Search form

Leviticus 22

Kencignarqetaciat Elliitet

1Atanrem alerquraa Moses-aaq, 2“Qanruski Aaron-aaq qetunrai-llu mulngakesqelluku menuurcillerkaat tanqilriamek atemnek, tua-i qigcikarkauluki auluklermegteggun qigcignarqellriit elliitait Israel-aam yuin wangnun. Wiinga Atanruunga. 3Kinguverpeci tamarmeng iliit menuurutengqerrluni iluvaqan mallgeskiitnun qigcignarqelriit elliitekellrita Israel-aam yuin wangnun, kevgiunqiggngaituq ekuavigmi. Wiinga Atanruunga.

4“Aaron-aam kinguvrin iliit mamyuilngurmek apqucingqellria wall'u qurrsuutmikun maqerrlukuni, nerngaituq kencignarqellrianek menuirutnatkaminun. Agayulirta menuurciiquq tuqumalriim agtullra agtuquniu cali-llu agtuquniu angun maq'illeq. 5Wall'u agtullrukuniu menuulria ungungssiq cali-llu yuk, wall'u cakun allakun menuulriakun menuurtellrukuni. 6Tauna yuk menuugarkauguq unugvianun, nerngaunani-llu kencignarqellriamek, mermek ellminek erurpailegmi. 7Akerta teviqan menuiruciiquq; neryugngariluni kencignarqellrianek elliitngullernek, tamakut elliin neqkaqngamiki. 8Nerngaituq tau͡gaam ellmeggnek tuqullret wall'u ungungssiullgutain allgullrata kemgitnek menulirciqngami ellminek. Wiinga Atanruunga.

9“Niisnganarqait alerquutekellrenka, assiilngiryuartut tuquluteng-llu narureskunegteki qigcignarqelriit picirkiutenka. Wiinga Atanruunga kencignarivkartiit.

10“Agayulirtem nakmiin ilakenrilkai nerngaitut kencignarqellriamek, allanrung'e'rmeng wall'u eniini calistekengraateng. 11Tau͡gken agayulirta kipuskuni pistekaminek akilirluku elliin piksagulluku, tauna neryugngaciquq; eniini-llu cali yuurtellret neryugngaarkauluteng. 12Agayulirtem pania kassuuskuni agayulirten͞gunrilngurmek nerngaituq kencignarqellrianek. 13Tau͡gaam agayulirtem pania aipainrukuni wall'u avvusngaluni irniarunani, utertellruluni-llu atami eniinun, ayagyuallermini pillermicetun tamaanlluni, neryugngauq tamakunek atami agayulirten͞guluni akurtullrinek. Tau͡gaam kina imna ilakenrilkii agayulirtem nerngaituq tamakunek.

14“Kina-llu imna pitsaqevkenani nerkuni kencignarqellriamek, agayulirta akilirciqaa taum akikiuraa ilatiinek tapirluku. 15Agayulirtet qigcignairutessngaitait tanqilriit cikiutait Israel-aam yuin Atanermun, 16nerestekaqenrilkaitnun nerevkarluki; nerelria tamakunek pinarqelriarurtelluku anucimirqecetaarumaarkaurtelluku-llu. Wiinga Atanruama elliitet kenciknarivkartiit.”

17Atanrem qanrutaa Moses-aaq, 18“Qanruski Aaron-aaq qetunrai-llu tamalkuita-llu Israel-aam yui makunek picirkiutnek. Israel-aam yuin iliit wall'u allanrulriit iliit Israel-aarmiuni elliikan akqutkellerminek wall'u elliin piyullni aturluku elliikuni ekuagarkamek Atanermun, 19elliiteteng ciuniurumasqekunegteki elliigarkaugut kuluvagmek angucalumek wall'u qusngimek wall'u qusngirngalngurmek, tamarmeng-llu natlugneritarkauluteng. 20Natlugnengqellriamek elliiyaqunaci, Atanrem ciuniurngailaku. 21Kina-llu imna elliikuni ekuagarkamek ilakellgutkellerkamun, akqutkellni aturluku wall'u elliin piyullni aturluku, elliitni ciuniurumaarkaukan natlugnerilngurmek ungungssimek elliigarkauguq. 22Ungungssit cikmiumalriit wall'u qaimegteggun natlugnengqellriit wall'u kilinengqerrluteng wall'u callanengqerrluteng maqellrianek wall'u kumegglugluteng wall'u pupigluteng; makut elliitekngaitaci Atanermun ekuangaunaki-llu ekuaviim qaingani. 23Ungungssiq natlugneritqapiaranrilengraan ipii-llu taktatkenrilengraata elliiteksugngaarci piyuumirluni elliiyaramun; tau͡gaam ciuniurumangaituq akqiyaramun elliitekumakuni. 24Elliiteksaqunaciu ungungssiq iguugek passimallrukagnek wall'u kiliumallrukagnek wall'u alleglutek qecuumalutek. Waten ayuqellriit elliitekumangaitut nunavcen̄i.

25“Elliiksaunaci-llu neqkauluku ungungssimek allanrem pillranek. Tamakut natlugnengqellriatun ayuqngameng ciuniurumangaitut.

26-27“Kuluvak wall'u qusngiq wall'u qusngirngalnguq yuureskan, aanamini uitaarkauguq malrunlegni ernerni; ernengllerminek pingayunlegnek ayagluni elliitnguyunariarkauluni ekualuku Atanermun. 28Piyagaqellriik qusngik wall'u piyagaqellriik kuluviik ataucimi ernermi tamarmek tuqucimangaituk. 29Elliikuvet-llu quyatmek, elliitekciqan picirkiutet aturluki elliiten ciuniurumaniartuq. 30Nerumaarkauguq tuani ernermi cikiutekumallermini, ilii-llu ilakuarungaunani unuakullranun. Wiinga Atanruunga.

31“Qemangqaarkaugaci alerquutenka aturluki-llu. Wiinga Atanruunga. 32Qigcignairucaqunaciu tanqilria atqa, qigcikumaarkaugua Israel-aam yuini; wiinga Atanruunga, wiinga qigcignarivkalaramci. 33Anutellruamci Egypt-aamek elpecen̄un Agayutkesqellua. Wiinga Atanruunga.”

Yupik Bible

Yupik Bible © 2012 American Bible Society

More Info | Version Index