Search form

Numbers 19

Arai Kavirlim Kuluviim

1Atanrem alerqurak Moses-aankuk Aaron-aaq-llu, 2“Israel-aam yui cikiisqelluki makunek picirkiutnek. Tailluci Moses-aamun Aaron-aamun-llu kavirlimek arnacalumek kuluvagmek natlugnerilngurmek calissuutekumaksailngurmek-llu. 3Tuneniarci Eleazar-aamun agayulirtem̄un. Anulluku uitavigpeci elatiinun tuqucimaniartuq Eleazar-aam takuani. 4Nutaan-llu Eleazar-aaq augan iliinek teguqaarluni unatmikun ceqvallertaulluku malrunlerqunek Pelatekam tungiinun. 5Tauna-llu arnacaluq kuluvak ekuagarkauluku amirtuumaan, kemga, auga, qilui-llu agayulirtem takuani. 6Teguqaarluni-llu muragmek cedar-aamek, culugtarmek hyssop-aamek, kavirlimek-llu pelacinagmek egciiqai tuavet ekualriamun. 7Tuaten-llu pirraarluni aturani ervigluki ervuqerluni-llu, nutaan tuaten pirraarluni itrarkauluni uitavimeggnun; agayulirta-llu menuugarkauluni atakurnatkaanun. 8Cali-llu ekuagilleq taumek arnacalumek kuluvagmek, ervigluki aturani ervuqerluni-llu, menuugarkauluni-llu atakurnatkaanun. 9Menuurteksailnguum-llu angutem taum arnacalum kuluviim arai avurluki elliciqai menuilngurmun uitaviata elatiini, qelkumaarkauluteng Israel-aam yuinun atuusqelluki mermek menuircautekameggnek pikiuqata. Una atularaat assiilngurmun au͡gautekluku. 10Angutem-llu taukut arat avurtellrata aturani ervigciqai, tau͡gaam ellii menuugarkauluni atakullranun. Man'a-llu picirkiutnguarkauluni akwarpak Israel-aam yuinun allanernun-llu nuniitni uitalrianun.

Tuqumalriamun Agtuutellret

11“Kia imum tuqumalriim temii agtuquniu menuulriaruciquq malrunlegni ernerni. 12Merkun menuircautekun menuircararkauguq erenret pingayuatni cali-llu erenret malrunelgatni, tuaten pikuni menuirutarkauluni. Tau͡gken menuircanrilkuni erenret pingayuatni malrunelgatni-llu menuirusngaituq. 13Tuqumalriim temiinun yuk agtuuqaarluni menuircanrilkuni menuugurciquq, mermek menuircautmek ciqrumanrilami. Menuurcilriaruciqngami Atanrem Pelatekaanek Atanrem-llu yuinun ilaungairuciiquq.

14“Una pisqutnguuq yugmek tuqulriartangqerqan pelatekam iluani. Yuk tamaani uitalria wall'u tuavet pelatekamun itellria menuugarkauguq ernerni malrunlegni. 15Tamarmeng-llu assigtat patuilnguut pelatekam iluanelnguut menuugarkauluteng. 16Cali-llu kia imum tuqucimalleq wall'u tuqulleq ellami wall'u agtuquniu yuum enra qungua-llu menuulriaruciquq ernerni malrunlegni.

17“Menuulriit menuircautekaatnek piliciqut tegulluteng imum kavirlim kuluviim ekuamallrem arainek assigtamun ekluki mirluki-llu mertanrrarmek mermek. 18Nutaan-llu menuilnguum yuum culugtarmek hyssop-aamek piluni tuavet mermun akurqaarluki ciqertarciqai pelatekaq, aklui-llu, yuut-llu tamaanelnguut, yuk-llu agtuutelleq yuum enranun wall'u tuqumalriamun wall'u tuqucimallermun wall'u qungumun. 19Ciqertariarkauluni menuulriamek erenret pingayuatni erenret-llu cali malrunelgatni; tua-i erenret taukut malrunelgatni menuircararkauluku tauna-llu aturaminek ervigiarkauluni ervuqerluni-llu, tuani-llu atakumi menuirulluni.

20“Kina tau͡gaam menuurqaarluni menuircanrilkuni menuugurciquq menuircautmek mermek ciqrumanrilami. Menuurcecamiu-llu Atanrem Pelatekaa Agayutem yuinun ilaungairuciiquq. 21Picirkiun man'a atularciqerci akwarpak. Yuk ciqertarilleq menuircautmek mermek aturani erurciqai; kia-llu imum agtuquniu tauna meq menuugarkauluni atakullranun. 22Ca tamarmi menuulriim agtullra menuurciiquq, allam-llu cali agtuquniu menuugarkauluni atakullranun.”

Yupik Bible

Yupik Bible © 2012 American Bible Society

More Info | Version Index