Search form

Numbers 2

Ayuqucirkaicetun Pimallrat Nauvillgutkelriit Arulaingqavimeggni

1Atanrem-llu qanrutak Moses-aankuk Aaron-aaq-llu, 2“Israel-aam yui arulairaqameng, tamarmeng angutet arulailarciqut avcimavimeng nallunailkutaan nuniinun, naumavimeng peliin acianun. Uitaarkauluteng-llu kassugulluku avatiini Pelatekam. 3-9Calaralirnermi Judah-mun avgumalriit nallunailkutaata nuniini uitaarkaugut allakaqtaarumallermeggni ciuliqagtetuumarmeng waten ayuqluteng: Judah-mek naumalriit ciuliqagterluteng Nahshon-aamek Amminadab-aam qetunraanek, amllertaluteng yuinaat pingayun akimiarunrita'armek tiissitsaat, tiissitsaam-wa avga yuinarnek tallimanek cipluku (74,600); Issachar-amek naumalriit Nethanel-aamek Zuar-am qetunraanek ciuliqagterluteng. Amllertaluteng yuinaak malruk akimiarunrita'armek cipluku tiissitsaat, yuinaat-wa yuinaat (54,400); Zebulon-aamek naumalriit Eliab-aamek Helon-aam qetunraanek ciuliqagterluteng. Amllertaluteng yuinaak malruk akimiaq malrugnek cipluku tiissitsaat, yuinaat-wa yuinaat (57,400). Ukut quyurrluteng amllertaluteng yuinaat qulngunritaraan arvinlegnek cipluku tiissitsaat, yuinaat-wa yuinaat (186,400).

“Ukut Judah-mun avgumalriit ciumek ayalararkauluteng.

10-16“Ungalalirnermi-llu Reuben-aamun avgumalriit uitaciqut nallunailkutameng aciani naumavillgutkelriit quyungqaaqluteng ciuliqagtetuumarmeng waten ayuqluteng: Reuben-aamek naumavilget ciuliqagterluteng Elizur-aamek Shedeur-am qetunraanek, amllertaluteng yuinaak malruk arvinlegnek cipluku tiissitsaat, tiissitsaam-wa avga (46,500). Simeon-aamek naumavilget ciuliqagterluteng Shelumiel-aamek Zurishaddai-am qetunraanek, amllertaluteng yuinaak malruk yuinaunrita'armek cipluku tiissitsaat, yuinaat-wa akimiaq (59,300). Gad-amek naumavilget ciuliqagterluteng Eliasaph-amek Deuel-aam qetunraanek, amllertaluteng yuinaak malruk tallimanek cipluku tiissitsaat, tiissitsaam avga, yuinaat-wa malrunelgen qulnek cipluku (45,650). Ukut quyurrluteng amllertaluteng yuinaat malrunelgen qula ataucimek cipluku tiissitsaat, yuinaat-wa qula malruk qulnek cipluku (151,450). Reuben-aamun avgumalriit tungliuluteng ayatuarkauluteng. 17Levite-at-llu ayatuarkauluteng akuliitgun ciuqliit tungliita-llu ayatulit. Makut-llu allakaqtaarumalriit ayatuarkauluteng tungliqutacirmegcetun arulairumaaqameng, tamarmeng nallunailkutameng aciani.

18-24“Kanaknalirnermi Ephraim-aamun avgumalriit uitalarciqut naumavillgutkelriit quyungqaluteng ciuliqagtetuumarmeng waten: Ephraim-aamek naumavilget Elishama-mek Ammihud-aam qetunraanek ciuliqagterluteng, amllertaluteng yuinaak malruk tiissitsaak tiissitsaam-wa avga (40,500). Manasseh-mek naumavilget ciuliqagterluteng Gamaliel-aamek Pedahzur-am qetunraanek, amllertaluteng yuinaq qula malrugnek cipluku tiissitsaat, yuinaat-wa qulen (32,200). Benjamin-aamek naumavilget Abidan-aamek Gideoni-m qetunraanek ciuliqagterluteng, amllertaluteng yuinaak malruk akimiarmek cipluku tiissitsaat, yuinaat-wa yuinaat (35,400). Quyurmeng amllertaluteng yuinaat talliman pingayunek cipluku tiissitsaat, yuinaat-wa talliman (108,100).

25-31“Neglirnermi-llu Dan-amun avgumalriit nallunailkutaan-llu acianelnguut naumavillgutkelriit uitalarciqut ciuliqagtetuumarmeng waten ayuqluteng: Dan-amek naumavilget Ahiezer-aamek Ammishaddai-am qetunraanek ciuliqagterluteng, amllertaluteng yuinaat pingayun malrugnek cipluku tiissitsaat, tiissitsaam avga yuinarnek qulnek cipluku (62,700). Asher-aamek naumavilget Pagiel-aamek Ochran-aam qetunraanek ciuliqagterluteng, amllertaluteng yuinaak malruk ataucimek cipluku tiissitsaat, tiissitsaam-wa avga (41,500). Naphtali-mek naumavilget Ahira-mek Enan-aam qetunraanek ciuliqagterluteng, amllertaluteng yuinaak malruk qula pingayunek cipluku tiissitsaat, yuinaat-wa yuinaat (53,400). Quyurmeng Dan-amek naumavilget amllertaluteng yuinaat malrunelgen tiissitsaat, akimiaq-wa malrugnek cipluku (157,600). Dan-amun avgumalriit ayalararkauluteng kingumek.”

32Quyurrluteng amllertaciit Israel-aam yuin naaqumallret avenqegcimacirmegcetun amllertaut tiissitsaam avga, yuinaat talliman pingayunek cipluku tiissitsaat, tiissitsaam avga, yuinaak malruk qulnek cipluku (603,550). 33Ukut tau͡gaam Levite-at naaqumallruvkenateng Israel-aam yuinun ilaulluki Atanrem alerquutii maliggluku.

34Waten pillruut Israel-aam yui maliggluki Atanrem alerquutekellri Moses-aamun. Arulairumaaqluteng nallunailkutameng aciani ayagaqluteng-llu naumavillgutkelriit quyurmeng.

Yupik Bible

Yupik Bible © 2012 American Bible Society

More Info | Version Index