Search form

Leviticus 16

Erneq Assiilngurnek Au͡g'ariciyaraq

1Atanrem qanrutaa Moses-aaq kinguani tuqullragnek Aaron-aam qetunraagken; tuqucimallrek kumarcillragni kencignarqenrilngurmek kenermek Atanermun. 2Qanrutaa, “Qanrusgu anelguten Aaron-aaq pinarivailgan itresqevkenaku tunuanun capiin Tanqikapiaralriim, tuani alailarciqngama amirlukun quliini Akqutem Yaassiigan. Narureskuniu una alerquun tuqucimaciquq. 3Tua-i-llu qusngirngalnguq tuqutarkaugaa yuut assiilnguirutkaatnun elliitnguarkaq; auga-llu itrulluku Tanqikapiaralriim nuniinun, ciqertaulluku-llu patuanun ciuqerranun-llu Akqutem Yaassiigtaan, angucalum ungungssim auganek pillrucimitun.

4“Ervuqarraarluni at'arkaugai agayulirtem aturai; qalliq 'lumarraq, qerrulliik-wa nanilnguuk. Cali-llu nemrucaramek nacarluni naquggluni-llu.

5“Israel-aam-llu yui taiciiqut Aaron-aamun malrugnek angucalugnek qusngirngalnguugnek assiilnguum au͡gautekaanun elliitekagnek, ataucim-llu qusngim angucaluanek ekualuku elliitekamek. 6Aaron-aaq-llu ekuagiciquq angucalumek kuluvagmek elliin assiilngumi au͡gautekaatnek nakmiin-llu cali ilami assiilnguirutkaatnek. 7Taukuk-llu qusngirngalnguuk aguciiqak Pelatekam Agayuuviim amiiganun. 8Aaron-aam-llu nall'arcetaarutkeciqak malruk qusngirngalnguuk, atauciq pikarkauvkarluku Atanermun aipaa-llu Azazel-aamun. 9Aaron-aam-llu elliitekciqaa qusngirngalnguq nall'arcetaarillermini Atanermun tut'elleq, elliitekluku assiilnguum au͡gautekaanun. 10Tau͡gken qusngirngalnguq nall'arcetaallermini tut'elleq Azazel-aamun, unguvarmi elliitekumaarkauguq ciuqerrani Atanrem, yuut assiilnguit au͡gaumasqelluki taum qusngirngalnguum ayagcecimallrakun yuilqumun Azazel-aamun.

11“Aaron-aam tuquskuniu kuluvak angucaluq elliin assiilnguminun enelgutmi-llu au͡gautekaatnun, 12teguciiquq kenercissuutmek imirluku kumalrianek kangiplugnek ekuavigmek, malrugnek-llu unatek imaagnek narnirqellriamek aruvaarmek aritenkegcaaraumalriamek, itrulluki-llu tanqilriamun enemun. 13Tuani Atanrem ciuqerrani elliciqaa aruviar kenrem qainganun, aruviinun tepkegcilriim patuvkarluku Akqutem Yaassiigan patua, tangerquniu tuqunayukluni. 14Teguluku-llu ilii auga kuluviim ciqertauciiqaa yuaraakun unatmi ciuqerranun takumcukutem aqumlleran, ilii-llu cali ciqertaulluku malrunlerqunek ciuqerranun Akqutem Yaassiigan.

15“Tua-i-llu qusngirngalnguq tuqutarkaugaa yuut assiilnguirutkaatnun elliitnguarkaq; auga-llu itrulluku tanqikapiaralriim nuniinun, ciqertaulluku-llu patuanun ciuqerranun-llu Akqutem Yaassiigtaan, angucalum ungungssim auganek pillrucimitun. 16Waten piluni caliaqeciqaa menuircariyaraq, menuircarluku Tanqikapiaralria menuulriarullratnek Israel-aam yuin assiilngillermegteggun. Waten piarkauluni Pelatekaa Atanrem nunat qukaatni uitallran menuurcet'laaku. 17Yugtangqerrngaituq ilua Pelatekam Agayuuviim Aaron-aaq itrumallrani Tanqikapiaralriamun menuircariyaraq aturluku. Menuircariyaraq atuumarikuniu ellminun nakmiin-llu ilaminun cali-llu tamalkuitnun Israel-aam yuinun, 18anciquq ekuavigmun menuircarluku-llu. Augagnek tegulluni angucalum ungungssim qusngirngalnguum-llu mingugciqai tuaken ekuaviim qaingan kangiraini anngalriit tamalkuita. 19Ilii-llu augem yuaramikun ciqertauciiqaa ekuavigmun malrunlerqunek, menuircarluku assiilnguitnek Israel-aam yuin, qigcignarivkarluku.

