Search form

Leviticus 24

Kenurrat Aulukellrat

1Atanrem qanrutaa Moses-aaq, 2“Alerqurki Israel-aam yui makunek picirkiurutnek: Taiskici menuilngurmek olive-aat uquatnek Pelatekami kenurrat uqurkaatnek, nipeksaunateng kumalarniartut. 3Aaron-aam kumartelarciqai unuaquaqan atakumi, kumaarkauluteng unuakullranun Atanrem ciuqerrani, tuani elalirnerani capem, Akqutem Yaassiigan manulirnerani. Una-llu pisqutnguarkauluni akwarpak kinguverpecen̄un. 4Aaron-aam aulukuralarciqai kenurrat suulutaarrlainarmek ellimavilget kumaurtelluki piyaraitni Atanrem ciuqerrani.

Kelipat Elliitngulriit Atanermun

5“Mukaanek piluci uspernek yuinaq cetamanek cipluku (24) kelipikici qula malrugnek cipluku amllertalrianek. 6Elliluki-llu malruinguluki itukluki arvinelguqa'aqluki estuulum suulutaarrlainaam qainganun. 7Tamakut-llu kelipat ellivikluki tepkegcilriamek aruvagkamek neqkauluku elliitnguvkarluku enairluki kelipat. 8Ernerni Sabbath-aani tamalkuitni Aaron-aam upluki ellirrlainalarciqai ciuqerranun Atanrem Israel-aam yui pitekluki. Waten piuralarciqut Israel-aam yui akwarpak. 9Taukut-llu kelipat Aaron-aam qetunrain-llu pik'larciqait nerlararkauluki kencignarqellriami, tauna neqkaq elliitngulleq tanqinruqapiaralriaqngatgu neqkat elliitngullret Atanermun, agayulirten̄un pikevkararkauluku.

Anucimirqecetaarutem Pitalqellriim Ayuqucia

10-11“Angucetangqellruuq Israelite-amek aanalegmek Egypt-aarmiumek ataluni. Tauna tuani uitavimeggni tarratellermini Israelite-aq-llu qancurlagatelliniuk. Qancurlagatellermegni-llu taum aniqlaagaa Ataneq, taukut-llu ullaulluku Moses-aamun. Uum angutem aanii atengqellruuq Shelomith-aamek, pania Dibri-m, Dan-am yuulgutkelriarinek. 12Nayurcirluku-llu uitavkarluku niitnatkameggnun qaillun Atanermun pisqumacianek.”

13Atanrem-llu qanrutaa Moses-aaq, 14“Tauna aniqlaalleq nunanek anciu; tamakut-llu niitestekellri unateteng qamiqurranun piluki apervikuavkarluki pinarqutengqerrniluku, tamalkuitnun-llu yugnun teggalqunek miluquvkarluku tuqulluku. 15Qanrutniaten Israel-aam yui, kina imna aniqlaagilria Agayutmek assiilngumi anucimirqecetaarutkaanek aturciqniluku, 16tuqucimaarkauluni-llu. Israelite-aq wall'u allaneq uitalria Israel-aat nuniitni aniqlaagikuni atranek Atanrem tuqucimaarkauguq. Tamarmeng yuut teggalqunek miluquluku tuquciiqaat.

17“Kina imna yugmek tuqucilria tuqucimaarkauguq. 18Kina-llu tuqucikuni ungungssimek pikenrilkem̄inek cimiriarkauguq. Piciryaraqeciqerci tuqucilleq tuqutaqluku.

19“Kina ilaminek akngirkengkan, ayuqiinek tauna pimaarkauguq. 20Kia enranek asemcilleq enra asemtarkauluku; iingirkengkan iingirrluku; keggutairkengkan-llu keggutairluku. Yuk-llu akngirkengkan ilaminek tuaten-llu tauna pimaarkauluni. 21Tuqucilria ungungssianek allam cimirarkauluku. Tau͡gaam tuqucilria yugmek tuqucimaarkauluni. 22Tamalkurpecen̄un Israelite-anun tusngaarkauguq una alerquun, wall'u allanrulrianun nunavcen̄i, tua-i-wa wiinga Atanruama elpeci Agayuteklua.”

23Tua-i Moses-aam qalarutai Israel-aam yui. Tauna-llu aniqlaagilleq nunat elatiitnun anulluku teggalqunek miluquluku tuqulluku. Israel-aam yui tuaten pillruut Atanrem alerquutellra Moses-aamun aturluku.

Yupik Bible

Yupik Bible © 2012 American Bible Society

More Info | Version Index