Search form

Numbers 1

Naaqumaqerraallrat Israel-aat

1Erenret ciuqliatni iralum aipaan allrakum-llu aipaani Israel-aam yuin anellrata Egypt-aamek, Atanrem qalarutaa Moses-aaq Pelatekam Atanrem alailarvian iluani uitallrani Sinai-am yuilqurrani, qanerluni, 2“Aaron-aaq-llu naaqeciqatek Israel-aam yui naumavillgutkelriit ilakuralriit-llu. Igaulluki angutet atrit tamalkuita 3allrakungelriit yuinarmek wall'u cipluku anguyagten͞guyugngarilriit. 4Ikayurtekarpetegnek pilutek naumavillgutkelriit ciuliqagtaitnek.” 5Waniwa ukut angutet, ciuliqagten͞gulriit kinguveqellriartameggni, cucukumaluteng nunanek man'a caliaqumallrani: Reuben-aam kinguvrinek, Elizur-aaq qetunraa Shedeur-am; 6Simeon-aam kinguvrinek, Shelumiel-aaq Zurishaddai-am qetunraa; 7Judah-m kinguvrinek, Nahshon-aaq Amminadab-aam qetunraa; 8Issachar-am kinguvrinek, Nethanel-aaq Zuar-am qetunraa; 9Zebulon-aam kinguvrinek, Eliab-aaq Helon-aam qetunraa; 10Joseph-aankuk-llu Ephraim-aaq-llu kinguvekegnek, Elishama Ammihud-aam qetunraa, Manasseh-m-llu kinguvrinek, Gamaliel-aaq Padahzur-am qetunraa; 11Benjamin-aam-llu kinguvrinek, Abidan-aaq Gideoni-m qetunraa; 12Dan-am-llu kinguvrinek, Ahiezer-aaq Ammishaddai-am qetunraa; 13Asher-aam-llu kinguvrinek, Pagiel-aaq Ochran-aam qetunraa; 14Gad-am-llu kinguvrinek, Eliasaph-aaq Deuel-aam qetunraa; 15Naphtali-m-llu kinguvrinek, Ahira Enan-aam qetunraa. 16Ukut waniwa cucukumallret yum'eggnek, ciuliqagten͞guarkauluteng ilameggnun, ciuqliuluteng naumallgutkelriartainun Israel-aam yuin.

17Ikayuqluki ukut apertuumalriit Moses-aankuk Aaron-aaq-llu 18quyurcetait yuut tamalkuita erenrin ciuqliatni iralum aipaan, igaulluki-llu yuut naumavillgutkelriit ilakuralriit-llu. Naaqluki atrit-llu igaulluki angutet yuinarmek allrakungellratnek ayagluki. 19Atanrem alerquutii aturluku Moses-aam naaqellrui yuut Sinai-am yuilqurrani. 20-46Angutet yuinarmek allrakungellermeggnek ayagluteng anguyagten͞guyugngalriit igausngallruut atrit naumaviitgun nakmiin-llu ilaitgun, ayagneqluki Reuben-aam kinguvri Jacob-aam anngaqliq qetunraa. Waten amllertaut: Reuben-aam kinguvrinek yuinaak malruk arvinlegnek cipluku tiissitsaat, tiissitsaam-wa avga (46,500); Simeon-aam kinguvrinek yuinaak malruk yuinaunrita'armek cipluku tiissitsaat, yuinaat-wa akimiaq (59,300); Gad-am kinguvrinek yuinaak malruk tallimanek cipluku tiissitsaat, tiissitsaam-wa avga yuinaat malrunelgen qulmek cipluku (45,650); Judah-m kinguvrinek yuinaat pingayun akimiarunrita'armek cipluku tiissitsaat, tiissitsaam avga yuinarnek tallimanek cipluku (74,600); Issachar-am kinguvrinek yuinaak malruk akimiarunrita'armek cipluku tiissitsaat, yuinaat-wa yuinaat (54,400); Zebulon-aam kinguvrinek yuinaak malruk akimiaq malrugnek cipluku tiissitsaat yuinaat-wa yuinaat (57,400); Ephraim-aam kinguvrinek yuinaak malruk tiissitsaak tiissitsaam-wa avga (40,500); Manasseh-m kinguvrinek yuinaq qula malrugnek cipluku tiissitsaat, yuinaat-wa qulen (32,200); Benjamin-aam kinguvrinek yuinaq akimiarmek cipluku tiissitsaat, yuinaat-wa yuinaat (35,400); Dan-am kinguvrinek yuinaat pingayun malrugnek cipluku tiissitsaat, tiissitsaam avga yuinarnek qulnek cipluku (62,700); Asher-aam kinguvrinek yuinaak malruk ataucimek cipluku tiissitsaat, tiissitsaam-wa avga; (41,500) Naphtali-m kinguvrinek yuinaak malruk pingayunek cipluku tiissitsaat, yuinaat-wa yuinaat (53,400). Tapeqluteng amllertaluteng tiissitsaam avga yuinaat talliman pingayunek cipluku tiissitsaat, tiissitsaam-wa avga yuinaak malruk qulnek cipluku (603,550).

47Levite-at tau͡gaam igausngallrunritut naumavimegteggun tamakucetun, 48Atanrem qanrutellruaku Moses-aaq, 49“Naaqekuvki angutet anguyagten͞guyugngalriit, Levi-am kinguvri ilaksaqunaki. 50Pelatekaq Atanrem alailarvigkaa ellaitnun ataniumavkaqiu aklui-llu tamalkuita. Ayagat'larniaraat ellaita kevgiuraqluteng-llu tuani, arulairumaaqameng-llu avatiini uitaaqluteng. 51Upagaqavci Levite-at Pelatekaq imtelarciqaat, napartaqluku-llu arulairaqavci allamun. Tau͡gaam yuk alla Pelatekam mallgeskiinun pikan tauna tuqucimaarkauguq. 52Israel-aam yui arulairumaaqameng quyuqetaarluteng pilarciqut, quyungqalriit nallunailkutangqerturluteng ellaita pimeggnek. 53Tau͡gaam Levite-at uitalarciqut avatiini Pelatekam, murilkesten͞guluteng yugnun mallegnayukluku, Agayutmun-llu qenqerrutnayukluki tuaten pikata.” 54Tuaten pillruut Israel-aam yui Atanrem alerquutellri Moses-aamun maliggluki.

Yupik Bible

Yupik Bible © 2012 American Bible Society

More Info | Version Index