Search form

Numbers 25

Israel-aam Yui Peor-amtellermeggni

1Israel-aam yui arulairumallermeggni Acacia Valley-mi angutait akusrarutekilangellruut Moabite-anek arnanek tamaanelngurnek. 2Tamakut-llu arnat unayaq'larait tuqucimalrianek elliiyarameng nerevkariyaraitni, tuatnaluteng agayuaqameng Moab-am agayutnguaranun. Tamakut-llu Israelite-at nerellguciutaqluteng agayutnguaratnun-llu agayuaqluteng 3Baal Peor-amun. Taumek Atanrem qenruskai, 4Moses-aaq-llu qanrulluku, “Israel-aam yuin ciuliqagtait tamalkuita tuquciki alerquuteka aturluku erenrani, qenrutenrirnianka yuut.” 5Moses-aam atanerruat qanrutai, “Tamarpeci tuqurqiciki yugpecen̄i agayulangelriit Baal Peor-amun.”

6Iliit-llu Israel-aam yuin pelatekaminun itrutuq Midianite-at iliitnek arnamek takuani Moses-aam yuut-llu aluviliulriit Pelatekam Agayuuviim amiigani. 7Phinehas-aam Eleazar-aam qetunraan, Aaron-aam agayulirtem tutgariin, tangrramikek nangerrluni taukut quyungqalriit unitai. Panamek-llu tegulluni 8maligtak taukuk, pelatekam-llu iluqliani Israel-aarmiu angun tauna-llu arnaq tamarkenka temkenkun kaplukek. Tua-i-llu cangerlak piyaaqelleq Israel-aam yuini arulairluni. 9Tau͡gaam tuani ak'a tiissitsaat yuinaq cetamanek cipluku (24,000) tuquqalliniluteng.

10Atanrem-llu Moses-aaq qanrutaa, 11“Phinehas-aam tuaten piami qenrutenrircetai Israel-aam yui. Wangnun tau͡gaam agayuuraasqumaluki piaki allanun pivkenaki wiinga qenerrlua piunrinritanka. 12Taumek qanruskiu akqut'lillgutkeciqniluku akwanun piugarkamek. 13Ellii kinguvri-llu taqsuunateng agayulirten͞gularciqut ciknakucicanga allanun agayutmun yuut-llu assiilnguirumallerkaatnek taqucan.”

14Israel-aam yuin iliit tuqucimalleq Midianite-amek arnamek aiparluni atengqertuq Zimri-mek Salu-m qetunraa, ciulirnerat Simeon-aamek nauvilget ilakellriit. 15Arnaq-llu tauna aterluni Cozbi-mek, Zur-aq atii ciulirneqluku Midian-aarmiut ilakellriit.

16Atanrem-llu Moses-aaq qanrutaa, 17“Curugluki anguyagluki piunrirciki Midianite-at, 18iqluurluci assiilngurmek pillrat elpecen̄un pitekluku Peor-ami. Cali-llu Cozbi pitekluku, tuqucimalleq cangerliim nalliini Peor-ami.”

Yupik Bible

Yupik Bible © 2012 American Bible Society

More Info | Version Index