Search form

Numbers 11

Nuna Taberah-mek At'lek

1Yuut qanemyuugartut picurlagallermeggnek niitelluteng Atanermun, Atanrem-llu eq'uqertellermini keneq ekuavkaraa akuliitgun piunrirluku uitaviata ilii elalirnermi uitalria. 2Yuut-llu Moses-aaq qayagauratni ikayuusqelluteng piicagvikaa Ataneq, keneq-llu tamana nipluni. 3Taumek nuna tauna acillruat Taberah-mek, tuani Ataneq ekuagivkallruan akuliitni.+

Moses-aaq Cucuklirtuq Yuinaat Pingayun Qulnek Cipluku Ciuliqagten̄ek

4Allanernek maligutellriartangqertuq Israel-aam yuinun. Tamakut kemegnek neryunqeggluteng, kiituani Israel-aam-llu yui taukut maliggluki qanemyuugangut: “Waniwa-kina kemegmek neqkangqerrli! 5Egypt-aami-ggem neqnek nerlallruukut akiinaki piyugtacimcetun, naunrarnek-llu ayuqenrilngurnek ner'aqluta. 6Tau͡gken maa-i pinialiluta. Camek allamek neqkaunata, makunek tau͡gaam manna-nek ner'aqluta unuaquaqan!” 7(Tamakut manna-t ayuqut naucetaarkayagartun, qaterrlugluteng esirrlugcen̄ateng. 8-9Yukutaq maliggluku nunamun tut'elartut unugmi. Unuaquani-llu yuut avulartut tamakunek arilluki-llu mukaarurqaarluki qallautelluki egatni, cake-aayagiluteng-llu; ner'aqaceteng ayuqluteng kelipatun uucimalriatun olive-aat uquatnek avuluki.) 10Moses-aam-llu niitai yuut quyuqetaarluteng qanemyuugalriit pelatekameng amiigitni. Uitacurlagtuq-llu, tua-i-wa Atanrem qenrucaki taukut yuut. 11Ataneq-llu qanrutaa, “Ciin assiilliqevkarcia? Ciin ilukegcitkenricia? Ciin-llu cikillrusia aulukillerkamnek ukunek yugnek? 12Wiinga piliaqellrunritanka yuurcetellruvkenaki-llu! Ciin anglicartaicetun pitarrlua mikelngurtun kevegluki ayagatesqessiki tekiutellerkaatnun tuavet nunamun akqutkellerpenun ciuliaritnun? 13Naken-llu ukut yuut kemegturkaitnek piqatarcia, kaigalriit qialuteng kemegturkameggnek pisqelluteng? 14Wiinga kiimenii ukut yuut auluklerkaat arturaqa; cakviurnarquq cakneq man'a wangnun! 15Waten ayuqlua aulukqataquvnga takumcuklua tuquvkarnga, eq'urruten man'a wiinga atunrirniarqa.”

16Atanrem qanrutaa Moses-aaq, “Quyurceski yuinaat pingayun qulnek cipluku (70) ciulirnerulriit atanerruaruluteng-llu Israel-aam yuinun; tailluki Pelatekamun nangengqallgucircetniartuten tuani. 17Wiinga atrarciqua qalarucarturluten tuani; anernerem iliinek cikiutekellma elpenun cikirciqanka, ikayuryugngariniaraatgen aulukillerpeni ukunek yugnek, kiivet pinrirluten. 18Waniwa qanruski yuut, ‘Menuircarci unuaqullerkamun; kemegmek neqkangqerciquci. Qanemyuugarpakallerci niilluku Atanrem unuaqu kemegturcetqataraaci, qanlaavci, “Kia kemegturceciiqakut?” Umyugiurluci-llu pilallruniluci Egypt-aami. Taumek Atanrem kemegturkarpecen̄ek cikirciqaaci, elpeci-llu nerciquci pinritevkenaci. 19Nerngaituci kiingan ataucimi ernermi wall'u malrugni wall'u tallimani wall'u qulni wall'u cali ernerni yuinarni, 20tau͡gaam iralurrluci nerciquci kiituan ner'arpeci ilii maq'languq, miryalngukengluku-llu neqkarci. Watnaciquci qessakngavciu Ataneq nayurtessi qanemyuugaraqluci-llu tungiinun qanerluci, “Ciin tanem wangkuta Egypt-aamek ayallruceta?”’” 21Tau͡gaam Moses-aaq qanertuq, “Yuut ilaliq'nganka amllertaut tiissitsaam avga, yuinaat-wa talliman tiissitsaat (600,000). Tau͡gken elpet qanerluten, ‘Wiinga kemegturkaitnek cikirciqanka iralumi ataucimi ner'arkaitnek.’ 22Tuqurqiciqukut-qaa kuluvagnek qusnginek-llu ukut yuut camirrluteng neqkaitnek? Imarpiim-llu-qaa neqai camiruteksugngait?”

23Atanrem-llu kiugaa Moses-aaq, “Wiinga-qaa piniqa engelengqertuq? Waniwa tangrrarkaugan qanelqa piciurtelluku wall'u piciurtevkenaku!”

24Tua-i Moses-aam anluni qanrutai yuut Atanrem qanellrinek. Quyurtelluki-llu yuinaat pingayun qulnek cipluku ciulirneret nangertelluki-llu Pelatekam avatiinun. 25Ataneq-llu atrarluni amirlukun qalarulluku. Anernerem-llu ilii Moses-aamun cikiutekellmi tunaa taukunun ciulirnernun. Taukut-llu anernerem tuc'ateng prophet-aatun qayagaut tau͡gaam ak'anun pivkenateng. 26Malruk tau͡gaam ciulirneret ilagket Eldad-ankuk Medad-aaq-llu nunameggni uitallruuk Pelatekamun agevkenatek. Tuanlengraagnek anernerem tut'ellruak elkek-llu cali tuaten prophet-aatun qalarrlutek. 27Ayagyuat iliita aqvaqurluni qanrucarturaa Moses-aaq Eldad-ankuk Medad-aaq-llu pillragnek. 28Joshua-m-llu Nun-am qetunraan, Moses-aam kevgaan ayagyuarraanranek, qanrutaa Moses-aaq inerquusqellukek.

29Moses-aam kiugaa, “Ciknakutan-qaa tamana wangnun? Wiinga-wa umyuamkun Atanermun anernera cikiutekesqumayaaqaqa yugnun tamalkuitnun, prophet-aatun qayagasqelluki!” 30Moses-aaq-llu taukut-llu ciulirneret utertut yuut uitaviatnun.

Atanrem Taivkarai Yaqulget

31Atanrem-llu anuqenga'arcetaa, anuqa-llu iluvaulluni yaqulegnek imarpigmek, tengaurluteng nunam qul'ariikun. Mill'uteng-llu taukut uitaviatnun avatiinun-llu, yaqulgurrluku avatiit yaaqvanun. 32Taumek tuani ernermi ernerpak unugpak-llu, unuaquani-llu yuut caliut yaqulegnek quyurciluteng; tamarmeng-llu yuinaak malruk qulnek cipluku (50) assigtat bushel-aat nurtevkenaki. Uitavimeng avatiitnun tamakut saggluki kinercirait. 33Neqkalillrata nalliini Atanrem qenrutai cangerliqevkarluki-llu. 34Taumek uitallrat aciraat Kibroth Hattaavah-mek+ tua-i-wa tungmagtellruamegteki tuavet kemegmek neryuumillret.

35Tuaken ayiimeng yuut arulairtut Hazeroth-amun.

Yupik Bible

Yupik Bible © 2012 American Bible Society

More Info | Version Index