Search form

Leviticus 5

Assiilnguum Elliitiinek Pinarqelriit

1“Kina imna assiilngiqan ellimerrumang'e'rmi nallunairisqelluku nallunricesten͞gunge'rmi tangllermikun wall'u nallunrillermikun, tamana qanrutkenrilkuniu elliin pinarqelriarutkaqaa.

2“Wall'u kia imum agtuquniu menuulria ungungssiq wall'u kuluvak tuqumalria, menuurtellrucini nallunriquniu pinarqelriarurciiquq.

3“Wall'u agtullrukuniu yuum natii menuulria caungraan yugmek kingunengqellria, menuurtellrucini nallunriquniu pinarqelriarurciiquq.

4“Wall'u kina imna ukvernarcarilequni umyuangcarraarpek'nani camek imumek assingraan wall'u assiilengraan piqatarniluni, tua-i pinarqelriaruuq nallunriquniu assinrilucia tuatnallmi.

5“Kina imna pinarqelriarukuni iliitnun makut, elliin apervikuatekciqaa assiilnguq atullni. 6Taiciiquq-llu assiilnguminun akiliutekaqluku Atanermun arnacalumek qusngiyagarmek wall'u qusngirngalngurmek elliitekaminek. Agayulirtem-llu ekuaciqaa taum assiilngua pitekluku, tauna-llu au͡g'aricimaarkauluni.

7“Tau͡gken qusngiyagarmek pikailkuni taiciniartuq assiilngillerminun elliitekaminek malrugnek yaquliyagaagnek turtledove-agnek pigeon-aagnek-llu, atauciq assiilngurmun elliitnguarkauvkarluku aipaa-llu ekuagarkauluku. 8Taitarkaugak agayulirtem̄un, agayulirtem-llu ciumek cikiutekarkauluku assiilngurmun elliitekaq. Qamiqurra qipluku uyaqurri ayimciiqai, tau͡gaam qamiqurra au͡g'arpek'naku 9augan ilii ciqertauciiqaa ekuaviim qacarneranun, nutaan-llu auga tamalkuan maqevkarluku ekuaviim acianun; una assiilnguirutnguluni elliitnguuq. 10Aipaa-llu yaqulgem ekualuku elliitekciqaa aturluku picirkiun; waten piluni agayulirta elliiciquq ekuagiluni taum assiilngua pitekluku, tauna-llu au͡g'aricimaarkauluni assiilnguminek.

11“Tau͡gken cali taicesciigalkuni malrugnek turtledove-agnek wall'u malrugnek pigeon-aagnek, taicugngauq malrugnek usperegnek mukaamek assiilnguirutkaminek. Uqumek wall'u aruviarkamek avuvkenaku assiilnguum au͡gautekaanun elliitnguan. 12Aguciiqaa-llu agayulirtem̄un, agayulirta-llu tegulluni tumami imaanek tauna nallunailkutauvkarciqaa elliitngucianek Atanermun, ekualuku-llu ekuaviim qaingani; una assiilnguirutnguluni elliitnguuq. 13Tuaten piluni agayulirta elliiciquq ekuagiluni taum assiilngillra pitekluku makut iliitnek. Ellii-llu au͡g'aricimaarkauluni. Ilakuaq mukaaq agayulirtem pikciqaa mukaarkamek elliitmek pilriacetun.”

Cimiutnek Elliiyaraq

14Atanrem qanrutaa Moses-aaq, 15“Kina imna pitsaqevkenani assiilngiqan elliitekevkenaki elliitnguarkat Atanermun kiingan, iluvautarkauguq cimiutekluku akiliutekaminek Atanermun angucalumek qusngimek wall'u qusngirngalngurmek natlugnerilngurmek. Akia cuqcimaarkauluni tamatum nalliini cuqciyaraat aturluku. 16Cali-llu tun'arkaugai elliitekaqsaaqellni ilaluki avgita ikgellritnek. Tunluki-llu taukut agayulirtem̄un, agayulirtem-llu tauna ungungssiar elliitekciqaa ekualuku taum assiilngua pitekluku, tauna-llu au͡g'aricimaarkauluni.

17“Kina-llu imna narurcikuni iliitnek alerquutekellrinek Atanrem nalluluni pillrung'e'rmi pinarqelriaruciquq, anucimirqecetaarutkani-llu anagngaunaku. 18Taitarkauguq agayulirtem̄un angucalumek qusngimek natlugnerilngurmek katngagnek, akia cuqcimaarkauluni tamatum nalliini cuqciyaraat aturluku. Agayulirta-llu ekuagiciquq taum pitsaqevkenani assiilnguan au͡gautekaanek, tauna-llu au͡g'aricimaarkauluni. 19Pinarqutengqellni akilirluku elliiguq, tua-i-wa assiilngiami Atanermun.”

Yupik Bible

Yupik Bible © 2012 American Bible Society

More Info | Version Index