Search form

Numbers 21

Cirlakillrat Canaan-aarmiunek

1Canaan-aam ungalalirnerani angayuqam Arad-am Canaanite-am niicamiki Israel-aam yui agiirrniluki tumekluku Atharim-aaq curugluki anguyagait ilait-llu teguaqsagulluki. 2Israel-aam-llu yuin waten akqaat Ataneq, “Cirlakevkaquvki wangkutnun ukut yuut, wangkuta qaillukuarciigalngurkun allakarciqaput+ elpenun yuut nunarpiit-llu, tamalkuita piunrirluki.” 3Atanrem-llu Israel-aam yui niilluki cirlakevkarai Canaan-aarmiut; ellaita-llu piunrirluki nunarpait yugtuumaita. Taumek taum nunii Hormah-mek acillrukiit.

Ciissirpaguam Punernermek Piliaqumallra

4Ingrimek Hor-amek ayagtut tumyarakun ayalriamun Red Sea-mun tamana Edom-aam nunii avatairluku pinaluteng. Tamaani tumemeggni yuut nerinisngialliq'ngut, 5qanemyuugautenglukek-llu Agayun Moses-aaq-llu, “Ciin ayautellrusikut Egypt-aamek tuqusqelluta maani yuilqumi neqkartailngurmi mertaunani-llu? Neqput-llu makut pilnguyagutaput!” 6Atanrem-llu ciissirpiit tuqunarqellrialget pivkarai yuut akulaitni tamakut-llu yuut keggmarluki amlleret tuquvkarait. 7Yuut-llu Moses-aaq ullagluku qanrutaat, “Wangkuta qanllemteggun assiilngirtukut Atanermun elpenun-llu; piicagvikiu Ataneq ciissirpiit makut wangkutnek ayagcetniarai.” Moses-aam tua-i piicautai yuut. 8Atanrem-llu qanrutaa Moses-aaq, “Ciissirpaguamek tegglimek pilirraarluten naparyam kangranun elliu; yuut ciissirpiit kegg'aqaceteng tauna tangrraqamegteggu unguvalarciqut.” 9Moses-aaq-llu punernermek ciissirpagualiuq naparyam-llu kangranun elliluku; yuut-llu ciissirpiit kegg'aqaceteng tauna ciissirpaguaq tangrraqamegteggu caksaitelartut.

Ingrimek Hor-amek Ayagtut Moab-armiut Kuignayuatnun

10Israel-aam yui upiimeng arulairtut Oboth-aamun. 11Tuaken-llu ayiimeng arulairluteng nunallernun Abarim-aamun yuilqumun Moab-armiut nuniita calaralirneranun. 12Tuaken-llu ayiimeng arulairluteng kuignayugmun Zered-aamun. 13Tuaken cali ayiimeng arulaillruut neglirneranun kuigem Arnon-aam, yuilqumun tekisngalriamun Amorite-at nuniitnun. (Arnon-aaq engelkaak nunautaita Moabite-at Amorite-at-llu.) 14Taumek kalikaini Atanrem Anguyalallrini qanrumauq, “nunarrarnek Waheb-aamek aterluteng Suphah-m nuniini, kuignayugnek, kuigmek-llu Arnon-aamek, 15uverneritnek-llu kuignayuut nunarraq Ar-aq tekilluku Moab-am nuniin engeliini.”

16Tuaken ayiimeng ayagtut nuna tekilluku Wells-aamek aterpagcimalria. Tuani Atanrem Moses-aaq qanrutellruluku, “Yuut quyurceski mermek cikirnianka.” 17Taum nalliini Israel-aam yui mat'umek yuarutmek aturtut:

“Elakani meng'ici;

ciuniurniarput atuulluku—

18Elakaq angayuqat kinguvertaita elallrit,

Yuut-llu ciuliqagtaita,

Elagcuucirluteng tegumianek scepter-aamek

ayarumeggnek-llu.”

