Search form

Numbers 12

Miriam-aam Anucimirqecetaarumallra

1Moses-aaq nulirturtuq Cush-armiumek arnamek, Miriam-aankuk-llu Aaron-aaq-llu cangakuuraak tauna pitekluku. 2Waten qanerlutek, “Ataneq-qaa qanlartuq Moses-aakun kiingan? Qanlanrituq-qaa wangkugnegun-llu?” Atanrem-llu niitak tuaten qanellragni. 3(Moses-aaq ellminek pivakellriarunrituq, elliitun pitalriamek tuaten ayuqellriartaunani ellam yuini.) 4Piqatarraarpek'nani Atanrem qanrutai Moses-aaq, Aaron-aaq, Miriam-aaq-llu, “Agici pingayuuluci Pelatekamun.” Tua-i ag'ut. 5Ataneq-llu atrarluni amirlukun nangerrluni Pelatekam amiiganun qayagaurak Aaron-aankuk Miriam-aaq-llu. Elkek-llu iluvaqanirlutek, 6Ellii-llu qanertuq, “Niicugnitki qanellrenka! Prophet-aartangqerqan akunlevcen̄i, nallunrircet'lartua ellaitnun canek tangaavkarluki qalarutaqluki-llu qavanguitgun. 7Tau͡gaam tuaten piyuitaqa pisteka Moses-aaq; aulukilriarurcetellruaqa yumnek Israel-aam yuinek tamalkuitnek. 8Taumek wiinga tungaunaku qalarut'laqka taringnaqlua, taringnailngurkun pivkenii. Elliin-llu ayuquciqa tangellrua. Ciin alingevkenatek qaneksugutekset'gu pisteka Moses-aaq?”

9Atanrem qenrutak, unillukek-llu ayagluni. 10Amirluq-llu mayuan Pelatekam quliinek alqunaq mamyuilnguum apqucim Miriam-aaq tutaa, qainga-llu qanikcartun qatertariluni. Aaron-aam-llu tangrramiu Miriam-aaq mamyuilngurmek apqucirluku 11Moses-aaq qanrutaa, “Nangteqevkanrilkuk anucimirqecetaarlunuk umyugailkarrlunuk assiilngillerpuk pitekluku. 12Tuqumaluni yuurtellertun ayuqevkanrilgu, kemgan ilii arumaluni.”

13Moses-aam-llu qayagaura Ataneq, “Agayun, canrircessgu!”

14Ataneq kiuguq, “Atiin qecillrukaku kegginaakun kiaresngiacartuq ernerni malrunlegni. Taumek ernerni malrunlegni uitavkaqiciu yuut uitaviata elatiini, tuaten pimarikuni ataam iterniartuq yuut uitaviatnun.” 15Miriam-aaq-llu yuut uitaviata elatiini uitallruuq ernerni malrunlegni. Yuut-llu upaksaitellruut Miriam-aam iteryugngarinatkaanun. 16Hazeroth-amek-llu upiimeng Paran-aam yuilqurtaanun arulaillruut.

Yupik Bible

Yupik Bible © 2012 American Bible Society

More Info | Version Index