Qusngirngalnguq Assiilngurnek Ayaucilleq

20“Qaqiuskuni-llu Aaron-aaq menuircarillerminek Pelatekam iluqlianek Tanqikapiaralriamek, Pelatekamek-llu Agayuvigmek cali-llu ekuavigmek, taiciiqaa Atanrem ciuqerranun qusngirngalnguq cucukumalleq Azazel-aamun. 21Aaron-aam-llu tamarkenka unategni ellilukek qamiqurranun unguvalriim qusngirngalnguum apervikuatekciqai tamalkuita assiilnguit Israel-aam yuin, tua-i assiilnguit elliarkauluki qamiqurranun qusngirngalnguum. Nutaan-llu yuum ellimerrumalriim qusngirngalnguq ayagcetarkauluku yuilqumun. 22Qusngirngalnguum qugciqai ayaulluki tamaq'apiaraita assiilnguit yuilngurmun nunamun.

23“Tua-i-llu Aaron-aaq iterciquq Pelatekamun Agayuvigmun yuuluki-llu aturat at'ellni itqatallermini Tanqilriamun, tuavet-llu unilluki. 24Ervuqararkauguq-llu kencignarqelriim nuniini, elliin-llu aturani all'uki, anluni-llu ekuagiluni elliin assiilngumi yuut-llu cali assiilnguita au͡gautekaatnek. 25Qaingani-llu ekuaviim ekuaciqaa uqua assiilnguum au͡gautekaanun elliitngullrem. 26Taum-llu imum ayaucillrem qusngirngalngurmek Azazel-aamun ervigciqai aturani ervuqerluni-llu, tuaten pirraarluni iteryugngariarkauluni nunanun. 27Imna-llu angucaluq kuluvak, qusngirngalnguq-llu elliitngullrek assiilnguum au͡gautekaanun, augak-llu itrucimallruluni Tanqipialriamun iluqlirmun assiilngurmun au͡gautngulutek, ayaucimaciquk nunat elatiitnun ekualuki-llu kemkek, amikek, qilukek-llu. 28Taum-llu ekuagillrem taukugnek ervigciqai aturani ervuqerluni-llu. Tuaten-llu pirraarluni iteryugngariarkauluni nunanun.

Atullra Erenrem Assiilngurmek Au͡g'ariciyaram

29“Elpecen̄un makut picirkiutnguarkaugut akwarpak, qulngurutiitni erenrin iralut malrunelgata, elpeci Israel-aam yuini allanret-llu nunavcen̄i uitalriit yaalarciqut caliarkauvkenateng-llu. 30Tuani ernermi menuircaryaraq assiilngurmek aturciqngan elpecen̄un, menuircarluci assiilngurpecen̄ek tamalkuitnek, carriumasqelluci Atanrem ciuqerrani. 31Tauna erneq qigcignarqeqapiaralriaruciquq, kina tuani ernermi yaagarkauluni nereksaunani caliarkauvkenani-llu. Una picirkiutekarkauluku akwarpak. 32Agayulirta-llu naaqicimalria allakaumaluni Atanrem caliaranun, atami caliaranun ek'arkauluni, taum menuircariyaraq caliaqeciqaa agayulirtem aturainek all'uni, 33caliaqerkaugaa menuircariyaraq menuircarluku Tanqikapiaralria, Pelatekaa Atanrem tuanlucian, ekuavik, agayulirtet, tamalkuita-llu nunam yui. 34Una-llu picirkiutnguarkauguq akwarpak elpecen̄un. Menuircariyaraq atulararkauguq ataucirqumek allrakum iluani menuircarluki Israel-aam yui assiilngillritnek.” Moses-aaq-llu piuq Atanrem alerquuciatun.

Yupik Bible

Yupik Bible © 2012 American Bible Society

More Info | Version Index