Search form

Leviticus 9

Aaron-aaq Elliiguq Ekualuki

1Pingayunelgatni erenret Moses-aam taisqai Aaron-aaq qetunrai-llu ciulirnerit-llu Israel-aam yuin. 2Qanrutaa-llu Aaron-aaq, “Kuluvayagarmek angucalumek piluten assiilnguum au͡gautekaanun elliitekamek qusngim-llu angucaluanek ekualuku elliitekamek, tamarmek natlugnerilnguugnek elliitekikek Atanermun. 3Qanrulluki-llu Israel-aam yui, ‘Taiskici angucalumek qusngirngalngurmek elliitekamek assiilnguum au͡gautekaanun, kuluvayagarmek-llu cali-llu qusngiyagarmek, tamarmek allrakunglutek ataucimek natlugnerunatek-llu ekualukek elliitekagnek. 4Cali-llu kuluvagmek angucalumek-llu qusngimek elliitnguarkagnek ilakuyucimun, ekuagarkaulukek elliiteklukek Atanermun, cali-llu elliitekamek mukaamek uqiumalriamek, tua-i-wa unuamek Atanrem alairvikciqngaci.’”

5Moses-aam-llu alerquutekellri taitait ciuqerranun Pelatekam Agayuuviim, tamarmeng-llu yuut iluvaqanirluteng nangengqaut ciuqerrani Atanrem. 6Moses-aaq-llu qanerluni, “Makut maa-i Atanrem alerquutekellri elpecen̄un atuusqelluki ucurnarqucimikun alairviknaluci.” 7Moses-aam-llu tua-i Aaron-aaq qanrutaa, “Ekuavigmun piluten elliitekiu assiilnguum au͡gautekaanun elliin aipaa-llu ekuagarkaq elliin, assiilnguten yuut-llu assiilnguit au͡gaumaniartut. Waten elliigi yuut assiilnguitnek au͡g'aricesqelluki, tuaten Atanrem alerqullruciatun.”

8Tua-i Aaron-aaq ekuaviim canianun piluni tuqutaa elliitekaq assiilnguni pitekluki elliitnguarkaq ekualuku. 9Qetunrain-llu Aaron-aam tunaat auk elliinun, tek'ni-llu akurrluku mingugai ekuaviim qaingan kangiraini anngalriit ilakuani-llu kuvluku acianun. 10Tau͡gaam uquq tartuk-llu tenguan-llu picalqurra ekuagai ekuavigmi Atanrem alerquutekellruciatun Moses-aamun. 11Kemga-llu amia-llu ekuagai elatiitni nunat.

12Cali-llu tuqutaa ekualuku elliitekaq, Aaron-aam-llu qetunrain auga elliinun tunluku, elliin-llu ciqrulluku ekuaviim avatiinun tamalkuan. 13Temii-llu itumcimalria taitaat atauciugurluki, qamiqurra-llu ilakluku, elliin-llu ekualuki ekuaviim qaingani. 14Erurluki-llu qilui irui-llu, ekualuki-llu ilakluki ekuagarkanun elliitnun ekuaviim qainganelngurnun.

15Taum kinguakun cikiutekai yuut elliitait, teguamiu-llu qusngirngalnguq assiilnguum au͡gautekaanun elliitekaq tuqutaa elliitekluku-llu assiilngurmun elliitekauluku, ciuqlirmi tuaten pillrucimitun. 16Cikiutekaa-llu ekualuku elliitekaq picirkiutet aturluki. 17Cikiutekluku-llu mukaarkaq elliitekaq unatni imirluki tuaken ekualuku-llu ekuavigmi, ilakluku allakaan unuaquaqan elliitngutulimun. 18Tuqutak-llu kuluvak angucaluq-llu qusngiq yuut elliitekellregket ilakuyucimun; Aaron-aam-llu qetunrain taitaat augak elliin-llu ciqrulluku ekuaviim avatainun tamalkuan. 19Tua-i-llu uquak kuluviim qusngim-llu pamyukek-llu uqurtuumakenka, cali-llu qilukenka tartukenka-llu uquak tenguan-llu picalqurra, 20tamakut uqut qat'gainun elliluki agutai ekuavigmun, ekualuki-llu. 21Tau͡gaam qat'gak tallirpilirneq-llu kingulirneq irua, Aaron-aam elliitekak Atanermun agayulirten̄un pikarkauvkarluki, Moses-aam alerquutekellruciatun.

22Aaron-aam-llu talligni naluglukek tungiitnun yuut atawaqaasqai; atrarluni-llu elliitekraarluku assiilnguum au͡gautekaa, ekualuteng-llu piarkat cali-llu ilakuyucimun elliitekaq. 23Tua-i-llu Moses-aaq Aaron-aaq-llu aglutek Pelatekamun Agayuvigmun; tuaken-llu anngamek atawaqaasqutmek yuut piluki, ucurnaan-llu Atanrem alairvikluki tamalkuita yuut. 24Atanrem-llu alqunaq keneq tuc'etaa ekualuki taukut ekuagarkat uqut-llu qainganelnguut ekuaviim; yuut-llu tamarmeng tangrramegteggu qayagpagtut cikluteng-llu nunamun palurrluteng.

Yupik Bible

Yupik Bible © 2012 American Bible Society

More Info | Version Index