Search form

Numbers 13

Nunamek Paqtellret

1Ataneq qanertuq Moses-aamun, 2“Ayagcecikina angutnek paqtelluku nuna Canaan-aaq cikiutekaqa Israel-aam yuinun. Naumavillgutkelriit qula malrugnek cipluku ciuliqagtaita ilaitnek cucuklirluten.” 3Tua-i Moses-aam ayagcetai Paran-aam yuilqurtaanek Atanrem pisquciatun makut maa-i ciuliqagtaita ilait Israel-aam yuin: 4Reuben-aamek naumavilegnek Shammua Zaccur-am qetunraa; 5Simeon-aamek naumavilegnek Shaphat-aaq Hori-m qetunraa; 6Judah-mek-llu naumavilegnek Caleb-aaq Jephunneh-m qetunraa; 7Issachar-amek naumavilegnek Igal-aaq Joseph-aam qetunraa; 8Ephraim-aamek naumavilegnek Hoshea Nun-am qetunraa; 9Benjamin-aamek naumavilegnek Palti Raphu-m qetunraa; 10Zebulon-aamek naumavilegnek Gaddiel-aaq Sodi-m qetunraa; 11Manasseh-mek naumavilegnek Gaddi Susi-m qetunraa; 12Dan-amek naumavilegnek Ammiel-aaq Gemalli-m qetunraa; 13Asher-aamek naumavilegnek Sethur-aq Michael-aam qetunraa; 14Naphtali-mek naumavilegnek Nahbi Vophsi-m qetunraa; 15Gad-amek naumavilegnek Geuel-aaq Machi-m qetunraa. 16Makut maa-i angutet atrit Moses-aam ayagcetellrin paqtelluku nuna. Moses-aam-llu Hoshea Nun-am qetunraa acinqigtaa Joshua-mek. 17Moses-aam ayagcetai paqtelluku Canaan-aam nunii qanrulluki, “Ayakici Negeb-aaq tekilluku nunam-llu qemilingellranun. 18Nallunaiqiciu qaillun nunam ayuqucia, yuut-llu tamaani uitalriit qaillun pinirtaciit, qaillun-llu amllertaciit. 19Qaillun-llu nunam uitaviata assirtacia wall'u assiitetacia, yuut-llu uitaviit nunaqainauciit wall'u anguyagyailkuciumaluteng. 20Nunam-llu naungignarqucia cali-llu napangqerrucia. Pinritevkenaci-llu tamatum atsainek taitniartuci.” (Taum nalliini wine-arkat atsat ciuqliit qecugnarillrata nalkellrua.)

21Taukut-llu angutet negetmun ayagluteng nuna paqtaaraat Zin-am yuilqurranek ayagluteng ungalalirnermi Rehob-aq tekilluku, malleggluku kuignayuk ingrik akuliik Hamath-aaq neglirnermi. 22Ungalalirneranun nunam ciumek pirraarluteng ayallruut Hebron-aaq tekilluku; tuani-llu uitallruut ilakellgutkelriarit Ahiman-aankut Sheshai-ankut Talmai-ankut-llu, yugpiit Anakim-aanek atellget kinguvrit. (Hebron-aaq nunaurtellruuq allrakut malrunelgen ciungakun Zoan-am Egypt-aami.) 23Kuignayugmun Eschol-amun tekitellermeggni keputellruut atauciinek quyuqucunguanek wine-arkanek atsanek. Taukut-llu uqamaitessiyaagata muragmek qugcuucirluki malruk yuuk akunleqmigluki ayautait; cali-llu allanek atsanek promegranate-anek figs-aanek-llu taukut tapirluki ut'rulluteng. 24(Tauna kuignayuk acillruat Eschol-amek,+ wine-arkat atsat Israel-aam yuin tuaken qecullrit pitekluki.)

25Ernerni yuinaagni malrugni (40) nuna paqtaarraarluku taukut utertellruut. 26Tekicameng-llu ullagait Moses-aaq Aaron-aaq, yuut-llu Paran-aam yuilqurrani Kadesh-aami qanemcilluki-llu tangllermeggnek, nasvilluki atsainek tamatum nunam ut'rutlermeggnek. 27Qanrulluku-llu Moses-aaq, “Nuna paqtellerput naungignarqellriaruuq enuqitnaunani, makunek-llu atsarluni. 28Tau͡gaam yui tamatum pinilriarulliniut nunarpait-llu angluteng asvairqumaluteng-llu. Tau͡gaam arcaqanrulriaruut tangelput yugpiit Anakim-aat kinguvrit. 29Amalekite-at Negeb-aam nuniini uitaut, ukut-llu Hittite-at, Jebusite-at, Amorite-at-llu qertulriami (qemini) nunami uitaluteng; Canaanite-at-llu imarpiim cen̄iini Jordan-aam-llu cen̄iini uitaluteng.”

30Caleb-aam nepairai qanemyuugautestai Moses-aam, qanerluni-llu, “Ayagnaurtukut waniwa nuna piksagutniarput, tamakut yuut cirlaksugngaaput.”

31Tamakut tau͡gaam elliinun maligutellret qanertut, “Wangkuta ingluliurciigataput tamakut yuut, pininruata wangkutni.” 32Taukut-llu piciunrilngurnek qanengssagnek sagciut Israel-aam yuinun nunamek paqtellermeggnek, qanerluteng, “Nuna tamana naugisciigatuq neqkanritnek tamaani yuut. Yuut-llu tangelput sugturrlainarluteng. 33Yugpagnek-llu tangellruukut Anakim-aam kinguvrinek. Tamakut angem ugaani tayima ellaitni wangkuta ciissiyagartun pitaukut.”

Yupik Bible

Yupik Bible © 2012 American Bible Society

More Info | Version Index