Search form

Numbers 20

Kadesh-aami Pillret

1Iralut ciuqliatni tamarmeng Israel-aam yui tekitut Zin-am yuilqurtaanun arulairluteng-llu Kadesh-aamun. Tuani Miriam-aaq tuquuq tungmagcimaluni-llu. 2Mertaitellruuq tauna arulairvikellrat, taumek yuut quyurrvikagket Moses-aankuk Aaron-aaq-llu 3qanemyuugaullukek-llu qanerluteng, “Assinruyallruuq wangkuta-llu tuqullrukumta Israel-aarullgutput ilalirluki Pelatekam ciuqerrani. 4Ciin ayautellrusikut maavet yuilqumun? Tuqusqelluta-qaa ungungssirtuumamta maani yuilqumi? 5Ciin ayautellrusikut Egypt-aamek maavet assiitellriamun nunamun camek naugisciigalngurmun? Mukaarkartaunani, atsartaunani, wine-arkartaunani mer'unani tuaten!” 6Moses-aankuk Aaron-aaq-llu yuut unilluki ag'uk Pelatekam amiiganun. Tuani ciktuk nunamun, Atanrem-llu qitngirnarqelriakun ucurnarqucimikun alairvikak.

7Atanrem-llu qanrutaa Moses-aaq, 8“Ayaruq Akqutem Yaassiigan ciuqerrani uitalria teguluku quyurceqaarluki yuut tangvagtellutek ingna teggalquq qanrutniartek mermek maqesqelluku, qanruskuvtegni meq tuaken maq'erciiquq. Tua-i teggalquq mermek maqevkarciqertek yuut ungungssiit-llu merkaatnek.” 9Moses-aam-llu Atanrem alerquani ayaruq nuniinek tegua.

10Moses-aankuk-llu Aaron-aaq-llu yuut quyurcetakek teggalqum canianun qanrulluki-llu, “Niicugnici ukuut inglulicugpakalriani! Mermek-qaa pisquci uumek teggalqumek?” 11Moses-aam-llu ayaruminek teggalquq kaugturaa malrurqugnek; mermek-llu maqngan yuut kuluviit-llu merluteng.

12Tau͡gaam Atanrem Moses-aankuk Aaron-aaq-llu nunurlukek qanrutak, “Nalirrukngavtegu nasvallerkaa qigcignaqlua pinilriaruciqa Israel-aam yuinun, itrusngairutatek ukut yuut nunamun akqutkellemnun ellaitnun.” 13Waten pillruut Meribah-mi,+ tuani yuut qanemyuugallratni Atanermun tuani-llu elliin tanqilriarucini manillrani.

Angayuqran Edom-aam Tamaagguircecuumiitai Israel-aam Yui

14Moses-aaq ayagceciuq qanrucarturtekainek Kadesh-aamek Edom-aam angayuqranun. Taukut qanertut, “Man'a qanerkarput kingunengqertuq tungayagpecen̄ek Israel-aam yuinek. Nallunritaci nangtequateput tamalkuita, 15ciuliamta ayallrat Egypt-aamun, tuani-llu ak'anun uitaluteng. Egypt-aarmiut-llu nanglluta ciuliaput-llu, 16wangkuta-llu qayagaurluku Ataneq ikayuusqelluta. Elliin-llu niilluta an'gilamun ullagcetaakut, elliin-llu anulluta Egypt-aamek. Watua Kadesh-aami nunautvet engeliini uitaukut. 17Kaigavikamteggen kiturceskut nunautevgun. Ungungssirtuumamta tumyaraq uniteksaunaku ayagciqukut, naucetaarvici-llu tumekluki pingaunata, elakarpecen̄ek-llu meqsaunata. Tumyarapiakun uniurteksaunaku ayagciqukut nunauten pellugnatkamten̄un.”

18Tau͡gaam Edom-aarmiut kiugut, “Nunautemteggun kituusqumanritamceci! Pitassiaquvci anguyagyarturciqamceci.”

19Israel-aam yui qanertut, “Tumyarapiaq uniteksaunaku ayagciqukut, ilavut-llu wall'u ungungssiput elakarpecen̄ek meq'an akilirciqerput; nunautevgun kituqainaryugtukut.”

20Edom-aarmiut kiunqigtait, “Nunautemteggun kiturngaituci!” Edom-aarmiut-llu anguyagterugaita anvikait Israel-aam yui. 21Edom-aarmiut nunautmegteggun pivkarngaitelliniiceteng Israel-aam yui allakun ayagtut.

Aaron-aam Tuqullra

22Israel-aam yui tamarmeng Kadesh-aamek ayiimeng tekitut Ingrimun Hor-amun, 23Edom-aam nuniin engeliinun. Tuani Atanrem qanrutak Moses-aankuk Aaron-aaq-llu, 24“Aaron-aam iterngaitaa nuna Israel-aam yuinun akqutkelqa cikiutekciqniluku; Aaron-aaq tuquarkaurtuq, tua-i-wa tamarpetek inglulillruavtegu alerquuteka Meribah-mi. 25Aaron-aaq qetunraa-llu Eleazar-aaq mayuuskek Ingrimun Hor-amun, 26tuani-llu Aaron-aam aturai agayulirtellaat at'elluki Eleazar-aamun. Tuani Aaron-aaq tuquciquq.” 27Moses-aaq Atanermek alerquumacimitun piuq. Mayuraat Ingriq Hor-aq takuatni Israel-aam yuin, 28Moses-aam-llu Aaron-aam agayulirtellaat aturai yuuluki Eleazar-aamun at'elluki. Tuani ingrim qaingani Aaron-aaq tuquuq, Moses-aankuk-llu Eleazar-aaq-llu atrarlutek. 29Tamarmeng Israel-aam yuin niicamegteggu Aaron-aam tuqullra qiatekaat ernerni yuinaq qulnek cipluku (30).

Yupik Bible

Yupik Bible © 2012 American Bible Society

More Info | Version Index