Search form

Numbers 23

1Balak-aaq qanrutaa, “Pilicia wani malrunlegnek ekuavignek, tailluci-llu malrunlegtaarluki nulirten̄ek kuluvagnek angucalunek-llu qusnginek.”

2Balak-aaq qanrucimacirmitun piuq, elkek-llu Balaam-aaq-llu ekuagilutek nulirtem̄ek, qusngimek-llu taukuni ekuavigni. 3Tua-llu Balaam-aam Balak-aaq qanrutaa, “Nangerrluten ekuakengarpet canianun utaqanga paqtellemni Atanermun ullagnayuklua. Camek nasviskanga qanruciiqamken.” Tua-i mayurtuq kiimi qemim qainganun, 4Agayutem-llu tuani ullagaa. Balaam-aam qanrutaa, “Ekuavignek malrunlegnek pilillruunga ekuagilua-llu nulirten̄ek qusnginek-llu tamakut qaingitni.”

5Atanrem qanerkiuraa Balaam-aaq, utertelluku-llu qanllerminek qanrutesqelluku Balak-aaq. 6Utercami tangrraa Balak-aaq cali nangengqaluni Moab-am ciuliqagtainek ilaluni ekuakengami caniani.

7Balaam-aaq qanerkiurumacirmitun qanertuq:

“Balak-aam Moab-am angayuqran taitaanga

Syria-mek calaralirnerni ingrinek, qanerluni,

‘Qanrucicarturnga

aniqlaaluki Israel-aam yui.’

8Qaillun wiinga aniqlaagiciqsia Atanrem aniqlaaksailkainek?

Wall'u qalarrlua pillugnamek ciunerkamek Ataneq tuaten piksaitevkarluku?

9Tangerrsugngaanka qertulrianek teggalqunek,

tangvagyugngaluki-llu qeminek.

Allakaumaluteng yuut;

nalluvkenaku atawaqercecimanrucirteng allani yugni.

10Israel-aam yuin kinguvrit urr'artun ayuqut.

Amllessiyaagameng naaqumasciigatut.

Maani nunami uitalqa iqukliskan Agayutem yuin iliicetun ayuqlua piyugtua.

Tuquvkaqia uitanqegcivkarlua ellualriit ilalirluki.”

11Balak-aam tua-i Balaam-aaq qanrutaa, “Ciin waten pisia? Taitellruamken aniqlaasqelluki ukut yuut, tau͡gken elpet atawaqaasqelluki.”

12Elliin kiugaa, “Wiinga-wa qanerciqellrianga Atanrem tau͡gaam qanresqellrinek.”

Balaam-aam Qanenqigtellra

13Balak-aam Balaam-aaq qanrutaa, “Tailuten maligesnga allamun, tuaken cali tangerrsugngaciqaten ilait tau͡gaam Israel-aam yui. Aniqlaaniaten tuaken.” 14Ayautaa-llu carr'ilqaanun Zophim-aam qainganun ingrim Pisgah-m. Tuani cali ekuaviliuq malrunlegnek ekuagiluni-llu elliitekluki nulirten̄ek qusnginek-llu qaingitni.

15Balaam-aam Balak-aaq qanrutaa, “Nangerrluten canianun ekuakengarpet utaqanga, yaani qalarucartullemni Ataneq.”

16Atanrem ullagaa Balaam-aaq qanerkiurraarluku-llu utertelluku Balak-aaq qanrucarturtelluku. 17Utercami tangrraa Balak-aaq nangengqaluni ekuakengami caniani Moab-am ciuliqagtainek ilaluni. Balak-aam aptaa Ataneq camek qanrucianek, 18Balaam-aaq-llu waten qanerluni:

“Tailuten Balak-aaq Zippor-am qetunraani, niicugninga.

19Agayun yugtun ayuqenrituq, iqluyulriatun;

yugtun-llu ayuqenrilami umyuani cimiyuitaa.

Qanrraarluni-qaa tuaten piksaitelartuq?

Qanellruuq-llu-qaa piciurcetarkaunrilkem̄inek?

20Wiinga alerquumallruunga atawaqercecisqellua,

Agayun-llu atawaqercecikan wiinga utercecesciigataqa.

21Wiinga-llu Israel-aam yuin ukna tekitarkaat tangrraqa,

pillugnarqellriamek wall'u picurlagmek pitaunani.

Atanrem Agayutiita nayurai,

qanrutkelaraat Ataneqniluku.

22Agayutem anutellrui Egypt-aamek;

Calluucit'larai yuilqurmiutartun kuluvagtun.

23Angalkumirtaaryarat tuunriyarat-llu atuusciigatut

Israel-aam yuinun.

Maa-i-llu yuut waten qanrutkelarciqait Israel-aam yui,

‘Tangerciu Agayutem taqellra.’

24Atanruvik Israel-aaq ayuquq yugtutulitun:

Arulaiyuituq allguriluni nervailegmi,

merpailegmiu-llu tuqutellermi augat.”

25Balak-aam Balaam-aaq qanrutaa, “Aniqlaayuumiilkuvki Israel-aam yui atawaqercetenrilngerpeki piki!”

26Tau͡gaam Balaam-aam Balak-aaq kiugaa, “Qanrutellruamken-ggem tamalkuan Atanrem qanellra wiinga aturarkauniluku.”

Pingayiriluni Qanellra

27Balak-aam qanrutaa Balaam-aaq, “Tailuten allamun ayautnaamken Agayutem aniqlaagivkaryuaraaten tuaken.” 28Tua-i Balaam-aaq ayautaa ingrim Peor-am kangranun yuilquq tangerrnaqluni tuaken. 29Balaam-aam qanrutaa, “Ekuavignek malrunlegnek pilinga tailluten-llu malrunlegnek nulirten̄ek malrunlegnek-llu qusnginek.” 30Balak-aaq-llu qanrucimacirmitun piuq, ekuagiluni-llu nulirten̄ek qusnginek-llu tamakuni ekuavigni.

Yupik Bible

Yupik Bible © 2012 American Bible Society

More Info | Version Index