu nuniinun ciqilluki. 41Cali-llu enem ilua keligceciiqaa urasqaq-llu kelillerteng ciqiciiqaat nunat elatiitnun menuulriim nuniinun. 42Allanek-llu teggalqunek cimirtelluki uquggluum nauvikumallri nutaramek-llu urasqertelluku enem ilua.

43“Uquggluk-llu alainqigeskan enemi, teggalqut au͡gaumallrata keligaumallran-llu cali-llu urasqercimallran kinguani, 44agayulirtem paqciiqaa; uquggluk-llu ayukan enem iluani, enem ilua mamyuilngurmek apqucirtangqertuq; menuulriaruuq. 45Imceciiqaa ena tauna, teggalqut-llu muriit-llu urasqat-llu tamalkuita ciqiciqait menuulriim nuniinun nunat elatiitnun. 46Kina-llu imna tuavet enemun kelucaumallrani itellrukuni menuulriaruciquq unugvianun. 47Kina-llu inartellrukuni wall'u nerluni enem iluani ervigarkaugai aturani.

48“Tau͡gken agayulirtem paqtenqigtellrani uquggluk ayunrilkan enem urasqercimallran kinguani, tua-i agayulirtem ena menuirutniciqaa, uquggluk tamarmi au͡gaumallrullinian. 49Menuircarcuutekaanun-llu enem teguciiquq malrugnek yaquleyagaagnek, murakegtaarmek, kavirlimek-llu pelacinagmek culugtarmek-llu. 50Aipaa-llu yaquleyaagaam tuquciiqaa qikum assigtam mermek imalgem quliinun piluku. 51Tuqucimallrem-llu yaquleyagaam mer'em quliini auganun akurciiqai murakegtaar, culugtaq, kavircetellria pelacinak, aipaa-llu yaquleyagaq unguvalria; ciqertarluku-llu ena malrunlerqunek. 52Waten tua-i piluni menuircarciqaa ena aturluni auganek yaqulgem, mermek, unguvalriamek yaqulegmek, murakegtaarmek, culugtarmek, kavirlimek-llu pelacinagmek. 53Unguvalria-llu yaqulek tengevkarciqaa carr'ilqamun nunat elatiitnun; tuaten piluni menuircarciqaa ena. 54Makut maa-i picirkiutnguut yuum qaingani mamyuilngurnun apqucinun; 55uqugglugnun aturani enemi-llu, 56puvelrianun wall'u aninguanun wall'u callareskainun. 57Makutgun nallunrirarkauluku menuilnguq menuulria-llu. Una alerquutnguuq mamyuilngurmun apqucimun.”

Yupik Bible

Yupik Bible © 2012 American Bible Society

More Info | Version Index