Search form

Numbers 18

Caliarkait Agayulirtet Levite-at-llu

1Atanrem qanrutaa Aaron-aaq, “Elpet qetunraten-llu Levite-at-llu pinarqelriaruciquci assiitellriamek alairikuvci caliinanerpecen̄i Pelatekami Atanrem alailarvigkaani; cali-llu elpenun qetunrarpenun-llu kiivci tusngaarkauluni assiitellria alaiqan agayulirtet caliaratni. 2Tailluki tungayaci Levi-am kinguvri calillgucirnauraiceci ikayualuci calillerpecen̄i Pelatekam iluani. 3Kevgartuaniaraiceci Pelatekami-llu caliarkiuteteng caliaqluki, tau͡gaam agturarkauvkenaki kencignarqelriit Tanqilriim iluanelnguut ekuaviim-llu aklui. Ellait elpeci-llu tapqulluci tuquyuartuci. 4Ilalirluci Pelatekami caliarkiutmeggnek caliarkauluteng. Allam piyunarqucingqenrilnguum ilalirarkauvkenaci. 5Caliarkat Tanqipialriim iluani ekuavigmi-llu elpet qetunrarpet-llu kiivci caliaqelarniaci, eq'uqrutka ataam pinritniartuq Israel-aam yuinun. 6Wiinga cucukellruanka tungayaci Levite-at Israel-aam yuinek cikiutekluki-llu elpecen̄un. Allakaumaut wangnun caliarkiutait caliaqesqelluki Pelatekami. 7Tau͡gaam elpet qetunrarpet-llu agayulirtet caliaqetukait caliaqelarciqaci ekuavigmi Tanqipialriim-llu iluani. Makut elpeci caliaqerkaqaci, agayulirten͞gullerkamek elpeci cikillruamci. Kina piyunarqutailnguq tamatumek mallgikuni kencignarqellrianek tuqucimaciquq.”

Agayulirten̄un Pikaqevkaumalriit

8Atanrem qanrutaa Aaron-aaq, “Umyuaqekiki cikiutekanka elpenun elliitngullernek wangnun ekualuki pimanrilngurnek. Wiinga cikiutekanka elpenun kinguverpenun-llu akwarpak pikaqelaasqelluki. 9Makut maa-i pik'larciqaci qigcignarqeqapiaralrianek elliitnek ekuamanrilngurnek: mukaarkat elliitet, assiilnguum au͡gautekaanun elliitet, akiilnguirutekluku elliitet. Tamalkuita qigcignarqelriaruluki wangnun elliitngullret elpet qetunrarpet-llu pik'larciqaci. 10Nerlarniaci tanqilriim nuniini angutni kiivci qigcikluki.

11“Makut-llu pik'larciqaci: tamalkuita nalugluki elliiyarakun elliitekumallret. Wiinga cikiutekanka taqsuilngurmek elpecen̄un, qetunrarpecen̄un, panigpecen̄un-llu. Tamarmeng ilaci menuurteksailnguut nerlararkauluki tamakut.

12“Assinkacagait uqut, wine-at, mukaarkat-llu qecugiqarraallermeggni naucetaameggnek elliitekellrit wangnun cikiutekanka elpecen̄un. 13Tamalkuita makut pik'larciqaci tamarmeng-llu ilaci menuurteksailnguut tamakunek nerlararkauluteng.

14“Cat tamalkuita allakaumalriit Atanrem caliaranun Israel-aam yuini elpeci pikaqaci.

15“Tamarmeng irniqarraarutait yuut ungungssiaraat-llu wangnun cikiutekumallret elpeci pik'larciqaci; tau͡gaam yuum irniqarraarutii ataam kipucet'larniarci cali-llu menuurcimalria ungungssiar. 16Ataam-llu mikelnguut kipucimalarciqut akikiurluki (ataucimek iralungaqata kipucet'larciqaci) caqtaararkaunrilngurmek tallimanek qerrirlinek akinek tamatum nalliini piciryaraicetun. 17Tau͡gaam kuluviit, qusngit, qusngirngalnguut-llu ataam kiputessngaitaci qigcignarqelriaruata. Ceqvallertautelarciqaci augit ekuavigmun, ekualuki-llu uquit, tepiit ilukegcinarqevkarluku Atanermun; 18kemgit elpeci pik'larciqaci, qat'gait, kingulirneq-llu tallirpilirneq irua nalugluki elliiyarakun elliitekumallret.

19“Tamalkuita qigcignarqelriit Israel-aam yuin elliitekellrit Atanermun cikiutekanka elpecen̄un akwarpak pikaqelaasqelluki; man'a wiinga navgumangaunaku akqut'liaqaqa elpecen̄un kinguverpecen̄un-llu.”

20Atanrem qanrutaa Aaron-aaq, “Camek kinguvarcetarkarpenek kinguverpenun pingengaituten, Israel-aam-llu yuin nunautiita iliinek cikiumangaunak. Wiinga-wa avatemni allamek pingqerrnarqenrilavet.”

Levite-anun Pikevkaumalriit

21“Levite-anun-llu pikevkarciqanka qulngurutet elliitait Israel-aam yuin wangnun. Calillratnun akikevkarluku aulukiluteng Pelatekamek. 22Waken ayagluteng Israel-aam yuin mallegnanriqilitgu Pelatekaq tuqucimallerkameggnun tekiucuartut. 23Tau͡gaam Levite-at kiimeng caliaqeciqaat Pelatekaq cat tamalkuita ellmeggnun tusngavkarluki. Man'a-llu picirkiun atularciqaat kinguvrita-llu akwarpak. Levite-at-llu pingqerrngaunateng nakmiin pimeggnek Israel-aam yuini. 24Tua-i-wa qulngurutet Israel-aam yuin elliitekellrit Atanermun wiinga cikiutekellruamki ellaitnun pik'laasqelluki, taumek qanelrianga nakmiin pimeggnek pingqelarngaitniluki Israel-aam yuini.”

Levite-at Qulngurutait

25Ataneq-llu qanertuq Moses-aamun, 26“Waten cali qanruski Levite-at, ‘Akurturaqavciki qulngurutet Israel-aam yuinek cikiutekellrenka elpecen̄un, elliilaqici tamakut qulngurutaitnek Atanermun. 27Taum elliiteklerpeci pitatekciqaa nauceciiyurtem nutarauluki elliitain mukaarkat, wine-am-llu. 28Tuaten-llu piluci cali piunrulria elliitek'larciqerci Atanrem pia qulngurutnek akurtullerpecen̄ek Israel-aam yuinek. Una elliitekekuvciu tuneniarci Aaron-aamun agayulirtem̄un. 29Akurtullerpeci assinkacagaitnek cikiqenglarniartuci. 30Assinkacagii cikiutekraarluku ilakuarci pikniarci, nauceciiyurtem elliirraarluni ilakuani pik'lauciatun. 31Ilaten-llu tamakut nerlarniaci nani piyullerpecen̄i akiliutekngavciki caliarpecen̄un Pelatekami. 32Pinarquteksagusngaitarci nerngerpeciu assinkacagii cikiutekellrukuvciu Atanermun. Tau͡gaam menuurcaqunaciki Israel-aam yuin qigcignarqelriit cikiutait nerluci assinkacagait cikiutekvailegpeciki Atanermun; tuaten pikuvci tuqucimaarkaungavci.’”

Yupik Bible

Yupik Bible © 2012 American Bible Society

More Info | Version Index