Search form

Leviticus 17

Augem Qigcignarqetacia

1Atanrem qanrutaa Moses-aaq, 2“Qanruskiu Aaron-aaq qetunrai-llu tamalkuita-llu Israel-aam yui una Atanermun alerquutekellruniluku: 3Kina Israelite-aq tuqucikan elliitekaminek Atanermun kuluvagmek wall'u qusngimek wall'u qusngirngalngurmek nunat iluatni wall'u nunat elatiitni, 4alerquutmek narurciuq Pelatekaan Atanrem tuanlucian amiiganun tailluku tuqutenrilamiu. Pinarqelriaruuq aunrarceciami, Agayutem-llu yuinun ilaungairuciiquq. 5Picirkiun waniwa waten pilangesqelluki Israel-aam yui: Ungungssiaraat yuilqumi tuqutelalteng taitelangarkauluki agayulirtem̄un Pelatekaam Atanrem tuanlucian iteryaraanun, tuqulluki-llu tuani elliitekluki ilakuyucimun. 6Agayulirtem-llu auga ciqertautarkauluku ekuavianun Atanrem Pelatekaan Atanrem tuanlucian, ekualuku-llu uqua ilukegcinarqelriaruluku narnirqelriaruluku-llu Atanermun. 7Israel-aam yui tuqucinqiggngaitut pilaucirmegcetun yuilqumi, Atanrem pisqutii narurrluku elliitekluki anernerrlugnun qusngirngalngurtun ayuqellrianun. Una-llu Israel-aam yuini picirkiutnguarkauluni akwarpak.

8“Qanrutarkaugaten-llu cali: Israel-aam yuin iliit wall'u allanruluni uitalria nuniitni elliikuni ekuagiluni wall'u camek allamek elliikuni, 9taitevkenaku amiiganun Pelatekaanun Atanrem tuanlucian elliiteksarturluku Atanermun; tuaten pilria Agayutem yuinun ilaungairuciiquq.

10“Israel-aam-llu yuin iliit wall'u allanrulria nuniitni nerkuni kemegmek augiumanrilngurmek Atanrem ingluksaguciiqaa, Agayutem-llu yuinun ilaungairutarkauluni. 11Tua-i-wa unguvalriim tamarmi unguvii augmelan; taumek wiinga cikiutekellrukeka elpeci pitekluci kuvluku ekuaviim qainganun akqutkumaciatun, assiilnguci au͡gaumalaasqelluki. Auk unguvaungan Agayutem aturyugngaa assiilngurmun au͡gautekluku. 12Taumek waten qanrutellrukenka Israel-aam yui: Ilasi yuk nunavcen̄i-llu allanrulria, nerngaituq kemegmek augiumanrilngurmek.

13“Cali-llu Israel-aam yuin iliit wall'u nuniitni allanrulria pissuquni ungungssimek wall'u yaqulegmek nerumaarkamek, pitarteng aunrarceciiqaat auga-llu nunamek patuluku. 14Unguvii tamarmi unguvalriim augani uitiin, taumek qanrutkellrukeka Israel-aam yuinun nerlaasqevkenaki kemegmek augiumanrilngurmek, tua-i-wa unguvalriim tamarmi unguvii augani uitiin; tuaten pikuni agayutem yuinun ilausciigaliciquq.

15“Kina-llu imna nerkuni tuqullermek ellminek wall'u ungungssiullgutain allgullratnek, nunalgutkeng'e'rpecen̄i wall'u allanrung'e'rmi, aturani erurarkaugai ervuqerluni-llu, menuulriaruarkauluni-llu unugvianun. 16Tau͡gken erunrilkuniki aturani wall'u ervuqerpek'nani, tua-i pinerrlugtellmi akia aturciqaa.”

Yupik Bible

Yupik Bible © 2012 American Bible Society

More Info | Version Index