Search form

Leviticus 3

Elliitet Ilakuyucim Ataam Atungellerkaanun

1“Kia-llu elliitii ilakuyucimun elliitngukan, elliikan ungungssimek katngagnek, elliigarkauguq angucalumek wall'u arnacalumek natlugnerilngurmek. 2Taicillrem-llu unatni elliluki qamiqurranun elliitmi tuquciiqaa caniani amiigan Pelatekaan Atanrem tuanlucian. Aaron-aam-llu qetunrain agayulirtet ciqertauciiqaat auga caniqerrinun ekuaviim. 3Tuaken-llu elliitngullermun ilakuyucimun elliigarkauguq iluan uquanek tamalkuan, elliitnguluku Atanermun, 4tamarkenka-llu tartuk uqurtuumakenka tenguan-llu picalqurra. 5Aaron-aam-llu qetunrain ekuagarkaugait ekuaviim qaingani qalliliulluki ak'a ellimalriit qaingatnun muriit ekualriit. Cikiutnguuq kenerkun narniqluni ilukegcinaqluni-llu Atanermun.

6“Una elliitii ilakuyucimun ungungssiukuni katngagnek angucaluuluni wall'u arnacaluuluni, elliigarkauguq natlugnerilngurmek. 7Qusngiyagarmek-llu elliikuni Atanermun, 8elliarkaugai unatni qamiqurranun elliitmi tuqulluku-llu ciuqerrani Pelatekam. Aaron-aam-llu qetunrain auga ciqertautarkauluku ekuaviim caniqerrinun tamalkuita. 9Tuaken-llu elliitngullermek ilakuyucimun elliigarkauguq ekualuki Atanermun, pamyuanek uqurtuumaan kepluku engeliikun, qaingan-llu iluan-llu uquanek tamalkuan, 10tartugkenek-llu uqurtuumakenka tenguan-llu picalqurranek. 11Agayulirtem-llu ekuaciqaa ekuavigmi, neqkauluku elliitekluku kenerkun Atanermun.

12“Elliitii-llu qusngirngalnguukan, 13unatni elliluki qamiqurranun tuquciiqaa ciuqerrani Pelatekam, auga-llu Aaron-aam qetunrain ciqertaulluku caniqainun kassuggluku ekuaviim. 14Tuaken-llu elliigarkauluni ekualuku Atanermun, iluan uquanek tamalkuan, 15tartugkenek-llu uqurtuumakenka tenguan-llu picalqurranek. 16Agayulirtem-llu ekuaciqaa ekuavigmi neqkauluku, elliitekumalria kenerkun ilukegcinarqevkarluku. Tamalkuita uqut pikai Atanrem. 17Waniwa-llu picirkiutnguarkaq kinguverpecen̄un tamalkuitnun tamiini uitavigpecen̄i: uqumek augmek-llu ner'arkauvkenaci.”

Yupik Bible

Yupik Bible © 2012 American Bible Society

More Info | Version Index