Search form

Leviticus 18

Nulirqucaram Qigciklerkaa

1Atanrem qanrutaa Moses-aaq, 2“Qanruski Israel-aam yui: Wiinga Atanruunga elpeci Agayuteklua. 3Egypt-aarmiut uitavikellerpeci piciryarait aturyaqunaciki, wall'u Canaan-aamun tekiskuvci, maa-i ayauskumci nuniitnun, piciryarait aturyaqunaciki. 4Picirkiutenka aturarkaugaci avaliqu'urluki-llu alerquutenka maligtaquluki-llu. Atanruunga elpeci Agayuteklua. 5Elpeci aturarkaugaci piciryararkiutenka alerquutenka-llu; atuquvciki unguvavcen̄ek qelkilriaruciquci. Wiinga Atanruunga. 6Unayaqngaitan canimenaku tungayiin akusraruteksugluku. Wiinga Atanruunga. 7Aatan caunrilleksaqunaku akusrarutekluku aanan. Aanakan qaillukuaryaqunaku. 8Akusraruteksaqunaku atavet nulirra; caunrilkeciqngavgu aatan tuatnakuvet. 9Akusraruteksaqunaku nayagaan wall'u alqaan wall'u pania atavet wall'u aanavet, yuurtellrungraan nunavni wall'u yaaqvani. 10Akusraruteksaqunaku qetunrarpet pania wall'u panigpet pania, kasngunarqelriaruciqngan tamana elpenun. 11Akusraruteksaqunaku atalgutkenrilken wall'u aanallgutkenrilken atavet wall'u aanavet yua, elpet nakmiin anelgutekngavgu. 12Akusraruteksaqunaku atavet nayagaa wall'u alqaa, atavet nakmiin ilakngaku. 13Akusraruteksaqunaku aanavet kinguqlia wall'u alqaa, aanavet nakmiin ilakngaku. 14Akusraruteksaqunaku angagpet wall'u ataatavet nulirra, elpet acuraqngavgu. 15Akusraruteksaqunaku ukurraan 16wall'u angutem anelgutvet nulirra. 17Akusraruteksaqunaku pania wall'u tutgarii arnam akusraruteklerpet, tungayaksuagken. Tuatnayaraq nakmiin ilaminek akusrarutekiyarauguq. 18Nuliarpet nayagaanek nuliangyaqunak nulian unguvainanrani.

19“Akusraruteksaqunaku arnaq agelrumalria, menuulriaruan. 20Akusrarutekiyaqunak allam nulirranek, menuurciiqngavet elliikun. 21Irniaci tunyaqunaciki elliitnguluki agayutnguamun Molech-aamun, tuatnakuvci caarrluurciiqngavciu atra Atanrem Agayutem. 22Akusrarutekngaitarci angun arnamek pilaucirpecetun; tuatnallerkaq pellernarqelriaruuq. 23Arnaq wall'u angun akusrarutekingaituq ungungssiarmek; tuatnallerkaq cumacinarqelriaruuq menuurutkeciqerci-llu.

24“Menuurcaqunaci elpecen̄ek makut iliitgun, makut maa-i menuurutkellruitki atanruviit ciunerpecen̄ek ayagcetarkama. 25Tuatnaluteng nuna menuurcetellruat, taumek nuna Atanrem anucimirqecetaaqii (wall'u aniqlaakii), yuk'ellrinek ancivkarluku. 26Tau͡gaam elpeci aturarkaugaci picirkiutenka alerquutenka-llu, aturngaunaki-llu makut pellernarqelriit, elpeci Israel-aam yuini wall'u allanrulriani nunavcen̄i. 27Makut maa-i pellernarqelriit tamatum nunam yuin atullrit ciunerpecen̄i uitalriit nuna menuurrluku; 28menuureskuvcen̄i nunam ancuaraaci, ciunerpecen̄i yuut uitalriit tuaten pillrucirmitun. 29Tua-i kina imna atuquni makut pellernarqelriit iliitnek, tauna Agayutem yuinun ilausciigaliciquq.

30“Niisngakiciki makut alerquutekellrenka aturpek'naki-llu tamakut yuut ciunerpecen̄i uitalriit pellernarqelriit piciryarait, menuurtenritniartuci atullratgun tamakut. Atanruunga elpeci Agayuteklua.”

Yupik Bible

Yupik Bible © 2012 American Bible Society

More Info | Version Index