Search form

Leviticus 4

Elliitekat Pitsaqevkenani Assiilngiquni

1Ataneq-llu qanertuq Moses-aamun, 2“Qanruski Israel-aam yui: Kina imna pitsaqevkenani assiilngiqan aturluni Atanrem inerquutekellrinek, 3tauna assiilngilleq Agayulirten͞gunrukan yuut pinarqelriarurtelluki, tauna elliiciquq piyagarmek angucalumek natlugnerilngurmek Atanermun. Elliitekciqaa tauna assiilngillni pitekluku. 4Kuluvayagaq taitarkaugaa amiiganun Pelatekam, unatni-llu qamiqurranun elliluki tuqulluku tuani ciuqerrani Atanrem. 5Agayulirten͞guneq-llu augan iliinek piluni itruciiqaa Pelatekamun. 6Agayulirtem-llu tek'ni akurrluku augmun ciqertauciiqaa ciuqerranun kenciknarqelriim capkutam malrunlerqunek. 7Agayulirtem-llu ilii augem minguuciiqaa aruviarviim qaingan kangiraini anngalrianun Pelatekami, cipnera-llu auga kuluvayagaam kuvluku tusnganranun elliitnek ekuaviim amiigani Pelatekam uitalriim. 8Tuaken-llu angucalumek elliitngullermek au͡gauciiquq iluan uquanek tamalkuan 9tartuk-llu uqurtuumakenka tenguan-llu picalqurranek. 10Agayulirtem tauna uquq teguluku ekuaciqaa elliitngulriit ekuaviatni, ayuqluku ilakuyucimun tuqucimallermun uquanek pillermini. 11Amia tau͡gaam angucalum ungungssiaraam tamalkuan-llu kemga, ilakluki qamiqurra, irui, qilui, iluani-llu uitalriit, 12tamalkuita ayauciiqai uitaviata elatiitnun menuilngurmun qamllernek ciqiciyaramun, tuani ekuagarkauluki muragnek murirluki.

13“Tamarmeng Israel-aam yui pitsaqevkenateng assiilngiqata, tamana-llu iirumaluni yugnek, aturluteng Agayutem inerquutellranek, pinarqutengluteng; 14assiilnguq atullrat nallunriumakan yuut elliigarkaugut angucaluyaarmek ungungssiarmek assiilngillermeggnun elliitekluku, tailluku-llu Pelatekaanun Atanrem tuanlucian. 15Ciulirnerita-llu yuut unateteng elliluki qamiqurranun tuani tuquciiqaat. 16Agayulirten͞gunrem-llu augan ilii itruciiqaa Pelatekamun, 17tek'ni-llu akurrluku augmun ciqertaulluku malrunlerqunek ciuqerrani capkutam. 18Ilii-llu augem minguulluku ekuaviim aruviarnek qaingan kangiraini anngalrianun Pelatekam iluani uitalriim. 19Tamalkuita-llu uqui au͡g'arluki kuluvayagarmek ekualuki ekuavigmi. 20Tuaten piciqaa angucaluq ungungssiar, tuaten cali pillrucimitun kuluvayagaq elliitekumalleq assiilnguit pitekluki, ellait-llu au͡g'aricimaluteng. 21Ayautarkaugaa-llu agayulirtem kuluvayagaq elatiitnun uitavimeng ekualuku-llu ciuqlirmi kuluvayagarmun pillni aturluku. Yuut elliitekaat assiilngillermeggnun.

22“Atanirturilria assiilngiqan, pitsaqevkenani narurciluni iliitnek Atanrem alerquutekellrinek atuusqevkenaki, pinarqutengluni, 23nallunrirceskatni assiilngillranek, elliiciquq qusngirngalngurmek angucalumek natlugnerilngurmek. 24Unatni-llu elliluki qamiqurranun tuquciiqaa ekuaviim ciuqerrani, ekuagarkanek tuquciviim nuniini; tauna assiilngillrem elliitekaa. 25Agayulirtem-llu augem ilii elliitekumallrem assiilngurmun yuaramikun minguuciiqaa ekuaviim qaingani anngalrianun, kuvluku-llu ilakuani ekuaviim acianun. 26Tamalkuita-llu uqui ekuagarkaugai ekuavigmi, tuaten pillrucirmitun uqui elliitngullrem ilakuyucimun; tuaten piluni agayulirta elliiciquq ekuagiluni atanirturilriim assiilngillra pitekluku, ellii-llu au͡g'aricimaarkauluni.

27“Yuunginaat iliit assiilngiqan pitsaqevkenani narurciluni iliitnek pisqutkenrilkainek Atanrem, pinarqutengluni, 28nallunrirceskatni assiilngillranek, elliiciquq qusngirngalngurmek arnacalumek natlugnerilngurmek. 29Unatni-llu elliluki qamiqurranun tuquciiqaa neglirnerani ekuaviim, tuani ekuagarkat tuquciviatni. 30Agayulirtem-llu augan iliinek tegulluni yuaramikun minguuciiqaa ekuaviim qaingan kangiraini anngalrianun, ilakuani-llu kuvluku ekuaviim acianun. 31Tamalkuita-llu uqui au͡g'ararkaugai, au͡gaumallruciicetun uqut ilakuyucimun elliitngullermek. Agayulirtem-llu ekuagarkaugai qaingani ekuaviim narnilivkarluku Ataneq. Tuaten piluni agayulirta elliiciquq ekuagiluni taum angutem assiilngua pitekluku, ellii-llu au͡g'aricimaarkauluni.

32“Yuk taiskuni qusngiyagarmek assiilnguminun elliitekaminek taiciiquq arnacalumek natlugnerilngurmek. 33Unatni qamiqurranun elliluki tuquciiqaa elliitekani assiilngillerminun tuquciyaraatni ekuagarkanek elliitnek. 34Tua-llu agayulirtem elliitngullrem augan ilii piluku yuaramikun minguuciiqaa ekuaviim qaingan kangiraini anngalrianun, ilakuani-llu kuvluku ekuaviim avatiinun. 35Tamalkuan-llu uqua au͡g'arciqaa tuaten pillermitun uquinek qusngiyagaam ilakuyucimun elliitngullermun. Agayulirtem-llu ekuaciqai qaingani ekuaviim, ilaulluki elliitekumalrianun kenerkun Atanermun; tuaten piluni agayulirta elliiciquq ekuagiluni taum angutem assiilngua pitekluku. Ellii-llu au͡g'aricimaarkauluni.

Yupik Bible

Yupik Bible © 2012 American Bible Society

More Info | Version Index