Search form

Leviticus 21

Qigcignarqetaciat Agayulirtet

1Atanrem alerquraa Moses-aaq qanrutesqelluki Aaron-aam qetunrai agayulirtet, “Agayulirta ellminek menuurcessngaituq ilagaulluni tuqumalriamek tungmagcilriit piciryaraitnun. 2Tungmagcilriit ilagaryugngaciqai tuqulria aanakekuniu wall'u aatakluku wall'u irniami ilakekatgu wall'u nakmiin anelgutkekuniu, 3wall'u cali nayagaqkuniu wall'u alqaqluku uingeksailnguq enelgutekluku, angutem agtuqsaunaku. 4Cali-llu menuurcessngaunani nuliamikun tungayaksagutellermi iliitgun.

5“Nuyateng kepliarngaitait ungateng-llu ilangarrngaunaki, qaiseng-llu kilirturngaunaku tuquilriit cayaraat aturluku. 6Tanqilriaruarkaugut, at'ma-llu qigcignairuyutekaanek pingaunateng; cikiutek'laamegteki neqkat elliitet ekualuki Atanermun, taumek tanqilriaruarkaulriit. 7Agayulirta nulirturngaituq akissumek wall'u angutem akusrarutekellranek wall'u avvusngalriamek; tua-i-wa agayulirta tanqilriaruami. 8Kencignarqellriatun Agayulirta piarkaugarci, elliin elliitet neqkat wangnun taitelaaki. Wiinga Atanruunga, tanqilriaruama yuunka tanqilriarurcet'laranka. 9Agayulirtem pania caarrluureskuni ellminek akissuurrluni, atani-llu kasngunarqelriarurtaa; ekualuku tuqucimaarkauguq.

10“Agayulirten͞gunrulria uqumek kuvumalleq qamiqumikun, allakaumaluni agayulirtem akluinek ac'ugngariluni, nuyani qucarrlugcessngaitai cali-llu aturani allgurngaunaki tuquilriit cayaraitnek aturniluni. 11-12Wangnun allakaumiimi ellminek menuurrngaituq wall'u kencignarqelria Pelatekaqa menulirngaunaku tuaken anluni iterluni-llu tuqumalriim uitavianun, nakmiin tauna atakeng'e'rmiu wall'u aanak'ngermiu. 13Arnamek-llu angutem agtuqsailkiinek tau͡gaam nulirturarkauluni, 14aipainermek wall'u avvusngalriamek wall'u akissumek pivkenani. Tau͡gaam nuliangarkauluni elliin tungayakutellriartami iliitnek angutem agtuqsailkiinek. 15Tuaten pinrilkuni irniari qigcignarqerkauyaaqellret menuulriaruciqut. Wiinga Atanruunga tauna-llu wii allakallruaqa Agayulirten͞gunruvkarluku.”

16Atanrem-llu alerquraa Moses-aaq 17qanrutesqelluku Aaron-aaq, “Kinguverpet iliit tememikun natlugnengqerquni cikiutekngaitaa neqkauluni elliitngulria Atanermun. Waten pilararkaugut taqsuunateng. 18Kina imna tememikun natlugnengqellria, cikmiumaluni wall'u tussilluni wall'u kegginaa ayuqucimitun ayuqevkenani wall'u qaillun temii ayuqluni wall'u ipii eluciinateng, cikiqengarkaunrituq elliitmek. 19Cali-llu unatmikun it'gamikun-llu natlugnengqellria 20wall'u quluggluni wall'u yucuarauluni wall'u meciinani wall'u kumegglulek wall'u pupilek wall'u iguugiumalria. 21Agayulirtem Aaron-aam kinguvrin iliita natlugnengqellriim cikiutekngaitaa neqkaq elliitekumalria wangnun. 22Neryugngaarkauluni tau͡gaam neqkamek wangnun tanqilriaruluku elliitngullermek, cali-llu tanqipialriaruluku elliitngullermek. 23Tau͡gaam capkutaq mallegngaunaku ekuavik-llu ullagngaunaku, natlugnengqerrami menuurcuaraa ekuavika. Wiinga-wa Atanruama ellaita kencignarivkartiit.”

24Tua-i Moses-aam makunek alerquutnek qanrutaa Aaron-aaq qetunrai-llu tamalkuita-llu Israel-aam yui.

Yupik Bible

Yupik Bible © 2012 American Bible Society

More Info | Version Index