Search form

Leviticus 26

Atawaqautai Niisngalriim

1Ataneq qanertuq, “Agayutngualiyaqunaci pikarpecen̄ek, naparciyaqunaci-llu yuguanek wall'u teggalqunek wall'u eluciliumalrianek teggalqunek ciktaarvikarkarpecen̄ek. Wiinga Atanruunga elpeci Agayuteklua. 2Agayunerpiit atulaqiciki qigcikluku-llu Agayuvika. Wiinga Atanruunga.

3“Yuukuvci picirkiutenka maligtaquluki alerquutenka-llu aturluki, 4pinariaqan ellallircet'larciqaqa naunraat neqkat nauvkarluki napat-llu atsangtulit atsangevkarluki. 5Quyurcinginanerpecen̄i-llu mukaarkanek quyurcillerkaq wine-arkanek atsanek tekitelarciquq, quyurcinginanerpecen̄i-llu wine-arkanek atsanek nauceciillerkaq tekitaqluni; camirrluci-llu nerlarciquci uitaluci-llu nunavcen̄i uitanqegciluci.

6“Nepaitnamek nunasi cikirciqaqa inartelarciquci-llu alingevkenaci. Ungungssirtairutelluku-llu alingnarqelrianek anguyalriartangqerrngaunani-llu. 7Inglukesteci cirlak'larciqaci anguyagmi; 8tallimauluci cirlakilarciquci yuinarnek tallimanek (100), yuinaat-llu talliman cirlakiaqluteng qulnek tiissitsaanek; inglukesteci anguyagluki piunrirarkauluki. 9Atawaqerceciiqamci irnialingevkarluci yugyangevkarluci piciurtelluku akqutkelqa elpecen̄un. 10Naucetaaci amllerem ugaani quyurciaqavci neqkautek'larciqaci allrakuq kassugluku, ilakuaci-llu ciqitelarciqaci nutarat naucetaaci enekiurluki. 11Wiinga ullagluci nayurciqamci kencignarqellriami Pelatekamni, ulurngaunaci-llu. 12Nayurciqamci; Agayutkeciqerpecia elpeci-llu wiinga yukluci. 13Wiinga Atanruunga elpeci Agayutkarpecia anutestellerci Egypt-aamek teguarunriisqelluci. Teguaqestevci piniat navgullruaqa piyualangesqelluci kanangllugtevkenaci.”

Anucimirqecetaarutii Niisnganrilnguum Agayutmun

14Ataneq qanertuq, “Tau͡gken niisnganrilkuvci aturyugpek'naki-llu makut alerquutet, anucimirqecetaarumaciquci. 15Qessakekuvciki caukevkenaki-llu picirkiutenka aturpek'naki-llu alerquutenka, tau͡gaam navegluku akquyun pillgutekluci taqumalria, 16anucimirqecetaarciqamci. Nangteqnarqelriit tuc'eciiqanka elpecen̄un, iinruilnguut apqucit puqelvagyarat-llu cikmirceciyugngalriit, tamakut-llu cirlaurtelluci. Elliinginaq nauceciilarciquci inglukestevci neqkaitnek. 17Ingluksaguciiqamci inglukestevcen̄un cirlakevkarluci. Eq'ukestevci ataniumaciqaiceci qimalarciquci-llu kia malirqanrilengraaci.

18“Man'a-llu catkevkenaku cali niicunrilkuvci anucimirqecetaarutkarci ilaciqaqa malrunlerqunek. 19Ciumuarluci elpecen̄ek pivakucirci caunrirciqaqa. Ellallilarngaituq nunasi-llu kinerrluni cavigtun tegtariluni. 20Elliinginaq cakviurluci calilarciquci, nunauceci naugisciigaciiqngata napat-llu atsangengaunateng.

21“Pisqutka maligtaqunrilkuvciu niicugpek'naci-llu nangteqnarqelriit elpecen̄un tut'arkat malrunlerqunek ilangeciqut. 22Alingnarqelriit ungungssit iluvarceciiqanka akunlevcen̄un; irniaci tuqurqeciqait cali-llu qunguturaci ungungssit. Ikgeliciquci tumyaraci-llu yuirulluteng.

