Search form

Leviticus 19

Alerquutai Kencignarqellerkam Pitalqeggluni-llu Cuqciyaram

1Atanrem qanrutaa Moses-aaq, 2“Israel-aam yui tamalkuita qanruski: Tanqilriarukici, wiinga Ataneq tanqilriaruama. 3Tamarpeci takaqerkaugaci aanaci ataci-llu aturarkauluku-llu Sabbath-aaq alerqullrucimtun. Wiinga Atanruunga elpeci Agayuteklua.

4“Tuigcaqunaci agayutnguanun wall'u cavignek uruggluki agayutngualiyaqunaci pikarpecen̄ek. Wiinga Atanruunga elpeci Agayutkarpecia.

5“Taiskuvet tuqutarkamek elliitekluku ilakuyucimun pisqutenka aturluki pikina ciuniurumaniartuten. 6Ner'arkaugarci-llu ernermi tuani elliiteklerpecen̄i wall'u unuaquani. Ilakuartangqerqan erenret pingayuatni tamalkuita ekuaniaci. 7Nerumakuni erenret pingayuatni pellernarqelriaruuq; elliitekumalria-llu wiinga ciuniurngaitaqa. 8Nerelriit-llu tamarmeng pinarqut'ngarkauluteng, caunrilkeciqngamegteggu tanqilria Agayutem pia. Tuaten pilria yumnun ilausciigaliciquq.

9“Quyurciaqavci naucetaarpecen̄ek mukaarkat naucetaarviim avatiinelnguut uitaskiciki kaimlleret-llu uterrvikluki avuqsaunaki. 10Wine-arkanek-llu atsanek avuquvci nangqapiggluki piyaqunaciki, igqaqellret-llu atsat avurpek'naki; uitaskiciki arrsaulrianun allanernun-llu nunavcen̄i uitalrianun pikaqevkarluki. Wiinga Atanruunga elpeci Agayutkarpecia.

11“Teglegyaqunaci, piciunrilngurnek piksaunaci, iqluuruteksaunaci-llu. 12Akqiyaqunaci ukvernarcariluci atqa aturluku akquteklerci aturngailkuvciu. Tuaten piluci caunrillekngavciu atra Agayutevci. Wiinga Atanruunga.

13“Usviilqingnaqsaqunaku nunalguten wall'u teglegiluku. Akiliutekaa calistevvet avaliqsaqunaku unuaqullerkaanun, egmianun tunkiu. 14Aniqlaayaqunaku niitesciigalnguq, paallautekaanek-llu cikmiumalriim ciunranun elliiyaqunak, tau͡gaam qigcikiu Agayuten. Wiinga Atanruunga.

15“Cuqciaqavet qanercetaarvigteggun piciuluten pitalqellriakun-llu pilarciquten; ingluarvikngaitaten arrsaulriit wall'u angenrukiluten tukuulrianek. 16Qanerrlugmek sagcilriaruyaqunak nunalgutevni. Ilan anaucugngakuvgu qanercetaarvigmi tuqullerkaanek tuaten pikina. Wiinga Atanruunga.

17“Pagglungqerrsaqunak allamun yugmun, tau͡gaam ullagluku qanellgutkekiu arenqialliqutevtegnek, assiilngiryuartuten ellii pitekluku. 18Akinauryaqunaki wall'u iliitni nunalgutvet pagglungqerrsaqunak, tau͡gaam kenkarkaugan ilan elpetun pitarrluku. Wiinga Atanruunga.

19“Niisngaarkaugaci picirkiutenka. Ungungssiuteci ayuqenrilkaitnun nulirceteksaunaki. Nauceciiksaunaci ayuqenrilngurnek naucetaarkanek ataucimi naucetaarvigpecen̄i. Aturangqeqsaunaci-llu 'lumarrarmek piliaqumalriamek avukullukek qusngim melqurra 'lumarrayagaq-llu.

20“Angun akusrarutekikan teguamek uikautellegmek, tauna-llu akilirluku angicimaksaunani teguarullranek; tamana kangingnaurutkeciqaat, tau͡gaam taukuk tuqusngaunakek, arnaq cali tauna teguaruan. 21Tauna angun taitarkauguq angucalumek qusngimek pinarqutminun elliitekaminek Pelatekaan Atanrem tuanlucian amiiganun. 22Tauna-llu qusngiq agayulirtem aturluku menuircaryaraq aturciqaa taum assiilnguan au͡gautekaa. Tauna-llu assiilnguminek au͡g'aricimaarkauluni.

23“Tekiskuvci-llu Canaan-aam nuniinun napanek-llu atsangtulinek ayuqenrilngurnek nauceciiluci neqkarpecen̄ek, allrakuni pingayuni menuulriaruciqut, elpecen̄un nerrlerkaat inerquusngaluni. 24Cetamiitni-llu allrakut naullret atsait kencignarqellriaruciqut cikiutnguarkauluteng nanrarcuutekluki Atanermun. 25Tau͡gaam tallimiitni allrakut atsait neryugngaciqaci, tuaten pillerpeciuggun amllernek atsangyaurcesqelluki. Wiinga Atanruunga elpeci Agayutkarpecia.

26“Kemegmek augtuumalriamek neryaqunaci. Irr'inartaatulit angalkiluteng piciryarait aturyaqunaciki. 27Ayakutararpecen̄i nuyat kepeksaunaki ungaci-llu nanilicaryaqunaciki. 28Tuquigaqavci elpecen̄ek kilirtuqsaunaci wall'u yagluku amirci qaraliliqsaunaku. Wiinga Atanruunga.

29“Paniin caarrluurcessngaitan akissuurtelluku allat yuk'enrilkevci agayuviatni;+ tuaten pikuvet allanun agayutnguanun cauciquten nuna-llu assiitqapigtellriarurciiquq. 30Sabbath-aaq atulaqiciu agayuvici-llu wangnun qigcikluki. Atanruunga Wiinga.

31“Tuqullret piluki apqararatulit ikayungcarvikeksaunaki, menuurciiqngavci tamaaggun. Wiinga Atanruunga Agayutsi.

32“Qigcikarkaugaten takaqluki-llu yuut ak'allaurtellriit. Qigciklua pisqutenka atuqiciki. Wiinga Atanruunga.

33“Allanertangqerqan nunavni uitalriamek elluarrluku piurararkaugan. 34Nakmiin tau͡gaam nunalgutkellriatun ayuquciiqan kenekluku elpetun pitarrluku, elpeci-llu allanrullruavci nuniini Egypt-aam. Wiinga Atanruunga elpeci Agayutkarpecia.

35“Teglegiksaunaki ilaci cuqyutevciuggun uqamaltassiarcuutevciuggun-llu. 36Pitalqellrianek cuqcissuutnek uqamaltassiarcuutnek-llu atulaqici. Wiinga Atanruunga elpeci Agayutkarpecia anutestellerci Egypt-aamek. 37Niisngakiciki alerquutenka picirkiuranka-llu. Wiinga Atanruunga.”

Yupik Bible

Yupik Bible © 2012 American Bible Society

More Info | Version Index