Search form

Numbers 15

Alerquutet Elliiyaramun Tuqutarkanek Ungungssinek

1Atanrem Moses-aaq cikiraa, 2makunek Israel-aat picirkaitnek nunamun itqata cikiutekarkaminun ellaitnun: 3“Kuluvak nulirta, angucaluq qusngiq, qusngiq wall'u qusngirngalnguq elliiteksugngaaci Atanermun ekuagarkauluki wall'u tuqutarkauluki akqutkellerpecen̄un, wall'u piyuumillerci aturluku wall'u nerevkariyararpeci nallaitni; tepiit makut elliitet ilukegcinarquq Atanermun. 4-5Kina imna cikiqengelria qusngimek wall'u qusngirngalngurmek elliitekluku ekuagarkauluku Atanermun tapirarkaugaa mukaarkam elliitngullranek: malrugnek usperegnek mukaamek urcimalriamek cetaman saskat imaitnek olive-aam uquanek, cetaman-llu saskat imaitnek wine-amek. 6Angucalumek qusngimek elliikuvci tapirniarci cali mukaarkam elliitngullranek: cetamanek uspernek mukaamek urrluku qula malruk saskat imaitnek olive-aam uquanek, 7cali-llu ilaluki qula malrugnek saskat imaitnek wine-amek. Tepiit makut elliitet ilukegcinarquq Atanermun. 8Kuluvagmek-llu nulirtem̄ek elliikuvci akqutkellerpecen̄ek wall'u ilakuyucimun, 9mukaamek arvinlegnek uspernek akimiaq-llu ataucimek saskat imaitnek olive-aat uquatnek tapirciqerci tauna, 10cali-llu akimiaq ataucimek cipluku saskat imaitnek wine-amek. Tepiit ukut elliitet ilukegcinarquq Atanermun.

11“Makunek tapirluki elliilarniartuci elliigaqavci kuluvagnek nulirten̄ek, qusnginek angucalunek, qusnginek, qusngirngalngurnek-llu. 12Atauciunrilngurmek-llu ungungssimek elliigaqavci tapilarniaci allakaita elliiteci tuaten amllertalrianek. 13Nutemllaat Israel-aam yui waten pilarciqut elliigaqameng neqkanek, tepiit ilukegcinaqluni Atanermun. 14Allanernek-llu ilangqerquvci tamakumiungurtellrianek wall'u ayagarkaulrianek elliiyukata ekuagiluteng, tepiinek ilukegcivkarluku Ataneq, elpeci pilaucirci aturluku piciqut. 15Nutem tamakumiungulria allanrung'e'rmi-llu ayuqluteng alerquutengqerciqut, atuugarkauluni akwarpak. Tua-i-wa ayuqngavci tamarpeci Atanrem tangvallrani. 16Ataucimek alerquutengqerciquci elpeci allanret-llu nunavcen̄i uitalriit.”

17Atanrem qanrutaa Moses-aaq, 18Qanruski Israel-aam yui, tekiuskumci nunamun cikiutekamnun, 19nerkuvci nunam tamatum naugillrinek, ilait elliitekekiciki Atanermun. 20Kelipikuvci kelipiaqerraallerpeci ciuqliat uucimalria qecukarraallerpecen̄ek mukaarkanek elliitekciqerci Atanermun. Una cikiutekciqerci ayuqiikun elliilallerpeci nutaranek mukaarkanek mukaarkiurumalrianek. 21Waten elliilarniartuci Atanermun kelipiaqavci piyaraqluku akwarpak.

22Tua-llu pitsaqevkenani ilavci atunrilkuniki makut picirkiutet ilait Atanrem cikiutekellri Moses-aamun. 23Wall'u kinguqvaarni atunrilkatki Atanrem alerquutekellri Moses-aakun, 24nallumeggni tuaten yuut pillrukuneng, elliiniartut kuluvagmek angucalumek, ekualuku tepiinek narnilivkarluku Ataneq, tapirluku pisqumalrianek mukaarkamek wine-amek-llu. Makunun-llu ilakluku cali elliigarkauluteng qusngirngalngurmek assiilnguum au͡gautekaanek. 25Agayulirtem menuircarciqai taukut yuut, au͡g'aricimaarkauluteng-llu, tua-i-wa nallumeggni alarcata elliitseng assiilnguum au͡gautekaa neqkanek elliitnguluku Atanermun. 26Tamarmeng Israel-aam yui allanertuumarmeng au͡g'aricimaciqut tamarmeng ilakluteng alartellruameng.

27“Atauciuluni-llu yuk pitsaqevkenani assiilngiquni elliiciquq ataucimek allrakungelriamek arnacalumek qusngirngalngurmek assiilngumi au͡gautekaanun. 28Ekuavigmi agayulirtem menuircariyaraq aturluku menuircarciqaa tauna assiilngillranek, tauna-llu au͡g'aricimaarkauluni. 29Ataucimek alerquutengqerciquci pitsaqevkenateng assiilngilrianun, nutem Israel-aam yuinun cali-llu allanrungraan.

30“Tau͡gaam yuk pitsaqluni assiilngilria nutem ilakeng'e'rpeciu wall'u allanrungraan, pinarqelriaruuq caunrilkiami Atanermek. Tauna tuqucimaarkauguq 31caunrilkiami Atanrem qanellranek, alerquutii-llu pitsaqluni narurcaku tuqucimallra taum elliinun tusngauq.”

Angun Erenrem Sabbath-aam Atunritestii

32Israel-aam yui yuilqumelnginanermeggni tangertut angutmek avuqiilriamek muragnek ernermi Sabbath-aami. 33Taukut tangertellrin avuqiillrani ullautaat Moses-aankugnun Aaron-aaq-llu Israel-aam-llu yuinun. 34Nayurcirluku uitavkaraat qaillun picirkailamegteggu. 35Atanrem-llu Moses-aaq qanrutaa, “Angun tauna tuqucimaarkauguq; tamarmeng Israel-aam yuin uitavimeng elatiinun anulluku teggalqunek miluqukilitgu.” 36Tua-i tamarmeng anulluku teggalqunek miluquluku tuqutaat Atanrem alerquuciatun Moses-aaq.

Picirkiutet Agaussaanun

37Ataneq qanertuq Moses-aamun, 38“Qanruski Israel-aam yui agaussaalilaqilitki-gguq aturameng kangirait uskurirturluki qiuglimek pelacinagmek. Waten piuralarniartuci taqsuunaci. 39Nalluyagucailkutaqeciqaci. Tangrraqavciki tamakut umyuaqelarniaci alerquutenka aturluki-llu; nalluyagutenritniarpecia umyuarci-llu cali-llu piyullerci atungluku. 40Tamakut agaussaat umyuaqevkalarciqait alerquutenka, wiinga-llu elpeci yuk'arkauluci. 41Wiinga Atanruunga elpeci Agayutkarpecia; anutellruamci Egypt-aamek elpecen̄un Agayutkesqellua. Wiinga Atanruunga.”

Yupik Bible

Yupik Bible © 2012 American Bible Society

More Info | Version Index