23“Makutgun-llu anucimirqecetaarumangerpeci cali niicunrilkuvci qanelqa maligtaquvkenaku, 24wiinga-llu caulinqeciqamci anucimirqecetaarutkarci-llu ilaluku malrunlerqunek ciungani amllenrulriamek. 25Anguyagnun anguyagceciiqamci akquyutmek navgillerci pitekluku, nunarpagnun-llu qimagluci quyureskuvci iinruilngurnun naulluutnun tuc'eciiqamci qessange'rpeci tegumaarkaurtelluci inglukestevcen̄un. 26Neqkanek pisciigalivkaqumci arnat qulen kelipilarciqut ataucimek uucissuucirluku keliparkarteng. Aruqutkelarciqait-llu kelipiateng cuq'lirluki, nerngerpeci-llu camirrngaunaci.

27“Makut catkevkenaki cali narureskuvciki qanellrenka, 28wiinga-llu caulinqeciqamci qenrulluci anucimirqecetaarutkarci-llu ilaluku malrunlerqunek ciungani arcaqanrulriamek. 29Kaigem ugaani irniarpecen̄ek nerlangciquci. 30Pengut qaingatni agayuyaraci piunrirciqanka navgurluki-llu tepkegcilrianek aruvaarvici, egqaqluki-llu tuqumalriit temci iqumalriit agayutnguarpeci qaingatnun. Cakneq ilulnguciqa niilluku 31nunarpiit uitavici imenrurceciiqanka agayuvici-llu navgurluki, ekuaging'e'rpeci-llu ciuniurngaunaki. 32Nunasi piunrirciqaqa camek napalriartairulluku, irr'ivkarluki inglukesteci tamaani uitalriit nunam navguumallranek. 33Anguyagnun pivkarciqamci sagtelluci allanun nunanun; nunaci yuiruciiqut nunarpiit-llu imenrurrluteng. 34Nunam-llu quyakeciqai allrakut mernuinercillerkani yuitellermi taktaciatun, elpeci inglukestevci nunaitni uitallerpecen̄i. 35Yuitellermi taktaciatun mernuinercirciquq, elpeci mernuinercirceteksaitellruavcen̄i agayunerpagni tamaani uitallerpecen̄i.

36“Elpeci-llu unegtaulriani alingevkarciqamci cakneq inglukestevcen̄ek, napam cuyaan tengeskiin nepii niilluku qimalarciquci; anguyalrianek qimalriacetun qimalarciquci iqualuci malirqerastaileng'e'rpeci. 37Paallagaciquci ilavcen̄un qimangnaqellriatun anguyagnek maligtestaileng'e'rpeci, inglukesteci-llu akiurciiganaki. 38Atanruvigni inglukestevci nunaitni uitavigpecen̄i tuquaciquci, ciritekumalriatun. 39Elpeci-llu unegtaulriani inglukestevci nunaitni, caunrirciquci; assiilngurpeci elpeci ciuliarpeci-llu assiilnguita tuaten pivkarciqaiceci.

40“Tau͡gaam kinguverpeci apervikuatekciqait assiilnguteng ciuliameng-llu assiilngillrit. Tamakut maligtaquyuumiitellrukait qanellrenka inglulicugluteng tuaten, 41ingluksagutelluteng wangnun; wiinga-llu nunaitnek ayagtelluki inglukestaita nunaitnun. Nutaan-llu kinguveci ellmeggnek pivakenriqata anucimirqecetaarumariluteng-llu assiilngillermeggnek inglulitaallermeggnek-llu, 42wiinga umyuaqeciqaqa akqutkelqa Jacob-aamun, Isaac-aamun, Abraham-aamun-llu, nutarrluku-llu akqutkelqa yumnun nunamek cikirarkauniluki. 43Tau͡gaam ciumek nuna yuirutnarqaa, arulairumallni quyakluku aturniaraa, cali-llu yuut assiilngillerteng akilirarkaugaat alerquutenka cakaaramegteki picirkiutenka-llu qessakluki. 44Tau͡gaam cali inglukestem̄eng nuniitni uitallratni cakaaqapiggluki pingaitanka wall'u piunrirluki. Tuaten pikumki akqutkelqa ellaitnun piungairuciiqngan. Wiinga Atanruama Agayuteklua ellaita. 45Ellait pitekluki umyuaqeciqaqa akqutkelqa ciulirneritnun anutellemnun Egypt-aamek takuitni atanruviit, wiinga ellaitnun Agayutkesqellua. Wiinga Atanruunga.”

46Makut maa-i picirkiutet alerquutet-llu Atanrem cikiutekellri Israel-aam yuinun Ingrimi Sinai-ami Moses-aakun.

Yupik Bible

Yupik Bible © 2012 American Bible Society

More Info | Version Index