Search form

Numbers 22

Moab-am Angayuqran Aqvavkaraa Balaam-aaq

1Israel-aam yui ayiimeng arulairtut carr'ilqainun Moab-am calaralirneranun Jordan-aam Jericho-m akianun. 2Balak-aam-llu Zippor-am qetunraan tangrrai Israel-aam yuin pillrit Amorite-anun. 3Moab-armiut-llu alingem tutai, alingluteng taukunek yugnek amllerata. 4Moab-armiut-llu qanrutait Midian-aarmiut ciuliqagtait, “Ukut yugugaat cairutarkaugaat avatvut tamalkuan, kuluvagtun canegnek nerelriatun carr'ilqam can'gi nangluki.” Tua-i Balak-aaq 5ayagceciuq qanrucarturtelluku Balaam-aaq Beor-am qetunraa Pethor-ami kuigem Euphrates-aam caniani Amaw-am nuniini waten, “Nallunritesqamken yugugarnek tailrianek Egypt-aamek; yuit-llu cekavvngiinarluteng aarnaqluni nunavut piksagutnayukluku. 6Tailuten watua aniqlaacicarturnga ukunek yugnek, amllenrussiyaagtut wangkutni; pitsaqevkenata cirlaksugngariyuaput ayagtelluki-llu maaken nunamek; nallunrilamku atawaqercetellren atawaqercecimalaucianek aniqlaagaqavni-llu yuk aniqlaamaaqluni.”

7Tua-i Moab-armiut Midian-aarmiut-llu ciuliqagtait ayagtut akikalgirluku aniqlaagiarkaq; Balaam-aaq-llu qanrulluku-llu Balak-aam qanrutesqellranek. 8Balaam-aam qanrutai, “Qavartarci maavet, unuaqu qanrutniamci qaillun Atanrem qanruskanga.” Tua-i Moab-armiut ciuliqagtait Balaam-aami uitaut.

9Agayutem-llu Balaam-aaq ullagluku qanrutaa, “Kinkuugat ukut angutet ilaten?”

10Balaam-aam-llu qanrutaa Agayun, “Balak-aam Moab-am angayuqran taivkallrui wangnun qanrucartuusqellua, 11yuut taillret Egypt-aamek cekavvniluki nunami tamalkuan. Aniqlaacicesquq wangnun callugluki ayagcetnaluki.”

12Agayutem Balaam-aaq qanrutaa, “Angutet ukut maligcaqunaki, aniqlaayaqunaki-llu Israel-aam yui, wiinga atawaqercecimiimki.”

13Unuaquan Balaam-aam imkut Balak-aam qaneryarturcetellri ullagluki qanrutai, “Uterci tua-i kingunerpecen̄un, Atanrem wangnun maligtesqenritaaci.” 14Tua-i uterrluteng Balak-aaq qanrutaat Balaam-aamun maligcuumiitniluteng.

15Balak-aaq cali ayagceciuq ciuliqagten̄ek ciuqliitni amllenrulrianek takarnarqenrulrianek-llu. 16Taukut-llu Balaam-aamun tekicameng qanrutaat, “Waten qanertuq Balak-aaq, ‘Camek nagucirluten taisciigacaqunak! 17Nunulirciqamken elaranailngurmek, camek-llu qanruskuvnga pisqellua tuaten piciqua. Tailuten aniqlaacicarturnga ukunek yugnek.’”

18Balaam-aam tau͡gaam kiugai Balak-aam kevgai, “Balak-aam cikiryaaqsaraanga enemi iluanelngurnek tamalkuita qerrirlinek akinek suulutaanek-llu, tau͡gaam wiinga narurcanritaqa Atanrem alerquutii carraungraan. 19Kitaki tau͡gaam elpeci-llu maani qavartarci nallunrirnatkamnun Ataneq cali qanerkangqerrsuartuq wangnun.”

20Tuani unugmi Atanrem Balaam-aaq ullagluku qanrutaa, “Ukut angutet ullallrukatgen maligtesqelluteng upluten maligeski. Alerquuteka tau͡gaam maligqurluku piurniartuten.” 21Balaam-aaq tua-i unuaquan makcami ungungssini uptaa ugingassuucirluku, maliggluki-llu Moab-armiut ciuliqagtait.

