Search form

Numbers 10

Qerrirlit Cupu'uryarat

1Ataneq qanertuq Moses-aamun, 2“Pilikina malrugnek cupu'uryaragnek mulut'uugumalriamek qerrirlimek yuut qayagaurcuutekaatnek upagnariaqan wall'u quyurrnariaqata. 3Tamarmek cupumaaqagnek taktuamek yuut quyurtelarniartut elpenun Pelatekam ciuqerranun. 4Tau͡gken atauciq cupu'uryaraq cupumaaqan ciuliqagten͞gulriit Israel-aam yuinun kiimeng quyurtarkauluteng. 5Nanilnguarnek cupu'uryaraq qalriagaqan calaralirnermelnguut naumavillgutkelriit upagluteng ayalarciqut. 6Nanilnguarnek-llu qalrianqigeskan ungalalirnermi uitalriit upagluteng. Tua-i tuaten nanilngurnek qalriagaqan yuut nallunrit'larciqaat upaasqucirteng, 7tau͡gaam taktuamek qalriagaqata yuut quyurtelararkauluteng. 8Aaron-aam qetunrain agayulirtet cupu'uryarat cup'larciqait. Man'a-llu cupu'uryaratgun pilallerci picirkiutnguarkauguq taqsuunani elpecen̄un kinguverpecen̄un-llu tamalkuitnun. 9Anguyakuvci-llu ingluliurluki curugteci, cupu'uryaraq cupkiciu elpengcarissuutekluku anguyagarkanun, wiinga-llu Ataneq Agayutevcen̄i, ikayurluci anirturniamci inglukestevcen̄ek. 10Cali-llu angnirnarqellriit nalliitni nerevkariyararpecen̄i-llu cupu'uryarat cup'larniaci, iralut ayagnillratni, elliigaqavci ekualuki, cali-llu elliigaqavci ilakuyucimun. Nutaan wiinga ikayurniamci. Wiinga Atanruunga elpeci Agayutkarpecia.”

Israel-aam Yui Uptut Upakatarluteng

11Yuinaurtellratni erenrin iralum aipaan, allrakum aipaani ayaggaanratnek Egypt-aamek, amirluq naluumauq Pelatekamek. 12Israel-aam-llu yuin ayagniraat ayallerteng Sinai-am yuilqurtaanek. Amirluq-llu arulairluni Paran-aam yuilqurtaanun.

13Ayagallerteng ayagniraat ayakarraarluteng Atanrem alerquutii Moses-aakun aturluku. 14Ayagaqameng tungliqutacirmegcetun ayalartut. Judah-mek nauvilget nallunailkutaanek-llu atulriit allakaqtaarluteng ciumek ayalartut, Nahshon-aamek Amminadab-aam qetunraanek atanerluteng. 15Nethanel-aam Zuar-am qetunraan ataniumaluki Issachar-amek naumavilget. 16Eliab-aam-llu Helon-aam qetunraan ataniumaluki Zebulon-aamek nauvilget.

17Nutaan-llu Pelatekaq imtelaraat, Gershon-aankuk-llu Merari-llu yuk'enka ayaulluku ayalartut.

18Tungliuluteng ayatulit Reuben-aamek nauvingqellriaruut, cali ukut allakaqtaarluteng quyungqaaqluteng, ayatuluteng Elizur-aamek Shedeur-am qetunraanek atanerluteng. 19Shelumiel-aaq-llu Zurishaddai-am qetunraa atanruluni Simeon-aamek naumavilegnun. 20Eliasaph-aaq-llu Deuel-aam qetunraa Gad-amek naumavilget ataneqluku.

21Taukut-llu kinguatgun Levite-at Kohath-amek naumavilget ayalartut, kencignarqellrianek ayagaciluteng. Ukut-llu arulaillerkaatnun tekipailgata Pelatekaq napartelaraat.

22Taukut-llu tungiitgun Ephraim-aamek naumavilget nallunailkutaanek-llu pilget ayalartut quyungqalriit allakaqtaarluteng, Elishama-mek Ammihud-aam qetunraanek atanerluteng. 23Gamaliel-aaq-llu Padahzur-am qetunraa atanruluni Manasseh-mek naumavilegnun. 24Abidan-aaq-llu Gideoni-m qetunraa Benjamin-aamek naumavilegnun atanruluni.

25Nangenruluteng-llu Dan-amek naumavilget nallunailkutaanek-llu atulriit ayalararkauluteng murilkesten͞guluteng kinguatgun ciuqlimeng, allakaqtaarluteng ilakellriit quyungqaaqluteng, Ahiezer-aamek Ammishadai-am qetunraanek atanerluteng. 26Pagiel-aaq-llu Ochran-aam qetunraa atanruluni Asher-aamek naumavilegnun, 27Ahira-llu Enan-aam qetunraa Naphtali-mek naumavilegnun atanruluni. 28Waten tungliqutacirmegcetun upagaqameng ayalartut Israel-aam yui, ilakellriit quyungqaaqluteng allakaqtaarluteng.

29Moses-aam-llu cakini Hobab-aaq Reuel-aam Midian-aarmium qetunraa qanrutaa, “Ayakatartukut nunamun Atanrem waten wangkutnun qanrutkellranun, ‘Wiinga elpecen̄un cikiutekciqaqa’; maligeskut elluarrluten piniamteggen, Atanrem akqellruakut canek enuqisngaitniluta.” 30Hobab-aam tau͡gaam kiugaa, “Ayagngaitua; nakmiin tau͡gaam ilamnun nakmiin-llu nunamnun ayagciqua.” 31Moses-aam cali pia, “Kaigavikamken unicaqunata, yuilqumi arulairvigkarnilriit nallunrilavki, apertuastekniamteggen-llu. 32Maligeskuvkut atawaqautnek Atanrem cikiutainek wangkutnun avguciiqamteggen.”

Yuut Ayagtut

33Tua-i ayagtut ernerni pingayuni Sinai-amek qigcignarqellriamek ingrimek. Akqutem Yaassiiga ciunratgun ayalartuq arulairvigkaatnek yuarluni. 34Upagaqata-llu Atanrem amirluan erenrani nayularai quliitni uitaluni.

35Akqutem Yaassiiga ayagaqan Moses-aaq qanlartuq, “Makluten, Ataneq, cekaveski inglukesteten, qimagtelluki eq'ukesteten.” 36Arulairaqan-llu cali qanraqluni, “Uterten, Ataneq, tiissitsaanun ilakuralriarinun Israel-aam.”

Yupik Bible

Yupik Bible © 2012 American Bible Society

More Info | Version Index