Search form

Leviticus 23

Jews-aat Agayunerpait

1Atanrem qanrutaa Moses-aaq, 2“Qanruski Israel-aam yui, nallunairumalriit nerevkaritai Atanrem quyurrluci agayulallerkaci makuugut. 3Caliarkat caliaqelarciqaci arvinlegni ernerni. Tau͡gaam erenret malrunelgat Sabbath-aaruuq, calivkenaci mernuinercillerkaqerci; tau͡gaam quyurrluci tuani agayuarkauluci. Nani uitang'e'rpeci erenruciquq uitayarauluni Atanrem pikluku. 4Makut nallunairumalriit nerevkarillerkat Atanermun quyurrluci agayullerkaqaci, qanrutkelararkauluki pinariaqata.

Kituun Quulecirailnguq-llu Kelipaq

5“Iralut ciuqliatni erenrin akimiarunritariitni atakukan Kituutem nerevkaritekciqaa. 6Taum-llu iraluani cali erenrin akimiaratni nerevkaritekciqaa Quulecirailnguum Kelipam; malrunlegni ernerni nerlararkauluci quulecirailngurnek kelipanek. 7Ciuqliatni ukut erenret quyurrluci agayuciquci; caliarkauvkenaci camek tuani. 8Elliigaqluci Atanermun ekuagarkanek ernerni malrunlegni; erenret malrunelgatni cali quyurrluci agayuarkauluci, cali-llu calingaunaci tuani ernermi.

9-10“Tekiskuvci nunamun cikiuteklemnun elpecen̄un, mukaarkanek-llu nauceciillerpecen̄ek quyurciluci, ciuqlikacagaat qillerqaat mukaarkat aguskiciki agayulirtem̄un. 11Sabbath-aam-llu unuaquani agayulirtem taukut qillerqaat elliitekciqai Atanermun, elliinun ciuniurumasqelluci. 12Tuani-llu ernermi elliitngullrata nalliini taukut mukaarkat qillerqaat elliiniartuci angucalumek qusngiyagarmek ataucimek allrakulegmek natlugnerilngurmek cikiutekamek ekualuku Atanermun. 13Tauna-llu tapirluku elliigarkauluci uspernek cetamanek mukaamek, avulegmek olive-aat uquatnek. Una elliitnguluni ekualuku Atanermun, tepii ilukegcinaqluni. Cali tauna tapirluku elliiciquci wine-amek, cetaman saskat imarkanritnek amllertalriamek. 14Nerngaituci kelipamek wall'u mukaarkamek nutaraungraan wall'u uumangraan makunek elliivailegpeci Agayutmun. Una picirkiutnguarkauluni tamalkuitnun kinguverpecen̄un akwarpak.

Quyurciyaram Nerevkaritii

15“Erenrem uitayaram unuaquanek ayagnirluci, ayagneqluku elliitnek qillerqaanek taitellerci, naaqikici ernernek nitilit malrunelgurtellratnun. 16Yuinaak-llu malruk qulnek cipluku naakata, unuaquani malrunelgata Sabbath-aat, cikiqiciu Ataneq elliiluci allamek nutaramek mukaarkamek. 17Enevcen̄ek taitniartuci malrugnek kelipagnek Atanermun elliitnguarkagnek. Atauciq uucimaluni cetamanek uspernek mukaamek quuleciralegmek aipaa-llu cali tuaten. Ukuk cikiutnguarkaulutek Atanermun elliitngulutek naucetaanek avuqerraallerpecen̄ek. 18Ilakluku-llu kelipagnun elliiniartuci malrunlegnek qusngiyagarnek ataucimek allrakulegnek, natlugnerilngurnek, ataucimek-llu kuluvayagarmek malrugnek-llu angucalugnek qusngignek; ekualuki elliitnguarkauluteng Atanermun, mukaarkamek merkamek-llu tapirluki, tepii ilukegcinaqluni Atanermun. 19Elliiluci-llu cali ataucimek angucalumek qusngirngalngurmek assiilnguum au͡gautekaanun, malrugnek-llu angucalugnek qusngiyagaagnek ataucimek allrakulgegnek elliitekagnek ilakuyucimun. 20Agayulirtem-llu elliitekciqak kelipak qusngiyagaak-llu cikiuteksuumiutekluki Atanermun. Ukut elliitnguut tanqilriaruluteng Atanermun, agayulirten̄un pikesqelluki. 21Taumi-llu ernermi quyurrluci agayuniartuci; caliarkaci caliaqevkenaki, man'a-llu nunavcen̄i nanleng'e'rpeci picirkiutnguarkauluni tamalkuitnun kinguverpecen̄un akwarpak.