Yuilqumek-llu upagtut Mattanah-mun, 19Tuaken-llu ayagluteng Nahaliel-aamun, Nahaliel-aamek-llu Bamoth-amun, 20Bamoth-amek-llu kuignayugmun Moabite-at nuniitni, Ingrim Pisgah-m kangran acianun, tangvagluku yuilquq.

Cirlakillrat Angayuqagnek Sihon-aamek Og-amek-llu

21Israel-aam-llu yuin qanrucarturcetaat Sihon-aq angayuqrat Amorite-at waten, 22“Kiturceskut nunautevgun. Ayagciqukut tumyaraq uniteksaunaku tumekngaunaki-llu naucetaarvici, merngaunata-llu elakarpecen̄ek; tumyarapiaq aturluku ayagciqukut nunauten pellugnatkamten̄un.” 23Tau͡gaam Sihon-aam Israel-aam yui kiturcecuumiitai nunautmikun. Anguyagten̄i quyurqaarluki ayagtuq Jahaz-aamun yuilqumi anguyagluki-llu Israel-aam yui. 24Tau͡gaam Israel-aam yuin tuqurqait nuniit-llu yirluku kuigmek Arnon-aamek ayagluku negetmun Jabbok-aaq tekilluku, tamana Amorite-at nunautiita engelekluku, anguyagterugaitnek murilkesterluni. 25Israel-aam yuin teguit Amorite-at nunarpautait Heshbon-aaq-llu, avatiinelnguut-llu nunarraat uitaviksagulluki. 26Heshbon-aaq nunarpak uitavikellrua Sihon-aam Amorite-at angayuqrata. Uum anguyallrua ciuqliq angayuqaqellra Moab-am nunautii-llu piksagulluku kuik Arnon-aaq tekilluku. 27Taumek yuarucitulit waten atutulriit,

“Taici Heshbon-aamun, nunarpiinun angayuqam Sihon-aam!

Ataam tumarrluku nautesqerput.

28Cat iliitni waken nunarpagmek Heshbon-aamek Sihon-aam anguyagtai kenertun ayallruut;

Piunrillruat Ar-aq nunarpak Moab-ami Caunrirluki-llu qemii quliini Arnon-aam.

29Nakleng, elpeci Moab-am yuini!

Elpeci agayulalriani Chemosh-aamun caunrirtuci!

Agayutevci angutet qimagaurcetai,

Arnat-llu teguaqsagutelluki Amorite-at angayuqratnun.

30Tau͡gaam maa-i kinguvrit piunrirtut,

Heshbon-aamek ayagluteng Dibon-aamun,

Nashim-amek-llu Nophah-mun, Medeba-m yaaqsinrilkiini.”

31Tua-i Israel-aam yui nunalgartut Amorite-at nuniitnun, 32Moses-aam-llu Jazer-aaq nunarpak paqcetaa nallunriryugluku qaillun elluarrluku anguyallerkaanek. Israel-aam-llu yuin teguluku avatiinelnguut-llu nunarraat ayagtelluki Amorite-at uitalriit tamaani.

33Tua-llu Israel-aam yui caqirrluteng ayagtut tumyaraikun Bashan-aam. Og-am-llu Bashan-aam angayuqran ullagai anguyagten̄i malikluki anguyagnaluki Edrei-ami. 34Atanrem qanrutaa Moses-aaq, “Aliksaqunaku. Cirlakevkarciqaqa yugtuumaan nunatuumaan-llu. Sihon-aaq Amorite-at angayuqrat atanirturilleq Heshbon-aami pillrucirpetun tuaten piniaran.” 35Israel-aam-llu yuin tuqurqait Og-aq, qetunrai, yui-llu tamalkuita ilakuivkenaki, nuna-llu tamana yirluku.

Yupik Bible

Yupik Bible © 2012 American Bible Society

More Info | Version Index