Search form

Numbers 24

1Waniwa Balaam-aam nallunriamiu Atanrem atawaqercecisqumallra Israel-aam yuinek ciunganitun pilallermitun nallunailkutamek utaqalgirpek'nani caugaa yuilquq. 2Balaam-aam kiarcami tangrrai Israel-aam yui arulairumaluteng avqurluteng naumavillgutmegteggun. Agayutem-llu anerneran tuc'ani 3makunek qanertuq:

“Waniwa qanerkaa Balaam-aam Beor-am qetunraan,

waniwa qaneryarai angutem tangerrsugngalriim mecikluki.

4Niicugngaluku-llu Agayun qanqan.

Iigka cikmiqaqsaunakek tangertua nasvicimalua Artuqailngurmek Agayutmek.

5Pelatekait Israel-aam yuin tangssunaqluteng,

6Nalleqliqu'urluteng napatun palm-atun

wall'u naucetaarvigtun kuigem caniani.

Naunrartun-llu aloes-aatun Atanrem nauceciillritun

wall'u napatun cedar-aatun mer'em caniani.

7Ellallugmek enuqisngaitut

nauceciiluki-llu naucetaarkateng merqumalrianun naucetaarvignun.

Angayuqrat quyinruciquq Agag-ami,

atanirturillra-llu sagtarkauluni yaaqvanun.

8Agayutem anutellrui Egypt-aamek;

calluucit'larai yuilqurmiutartun kuluvagtun.

Ingluteng atanruviit nerelriatun piciqait,

ciqumlluki enrit ayemqelluki-llu pitegcautait.

9Angayuqauvik yugtutulitun ayuquq;

qavaqan-llu kia alikevkenaku tuparqeciqau?

Atawaqerlit atawaqaasqilriit elpecen̄ek,

aniqlaamalit aniqlaasteci.”

10Balak-aaq qenqerrluni tengluugni qell'ukek Balaam-aaq qanrutaa, “Wiinga taisqellruamken aniqlaasqelluki inglukestenka, tau͡gken elpet atawaqaasqurluki pingayurqunek. 11Watua ut'reskina. Nunulirciqniluten akqellruyaaqamken tau͡gaam Atanrem nunuliutekan pivkanritaa.”

12Balaam-aam kiugaa, “Qanrutellruanka taivkalten qanrucarturtellua, 13cikiryaaqeng'e'rpenga tamalkuitnek qerrirlinek akinek suulutaanek-llu enevni uitalrianek wiinga narurtesciigatniluku alerquutii Atanrem wangnek camek pilua. Qanerciqua Atanrem tau͡gaam tuaten qanresqekanga.”

Balaam-aam Nangenret Qanellri

14Balaam-aam qanrutaa Balak-aaq, “Waniwa uterteqatartua ilamnun, tau͡gaam ayagpailegma aarcirturnaamken Israel-aam yuinun qaillun piarkaucirpecen̄ek uum kinguani.” 15Qanerkiurumacirmitun-llu waten qanertuq:

“Waniwa qanerkaa Balaam-aam Beor-am qetunraan,

Qaneryarai angutem tangerrsugngalriim mecikluki,

16Niicugngaluku-llu Agayun qanqan,

elisngamek-llu akurturaqluni quyinrulriamek.

Cikmiqsaunii tangertua

nasvicimalua Artuqailngurmek Agayutmek.

17Ukna ciunerkaq agiirtellria tangrraqa,

tangerrluku-llu atanruvia Israel-aam.

Angayuqaq tanqigcetellriatun agyatun nauciquq taukuni.

Qilagmi agyatun taiciquq Israel-aanek.

Tuqurqeciqai ciuliqagtai Moab-am uyunglluki-llu Seth-am yui.

18Edom-aami inglukesten̄i cirlakciqai

nunautiit-llu elliin piksaguciiqaa

Israel-aaq cirlakiurallrani.

19Israel-aam yuin tutmauciiqait piunrirluki-llu uitaqallret.”

20Nasvicimallermikun-llu tangrrai Balaam-aam Amalekite-at, qanerluni-llu waten:

“Amalek-aaq atanruviit pininquqellruat,

tau͡gaam iquani piunriumaciquq akwarpak.”

21Cali-llu Kenite-at nasvaumaluki tangrramiki waten qanertuq:

“Uitavigci pektayiituq, cam pisciiganaku unglutun ekvigmi qulvani uitalriatun.

22Tau͡gaam elpeci Kenite-aulriani piunriumaciquci Assyria-m teguaqsaguskaci.”

23Balaam-aaq cali waten qanertuq:

“Camiunguat ukut yuut quyurtellriit neglirnermun?

24Anguyagyartulriit Cyprus-aamek tengalrarluteng ayagciqut;

cirlakciqagket Assyria Eber-aaq-llu.

Tau͡gaam ellait-llu piunrirciqut akwarpak.”

25Nutaan Balaam-aaq upluni utertuq kingunerminun, Balak-aaq-llu cali ayagluni.

Yupik Bible

Yupik Bible © 2012 American Bible Society

More Info | Version Index