Search form

Leviticus 8

Naaqicimallrat Aaron-aam Qetunrain-llu Agayulirten͞gurrluteng

1Atanrem qanrutaa Moses-aaq, 2“Agusgu Aaron-aaq malikluki qetunrai, aturait, mingugcuun uquq, kuluvayagaq-llu elliitekaq assiilnguum au͡gautekaanun, malruk angucaluk, kalngak-llu imalek quulecirailngurmek kelipamek. 3Quyurtelluki-llu tamalkuita yuut amiigani Pelatekam Agayuuviim.”

4Moses-aaq-llu piuq Atanrem alerquuciatun; yuut-llu quyurrluteng Pelatekam Agayuuviim amiiganun. 5Moses-aam-llu qanrutai yuut, “Una waniwa Atanrem alerquutekelqaa pisqelluku.”

6Moses-aam-llu iluvaulluki Aaron-aaq qetunrai-llu mermek erurai. 7Aaron-aaq agayulirtem aturainek ac'etaa qukaa-llu nemerluku, as'arcen̄a'ar-llu+ at'elluku as'arcen̄araam-llu naqugutiinek tupinqellriamek 'lumarrarmek naquggluku. 8Qat'gailitamek-llu ac'etraarluku eklukek Urim-aaq Thummim-aaq-llu+ iluanun taum. 9Nacarluku-llu qamiqurranun nemrucaramek nacaan-llu manuanun elliluku suulutaaq tangnircaun, qigcignarqelria allakaumallran nallunailkutii.

10Moses-aam-llu uquq teguluku mingugaa Pelatekaa Atanrem iluanelnguut-llu tamalkuita. Tuaten piluni tamakut allakarai atuugarkaurtelluki Atanermun. 11Ilii-llu ciqertaulluku ekuavigmun akluinun-llu malrunlerqunek. Ermigcuun cali-llu uitavia tuaten piluku, tua-i-wa allakarluki Atanermun. 12Ilii-llu cali kuvluku Aaron-aam qamiqurranun allakaumalriarurtelluku Atanrem caliaranun. 13Cali-llu Moses-aam Aaron-aam qetunrai tailluki ac'etai 'lumarrarnek naqugucirluki nacarluki-llu, Atanrem ellminun alerquutellra aturluku.

14Tua-i Moses-aam taitaa kuluvak assiilnguum au͡gautekaanun elliitekaq; Aaron-aam-llu qetunrain-llu unateteng elliit qamiqurranun kuluviim. 15Moses-aam-llu tuqutaa kuluvak, augan-llu iliinek piluni yuaramikun mingugai ekuaviim qaingan kangiraini anngalriit, tanqigcarluki, kuvluku-llu ilakuani auk ekuaviim acianun kencignarivkarluku menuircarluku-llu. 16Tegui-llu tamalkuita qiluin uqui, tenguan-llu picalqurra, tartuk-llu uqurtuumakenka. Tamakut Moses-aam ekuagai ekuavigmi. 17Tau͡gken kuluviim temii, amia, kemgi, qilui-llu, tamalkuita ekuagai kenerkun elatiitni nunat Atanrem alerqullruciatun Moses-aaq.

18Cali Moses-aam taitaa qusngim angucalua ekuagarkaq, Aaron-aam-llu qetunrain-llu elliluki unateteng qamiqurranun qusngim angucalum. 19Moses-aam-llu tuqulluku, ciqertaulluku-llu auga qacarnerinun ekuaviim. 20Qusngim angucalua itumcimarian Moses-aam ekuagai qamiqurra natai-llu itumumalriit uqua-llu. 21Qilui-llu irui-llu mermek eruumariata Moses-aam ekuagaa tamalkuan qusngim angucalua Atanrem alerqullruciatun; ekualuku elliitnguluni tepii narniqluni Atanermun.

22Tuamta-llu cali Moses-aam taitaa qusngim angucalum aipaa, agayulirtekat naaqitellratnun atuulria; Aaron-aam-llu qetunrain-llu unateteng elliluki qamiqurranun. 23Moses-aam-llu tuqutaa, augan-llu ilii minguulluku tallirpilirnerem ciutiin nuuganun, tallirpilirnermun-llu ayautiinun, tallirpilirnermun-llu putukuanun. 24Aaron-aam-llu qetunrai iluvaulluki Moses-aam mingugai augmek tallirpilirneret ciutaita nuugit, tallirpilirneret-llu ayautait, tallirpilirneret-llu putukuit. Ilii-llu ciqertaulluku ekuaviim avatiinun. 25Uqua tegua uqurilria-llu pamyua, qiluin-llu uquat tenguan-llu picalqurra, tartuk-llu uqurtuumakenka, tallirpilirneq-llu kingulirneq irua; 26issratem-llu iluanek tegulluni quulecirailngurnek allakaumalrianek Atanermun, ataucimek-llu cali kelipamek uqirluku pimalriamek, ataucimek-llu cali mamkilngurmek cake-aayaarmek. Taukut ellii qaingatnun uqut tallirpilirnerem-llu kingulirneran iruan. 27Makut tamalkuita tunai Aaron-aamun qetunrainun-llu, ellaita-llu elliitekluki Atanermun. 28Moses-aam-llu teguluki ellaitnek ekuagai ekuavigmi ilaulluki ekualuki elliitnun, naaqicimallrat pitekluku agayulirtet elliitnguluni, tepii narniqluni Atanermun. 29Moses-aam-llu teguluku ungungssim qat'gaa elliitekaa Atanermun. Tauna-llu naaqiciyaramun elliitngullrem angucalum qusngim qat'gaa elliin Moses-aam pikarkauluku, tuaten Atanrem alerqullruciatun.

30Moses-aaq tegulluni mingugcuutem uqum iliinek, augem-llu cali iliinek ekuaviim qainganelngurnek, ciqertarai tuaken Aaron-aaq, qetunrai aturait-llu, kencignarcarluki.

31Moses-aam-llu qanrutai Aaron-aaq qetunrai-llu, “Kenirci qallarvautelluki kemegmek, amiigani Pelatekam Agayuuviim nerniartuci tuani tapirluci kelipamek issratem iluanek, imalegmek agayulirtet naaqicimallerkaatnun elliitekumalrianek Atanrem alerquutekellruciatun qanerluni, ‘Aaron-aam qetunrain-llu nerciqait.’ 32Ilakuartangqerqan kemegmek kelipamek-llu kenerkun ekuaniaci. 33Amiiganek-llu Pelatekam Agayuuviim natmun ayagyaqunaci malrunlegni ernerni naaqicimallerpeci erenri naanatkaatnun, erenret malrunelgen aturluki naaqicimaarkaungavci. 34Unuamek makut caliaqelput Atanrem alerquutekellrui pisqelluki assiilngurpecen̄ek au͡g'aricimallerkarci pitekluku. 35Amiigani Pelatekam Agayuuviim uitaurciquci malrunlegni ernerni unugtuumaita, caliluci Atanrem alerquutekellrinek; tuaten pinrilkuvci tuquciquci. Tuaten wiinga Atanrem alerqullruanga.” 36Tua-i Aaron-aam qetunrain-llu tamalkuita alerquutekumallret aturait Atanrem pisqutkellri Moses-aakun.

Yupik Bible

Yupik Bible © 2012 American Bible Society

More Info | Version Index