Search form

Leviticus 15

Menuulriit Temem Maqellri

1Atanrem qanrutak Moses-aankuk Aaron-aaq-llu, 2“Qanqitek waten Israel-aam yuinun: Angun naulluutengluni qurrsuutmikun maq'laquni, maqellra menuulriaruuq. 3Una waniwa picirkiutnguarkauguq menuurtellranun maqellran nalliini wall'u maqenringraan, menuulriaruuq elliini.

4“Tamarmeng ingelret inangqavikellri tamarmeng-llu cali aqumvikellri menuulriaruciqut. 5Kia-llu imum agtuquniki ingelri 6wall'u aqumekuni aqumvikellranun, aturani ervigciqai ervuqerluni-llu, menuulriaruarkauluni-llu unugvianun. 7Kia-llu cali agtuquniu angun maqtulria, ervigciqai aturani ervuqerluni-llu, menuulriaruarkauluni-llu unugvianun. 8Taum-llu angutem maqtulriim qeciqaku iliit yuut menuilnguq, taum aturani ervigciqai ervuqerluni-llu, menuulriaruarkauluni-llu unugvianun. 9Kuunikun-llu ayalriim aqumgassuutii taum atullra maqtulim menuulriaruciquq. 10Kia-llu imum agtuquniu ca aciani uitalria taum maqtulriim menuulriaruarkauguq unugvianun. Kina-llu tegulautellrukuni taum aqumgavillranek camek erurarkaugai aturani ervuqerluni-llu. Menuulriaruciquq unugvianun. 11Kina-llu imna maqyutengqellriim agtullrukani erurpailegmikek unategni, aturani ervigciqai ervuqerluni-llu, menuulriaruarkauluni-llu unugvianun. 12Qiku assigtaq maqyutengqellriim atullra navguumaarkauguq; tamarmeng-llu muriit assigtat agtullri eruumaarkauluteng mermun.

13“Maqyutengqellria-llu assirikuni uitarraarluni ernerni malrunlegni aturani ervigciqai erurluni-llu ellminek mermun ecuilngurmun, nutaan-llu menuirutarkauluni. 14Pingayunelgatni erenret tegutarkauguq malrugnek turtledove-agnek wall'u malrugnek yaquleyagaagnek pigeon-aagnek, taillukek-llu ciuqerranun Atanrem amiigani Pelatekam Agayuuviim, tunlukek-llu agayulirtem̄un. 15Agayulirtem-llu elliitekciqak, aipaa elliitekluku assiilnguum au͡gautekaanun aipaa-llu ekuagarkauluku. Tuaten piluni Agayulirtem menuircariyaraq aturciqaa taumun maq'ilallermun.

16“Tau͡gken cali naulluutailnguq maq'ikuni arniuraqami pilaucirmitun, tamalkuan temni ervuqerciqaa, menuulriaruarkauluni-llu unugvianun. 17Tamarmeng-llu aturat amit-llu maq'errillranun agtuutellret eruumaciqut merkun, menuugarkauluteng-llu atakullranun. 18Angun-llu inarucikuni arnamek, maq'iluni-llu, tamarmek ervuqararkauguk, menuulriaruarkaulutek-llu unugvianun.

19“Arnaq aunraquni piyaramini iralumi, menuulriaruarkauguq malrunlegni ernerni. Kia-llu imum agtuquniu menuulriaruarkauluni unugvianun. 20Aunrallermi nalliini aqumvikellri wall'u inangqavikellri menuulriaruarkaugut. 21Kia-llu agtuquniu ingelra arnam ervigarkaugai aturani ervuqerluni-llu, menuugarkauluni-llu unugvianun. 22Kia-llu imum agtuquniki aqumvikellri, ervigciqai aturani ervuqerluni-llu, menuulriaruarkauluni-llu unugvianun. 23Ingelrungraata wall'u allat aqumvikellri, kia imum agtullrukuniki menuulriaruarkauguq unugvianun. 24Kia-llu imum angutem tutellrukuniu agelrumalria arnam menuurutiinek menuurtuq, menuulriaruarkauluni-llu malrunlegni ernerni; tamarmeng-llu ingelret taum angutem inarrvikellri menuulriaruarkauluteng.

25“Arnaq-llu aunraquni ernerni amllerni aunraryaraqenrilkem̄ini, wall'u aunraquni agelrumayarani cipluku, aunrarturallermi taktaciatun menuugarkauguk pilaucirmitun agelrumaaqami. 26Ingelret inangqavikellri aqumvikellri-llu tamarmeng menuulriaruciqut aunrallran taktaciatun. 27Kia imum agtuquniki makut menuulriarurciiquq ervigarkauluki-llu aturani ervuqerluni-llu, menuugarkauluni-llu unugvianun. 28Arulairutiini aunrallermi utaqaarkauguq malrunlegni ernerni, nutaan taukut kinguatni menuirutarkauluni. 29Pingayunelgatni-llu erenret tegutarkauguq malrugnek turtledove-agnek wall'u malrugnek yaquleyagaagnek pigeon-aagnek, taillukek-llu agayulirtem̄un amiiganun Pelatekam Agayuuviim. 30Agayulirtem-llu elliitekciqaa atauciq yaqulek assiilnguum au͡gautekaanun, aipaa-llu ekualuku elliitekluku. Tuaten piluni agayulirtem menuircarciqaa arnaq tauna.

31“Waten piluci Israel-aam yui allakaumavkarciqaci menuullerkaatnek, tuquyuartut menuullermegteggun menuureskunegteggu Agayuvik akunlemeggni uitalria.”

32“Una picirkiutnguuq angutmun naulluuterluni maqlermun, cali-llu angutmun qurrsaraminek maq'illermun; 33cali arnamun agelrumallran nalliini wall'u angutmun arniullermun arnamek menuulriamek.

Yupik Bible

Yupik Bible © 2012 American Bible Society

More Info | Version Index