22“Quyurciaqavci naucetaarpecen̄ek mukaarkat naucetaarviim avatiinelnguut uitaskiciki kaimlleret-llu uterrvikluki avurpek'naki; uitaskiciki arrsaulrianun allanernun-llu pikevkarluki. Wiinga Atanruunga elpeci Agayutkarpecia.

Allrakum Nutaram Nerevkariyaraa

23-24“Malrunelgatni iralut, ciuqliatni erenrin iralum, mernuinercirvikniarci tauna erneq, quyurrluci agayuniartuci cupu'uryaraq qalriakan. 25Caliarkaci caliaqevkenaki elliiluci tau͡gaam neqkanek ekuagiluci Atanermun.

Erenra Au͡g'ariciyaram

26-27“Qulngurutiit erenret malrunelgatni iralut erneqciqaa assiilngurnek au͡g'ariciyaram. Tuani ernermi nereksaunaci yagniartuci, tau͡gaam quyurrluci agayuniartuci elliiluci neqkamek ekuagiyarakun Atanermun. 28Tuani ernermi caliyaqunaci, erneqngaku elliiyaram assiilnguut au͡gautekaatnun. 29Kina imna yanrilkuni nereksaunani tuani ernermi yum'inek ancimaciquq. 30Kina-llu imna calikan tuani ernermi, wiinga Ataneq tuquciiqaqa. 31Camek calingaituci; una-llu picirkiutnguarkauluni akwarpak nunavcen̄i. 32Atularniarci una erneq mernuinerciryaraqluku, yagyaraqluku-llu nereksaunaci akertem tevillranek qulngunritariitni iralum erenrin akertem tevillranun erenret qulngurutiitni.

Nerevkariyaraq Uqisvignun

33-34“Malrunelgatni iralut akimiarureskata erenri, nerevkariyarauciquq Uqisvignun, aturarkauluku ernerni malrunlegni. 35Taukut erenret ciuqliatni quyurrluci agayuniartuci, calivkenaci tuani ernermi. 36Taukuni-llu ernerni elliilarniartuci unuaquaqan neqkanek ekualuki Atanermun. Cali-llu erenret taukut malrunelgatni quyurrluci agayuniartuci elliiluci neqkamek ekualuku Atanermun. Calivkenaci agayullerkaqerci tauna erneq.

37“Maa-i makut agayunerpiit quyurrluci agayullerkaci, elliilararkauluci-llu ekualuki ekuagarkat elliitet, mukaarkat, wine-amek-llu pisqumataciicetun ernerkiuraitni. 38Makut atularciqaci Sabbath-aat atulallerpeci elliiluci-llu pilallerpeci avatiitni wall'u akqillerpeciuggun cali-llu piyuumillerpeciuggun elliitevci Atanermun avatiitgun.

39“Erenret akimiarurtellratni iralut malrunelgatni, quyurcimarikuvciki naugillri nunavci, nerevkaritii Atanrem aturniarci ernerni malrunlegni. Ciuqliat erenret nangneqliat-llu mernuinerciryaraqniarci. 40Tuani-llu erenret ciuqliatni tegutniartuci assinritnek atsat napanek palm-at-llu avayaitnek cali-llu cuyalilriit napat avayaitnek, uqvigarnek-llu kuiget cen̄aitnek; nunaniryugniartuci ciuqerrani Atanrem Agayutevci ernerni malrunlegni. 41Atularciqerci nerevkaritnguluku Atanermun malrunlegni ernerni allrakumi iralut malrunelgatni, picirkiutnguarkauluni-llu akwarpak kinguverpecen̄un. 42Tamarpeci-llu nutem Israel-aam yuini uqisvigni uitalarciquci malrunlegni ernerni, 43kinguverpeci nallunritniaraat uitavkallrucimnek Israel-aam yui uqisvigni anutellemni Egypt-aamek. Wiinga Atanruunga elpeci Agayutkarpecia.”

44Moses-aam-llu nallunrircetai Israel-aam yuinun picirkiurutet agayunerpagnun, qigcikutnguarkat Atanermun.

Yupik Bible

Yupik Bible © 2012 American Bible Society

More Info | Version Index