Balaam-aankuk Ayagassuutni-llu Ungungssiq

22Tau͡gaam Agayutem qenrutaa Balaam-aaq ayakataan, ayainanrani-llu ungungssimini ekumaluni pistegminek maligluni, Atanrem an'gilaa nangertuq tumkaanun tumairluku. 23Ungungssim-llu ekumavian Atanrem an'gilaa tangrramiu nangerngalria tumyarani nuussirpagmek tegumiarluni caqirtuq tumyaraq unilluku carr'ilqanun. Balaam-aam-llu kaugturluku utertelluku tumyaramun. 24Tuamta-llu an'gilaq nangertuq tumyaram iqkelli'irtellranun wine-arkanek naucetaarviik akunliigni, atunem avatek qacarnertarlutek. 25Ungungssim-llu ugingavian Atanrem an'gilaa tangrramiu avitellermini piqrutuq qacarnermun, Balaam-aam it'gaa passilluku. Ataam-llu Balaam-aam kaugtuarluku. 26Ataam cali an'gilaq ayakanirluni nangertuq nequkilngurmun avatek kiturviinatek. 27Ungungssim tuani tangrramiu elavuq; Balaam-aam-llu qenqerrulluku ayaruminek kaugtuarluku. 28Atanrem-llu ungungssiq qaneryugngarivkaani Balaam-aaq qanrutaa, “Qaillun pillrukemken ciin kaugtuarcia pingayurqunek?”

29Balaam-aam kiugaa, “Usviilqiavnga, nuussirpagmek tegumiangqerquma tuqucaramken.”

30Ungungssim kiugaa, “Wiinga-wa ekumavikuratukevnga yuurqaanerpenek ayagluten una engelkarrluku. Tua-llu-qaa uum ciungani waten pillruamken?” Kiugaa, “Qang'a.”

31Atanrem nutaan Balaam-aamun tangercetaa an'gilaq nuussirpagmek tegumiarluni, ellii-llu cikluni nunamun. 32Atanrem an'gilaan qanrutaa, “Ca pitekluku ungungssiuten kaugtuarciu pingayurqunek? Taillruunga tumairyarturluten ayagarkaunricaaqngavet. 33Tau͡gaam ungungssim tangerrlua caqirtelartuq pingayurqunek. Tuaten pillrunrilkan tuqutellruyaramken ungungssiq pivkenaku.”

34Balaam-aaq kiuguq, “Wiinga assiilngirtua. Nallullruaqa nangengqallren tumairlua; waniwa-llu ayaasqumanrilkuvnga ayagpek'nii uterciiqua.”

35Tau͡gaam an'gilam qanrutaa, “Maliggluki tua-i ayii, qanresqellemnek tau͡gaam qanlarniartuten.” Tua-i Balaam-aaq maliggluki ayagtuq.

Balak-aam Ciuniuraa Balaam-aaq

36Balak-aam niicamiu Balaam-aaq agiirrniluku pairrsaagluku ayagtuq Ar-amun, nunarpagmun kuigem Arnon-aam cen̄iinelngurmun Moab-am nuniin engeliinelngurmun. 37Balak-aam qanrutaa, “Ciin ciuqlirmi taisqellemni taillrunricit? Nunulimyaagnayukluten-qaa umyuarteqngavet pillruuten?”

38Balaam-aam kiugaa, “Canrilnguq-wa tua-i taingama! Wangnek-qaa tua-llu piningqerrlua qaneryugngaunga? Atanrem tau͡gaam tuaten qanresqekanga tuaten qanerciqua.” 39Balaam-aam-llu Balak-aaq maliggluku nunarrarnun Huzoth-amun ayagtut, 40tuani-llu Balak-aaq tuqurqiluni kuluvagnek qusnginek-llu Balaam-aaq malii-llu ciuliqagtet cikirai kemgita ilaitnek.

Balaam-aam Qanqerraallra Prophet-aatun

41Unuaquani Balak-aam Balaam-aaq mayuutaa Bamoth Baal-amun, tuaken-llu Balaam-aam tangrrai Israel-aam yuin ilait.

Yupik Bible

Yupik Bible © 2012 American Bible Society

More Info | Version Index