Search form

Leviticus 7

Cimiutnek Elliiyaraq

1“Una alerquuteka pinarqutellgem elliitekaanun kencignarqeqapigtuq. 2Tuqucivikelallermeggni ekuagarkanek elliitnek tuqutelarciqaat pinarqutellgem elliitii, auga-llu ciqertautarkauluku ekuaviim avatainun kassuggluku. 3Tamalkuan uqua au͡g'arluku elliitekumaarkauguq ekuavigmi, uqurilria pamyua qiluin-llu uquat, 4tartuk uqurtuumakenka tenguan-llu picalqurra. 5Agayulirtem ekuagarkaugai ekuavigmi elliitnguluki kenerkun Atanermun. Pinarqutengqellriim elliitekaa. 6Tamarmeng angutet agayulirten͞gulriit nerlarciqut tuaken, ner'arkauluteng-llu kencignarqelriim nuniini, tua-i-wa kencignarqeqapiaralriaruan.

7“Pinarqutengqellriamun elliin assiilnguum-llu au͡gautekaanun elliitngulleq ayuquk ataucimek alerquuterlutek. 8Agayulirtem-llu yuum ekuagarkaq taitellra ekuakuniu, taum amia elliin pikarkauluku. 9Tamalkuita-llu mukaarkat yuut elliitait uucimalriit kaminiakun, assigtatgun wall'u assalissuutekun, agayulirtem caliaqestellrata pikciqai. 10Tamarmeng-llu mukaarkat elliitet avumalriit uqumek wall'u avumanrilngermeng tamarmeng Aaron-aam qetunrain pitateku'urluteng avegciqait.

Ilakuyucimun Elliitet

11“Makut maa-i picirkiutnguarkaugut elliilrianun ilakuyucimun cikiutnguaqameng Atanermun. 12Yuum-llu elliitekekuniu quyassuutekluku Agayutmun tapirluku piciqaa ungungssiq ekuagarkaq elliitnek kelipanek quuleciramek avumanrilngurnek; aipaagnek piarkauluni mamtulriamek kelipamek piliaqumalriamek mukaamek uqumek avulegmek wall'u sugg'aliyaartun mamkilngurnek uqumek massliumaluteng, cake-aanek-llu mukaaqegtaar uqumek avuluku pilianek. 13Tamakunun ilakluku cali elliigarkauluni quulecirailngurnek kelipanek. 14Elliigarkauguq tamakut ayuqenrilnguut kelipat ilangartaarluki Atanermun; tamakut-llu pikarkauluki agayulirtem ciqrucillrem ungungssim auganek ekuaviim qacarneranun. 15Kemga-llu elliitekumallrem ilakuyucimun quyassuutekluku nerumaarkauluni tuani ernermi tuqucimallermini, ilii-llu ilakuarungaunani unuakutarkauluni.

16“Yuk-llu taiskan elliitekaminek akqutkellerminek wall'u piyuumiutminek elliikan, tamalkuan nerenrilngermi canrituq tuani ernermi elliitekumallermini, unuaquani-llu cali ilii neryugngaarkauluku. 17Tau͡gaam ilii cali uitakan erenret pingayuatni tauna ekuamaarkauguq. 18Kemgem ilii ilakuyucimun elliitekumallrem nerumakan erenret pingayuatni, elliitekestellra ciuniurumangaituq elliitekellra-llu catngungaunani elliinun; menuulriaruuq, kina-llu imna nerkuni tuaken pinarqutengqellriaruciquq. 19Kemek-llu agtuutellrukan camun menuulriamun nerumangaituq, ekuamaarkauluni tau͡gaam.

“Tamarmeng menuircaumalriit kemegmek neryugngaluteng. 20Tau͡gaam kina imna menuurcimaluni nerkuni kemganek elliitngullrem ilakuyucimun, Agayutem yuin ilakenrilkiicetun ayuqucimaarkaurciiquq. 21Kina-llu agtuutellrukuni menuulriamun, yugmek wall'u ungungssimek kingunelegmek, Agayutem yuin ilakenrilkiicetun ayuqucimaarkaurciiquq.”

22Atanrem qanrutaa Moses-aaq, 23“Qanruski Israel-aam yui: Ner'arkaunrituci uquitnek kuluviit, qusngit wall'u qusngirngalnguut. 24Uqua ungungssim ellminek tuqullrem, uqua-llu ungungssim ungungssiullgutain tuqutellrata camun allamun atuuyugngauq, tau͡gaam nerumaarkauvkenani. 25Kina imna nerelria uquanek ungungssim elliitekumallrem kenerkun Atanermun, Agayutem yuin ilakenrilkiicetun ayuqucimaarkaurciiquq. 26Cali-llu ner'arkaunrituci augitnek yaqulget wall'u ungungssit nani uitallerpecen̄i. 27Kina imna nerelria augmek Agayutem yuin ilakenrilkiicetun ayuqucimaarkaurciiquq.”

28Atanrem qanrutaa Moses-aaq, 29“Qanruski Israel-aam yui: Kina imna elliikuni ilakuyucimun ilii cali elliitekarkaugaa Atanermun. 30Elliin ellminek taiciiqai ekualuki elliitekat Atanermun; uquq-llu qat'gagnun tapqulluku taiciiqaa, qat'gat elliitekesqelluki piciryarakun Atanermun. 31Agayulirtem ekuagarkaugaa uqua ekuavigmi tau͡gaam qat'gaa pikarkauluku Aaron-aam qetunrain-llu. 32Tallirpilirneq kingulirneq irua ungungssim cikiutekarkaugan agayulirtem̄un. 33Agayulirtem, elliitekestellrata ekualuki ungungssim auga qat'gai-llu ilakuyucimun elliitngullrem, pikciqaa tauna tallirpilirneq irua. 34Qat'gai-wa ungungssim kingulirneq-llu tallirpilirneq irua elliitngullrem ilakuyucimun, wiinga tegullruagka Israel-aam yuinek cikiuteklukek-llu Aaron-aamun qetunrainun-llu; cikiutek'laasqellukek-llu ukuk Israel-aam yuinun agayulirten̄un akwarpak. 35Ukuk waniwa allakaumauk Aaron-aamun qetunrainun-llu tuaken elliitngullermek ekualuku Atanermun; allakaumaluteng ellaitnun tuani ernermi nakmikumallermeggni kevgiurarkauluteng agayulirten͞guluteng. 36Ernermi tuani minguumallratni Atanrem alerqurai Israel-aam yui taukugnek elliitngullrem ilagkenek cikilaasqelluki. Pisqun-llu una niisngaarkauluku Israel-aam yuin akwarpak.”

37Ukut waniwa picirkiutnguut ekuagarkauluki elliitnun; mukaarkamun, assiilnguum au͡gautekaanun, pinarqut'legmun, agayulirciyaramun, ilakuyucimun-llu. 38Makut Atanrem Moses-aamun alerquutekelqai Ingrimi Sinai-ami, tuani ernermi alerqullermini Israel-aam yui taicesqelluki elliitekaitnek Atanermun yuilquani Sinai-am.

Yupik Bible

Yupik Bible © 2012 American Bible Society

More Info | Version Index